Babala na mawawalan ng ari-arian at trabaho

ni Estrellia de Luna @Panaginip gabay ng buhay | November 16, 2023

Analisahin natin ang panaginip na ipinadala ni Joshua ng Orani, Bataan.

Dear Maestra,

Napanaginipan ko na nakatayo ako malapit sa swimming pool nang bigla akong nakaramdam ng pagkahilo hanggang sa tuluyan akong nahulog.

Ang dami kong mukhang natanaw, gusto nila akong saklolohan pero kinapos na ako sa paghinga hanggang sa tuluyan na akong nalunod. Ngunit, bigla akong nagising at muntik na akong bangungutin.

Ano ang ibig sabihin ng panaginip ko?

Naghihintay,

Joshua

Sa iyo, Joshua,

Ang ibig sabihin ng panaginip mo na nakatayo ka malapit sa swimming pool, nakaramdam ka ng pagkahilo, mawawalan ka ng mga ari-arian. Ito rin ay nagpapahiwatig na matatanggal ka sa posisyong hawak mo ngayon.

Ang marami kang mukhang natanaw, gusto ka nilang tulungan ay tanda na mag-iiba ka ng trabaho. Pinag-iisipan mo kung magnenegosyo ka na lang ba o mag-a-apply ng bagong trabaho.

Samantala, ang kinapos ka sa paghinga ay nangangahulugang kailangan mo ring magpahinga.

Huwag mong abusuhin ang iyong sarili sa sobrang pagtatrabaho dahil may posibilidad na magkasakit ka.

Ang tuluyan kang ‘di nakahinga hanggang sa tuluyan kang nalunod ay nagpapahiwatig na sinisiraan ka sa iba ng matalik mong kaibigan.

Matapat na sumasaiyo,

Maestra Estrellia de Luna

Sign na liligaya at sasagana ang buhay

ni Estrellia de Luna @Panaginip gabay ng buhay | November 14, 2023

Analisahin natin ang panaginip na ipinadala ni Rowena ng Makati.

Dear Maestra,

Napanaginipan ko na natanggap ako bilang manager ng isang department store.

Kumain kami ng mga bago kong katrabaho nang biglang may dumating na aplikante, same position, mas maganda at bata sa akin. Akala ko mapapalitan na ako, mabuti na lang ay hindi. Sa halip, nagpabili ng cake ‘yung may-ari ng department store, at pinagsalu-saluhan namin ito.

Ano ang ibig sabihin ng panaginip ko?

Naghihintay,

Rowena

Sa iyo, Rowena,

Maganda ang ipinahihiwatig ng panaginip mo na natanggap ka sa trabaho bilang manager ng isang department store. Ito ay nangangahulugan na mapapasaiyo pa rin ang magandang kapalaran, at sunud-sunod na ang iyong magiging tagumpay.

Ang kumain kayo ay tanda ng kaligayahan at kasaganahan sa buhay. Ang cake naman ay suwerte at kalusugan ng katawan ang sinisimbolo nito lalo na kung sinindihan mo ang kandila. Kung hiniwa mo naman ito, pansamantala lang ang iyong suwerte at lilipas din ito.

Samantala, ang may dumating na aplikante, mas bata at mas maganda sa iyo. Akala mo tuloy ay papalitan ka bilang manager ay kabaligtaran ang ipinahihiwatig, ito ay senyales na liligaya ka na sa susunod na mga araw at matatapos na ang mga paghihirap mo sa buhay.

Matapat na sumasaiyo,

Maestra Estrellia de Luna

Kahulugan ng baka at nabanlian ng kumukulong sabaw

ni Estrellia de Luna @Panaginip gabay ng buhay | November 13, 2023

Analisahin natin ang panaginip na ipinadala ni Sonia ng Cebu.

Dear Maestra,

Napanaginipan ko na bumili ako ng baka at agad ko itong pinakuluan pagdating sa bahay.

Makalipas ang 15 minuto, titingnan ko sana kung malambot na ito nang bigla akong

mabanlian ng kumukulong sabaw. Tinikman ko ito, ngunit ang sabaw nito ay mapait.

Ano ang ibig sabihin ng panaginip ko?

Naghihintay,

Sonia

Sa iyo, Sonia,

Ang bumili ka ng baka at pinakuluan mo agad, ito ay nagpapahiwatig ng kasaganahan at kapanatagan sa buhay. Pero, hindi naman ibig sabihin nito ay ‘yung mayamang-mayaman, katamtaman lang at hindi sobrang yaman ang magiging buhay mo.

Ang nabanlian ka ng kumukulong sabaw ay nangangahulugan ng tagumpay sa iyong mga pinaplano sa buhay. Kung masyado kang apektado sa iyong balat, ito ay senyales na malalampasan mo lahat ng pagsubok na darating sa buhay mo. Mapapasaiyo ang tagumpay at pagpapala sa darating na mga araw.

Samantala, ang pait ng sabaw, ito ay babala na mag-ingat ka sa pakikisalamuha sa mga taong ‘di mo kakilala. May banta ng gulo sa buhay mo, talasan mo ang iyong pakiramdam at maging alerto ka sa lahat ng oras upang ‘di ka mapahamak.

Matapat na sumasaiyo,

Maestra Estrellia de Luna