Kahulugan ng nag-shopping at nakasalubong ang ex-BF

ni Estrellia de Luna @Panaginip gabay ng buhay | Pebrero 24, 2024

Analisahin natin ang panaginip na ipinadala ni Helen ng Malabon.

Dear Maestra,

Napanaginipan ko na nag-shopping ako sa isang malaking mall hanggang sa nakasalubong ko ‘yung dati kong boyfriend. Nginitian niya ako at inabutan ng bouquet of roses, ang bango ng mga roses. 

Ano ang ibig sabihin ng panaginip ko?

Naghihintay,

Helen

Sa iyo, Helen,

Ang ibig sabihin ng panaginip mo na nag-shopping ka sa isang malaking mall ay magiging maganda ang negosyo mo lalo na kung ito ay may kaugnayan sa ready-to-wear dress. Ito rin ay nangangahulugan ng matatag, komportableng pamumuhay at kaligayahan sa tahanan kapiling ang iyong mga mahal sa buhay. 

Ang nakasalubong mo ang dati mong boyfriend, nginitian ka niya ay nagpapahiwatig na sunud-sunod na mga pagpapala ang makakamit mo, at susuwertehin ka rin sa napakaraming bagay. 

Samantala, ang inabutan ka ng bouquet of roses at ang bango ng amoy nito ay senyales ng kaligayahan, tagumpay at kasaganahan.

Matapat na sumasaiyo,

Maestra Estrellia de Luna

Tanda ng kasaganahan at pagiging malaya sa buhay

ni Estrellia de Luna @Panaginip gabay ng buhay | Pebrero 22, 2024

Analisahin natin ang panaginip na ipinadala ni Ronald ng Makati.

Dear Maestra,

Napanaginipan ko na nakabili ako ng isang ektaryang lupa sa probinsya namin. Nag-housing loan ako, at pinatayuan ko ito ng aking dreamhouse. 

Ano ang ibig sabihin ng panaginip ko?

Naghihintay,

Ronald

Sa iyo, Ronald,

Ang ibig sabihin ng panaginip mo na nakabili ka ng lupa sa probinsya ay kasaganahan at pagiging malaya sa lahat ng bagay. Yayaman at walang makikialam o manghihimasok sa buhay mo. 

Ang bilang na isa ay nangangahulugan ng mag-isang pamumuhay. Matulungin ka sa iyong kapwa. Nasisiyahan ka kapag lahat ng kaibigan mo ay natutulungan mo. Pero 'pag ikaw naman ang naipit at nangailangan, wala kahit isa ang tumutulong sa iyo.

Gayunman, masaya ka na rin naman dahil sikat at malakas ang iyong karisma.

Samantala, ang nag-housing loan ka para makapagpatayo ng dreamhouse ay senyales na magiging matagumpay ang iyong negosyo. Kikita ka ng malaki at makakapagpatayo ka pa ng panibagong negosyo. Ito rin ay sumisimbolo  na makakapag-asawa ka na at magiging maligaya ang inyong pagsasama.

Matapat na sumasaiyo,

Maestra Estrellia de Luna

Kahulugan ng laurel

ni Estrellia de Luna @Panaginip gabay ng buhay | Pebrero 21, 2024

Analisahin natin ang panaginip na ipinadala ni Robert ng Batangas.

Dear Maestra,

Napanaginipan ko na magluluto ako ng adobo. Kinuha ko ‘yung laurel upang maglagay ng kaunti sa adobo, at gustung-gusto ko ang amoy nito. 

Napanaginipan ko rin noong isang gabi, may nilagay na barrier sa daanan ng kotse ko. Inalis ko ito, pero nahirapan ako sa pagtanggal nito. 

Ano ang ibig sabihin ng panaginip ko?

Naghihintay,

Robert

Sa iyo, Robert,

Ang napanaginipan mo na kumuha ka ng laurel upang ilagay sa lulutuin mong adobo, ito ay senyales na magwawagi ka sa mga pagsubok sa buhay. Makakaranas ka rin ng kaligayahan at kasaganahan. 

Kung binata ka pa sa kasalukuyan at naghahanap ng magiging kabiyak ng puso, ito ay nagpapahiwatig ng mabilisang pag-aasawa. Bigla kang makakapag-asawa nang hindi mo inaasahan. 

Samantala, ang inalis mo ang barrier na nakaharang sa daanan ay nangangahulugan na malalampasan mo ang mga pagsubok sa buhay mo gaano man ito kabigat.

Magtatagumpay ka rin sa larangan ng pag-ibig, at mapapangasawa mo rin ang babaeng iniibig mo.