Kahulugan ng lumabas at naglakad-lakad

ni Maestra Estrellia de Luna @Panaginip Gabay ng Buhay | August 21, 2024

Dear Maestra,

Napanaginipan ko na naisipan kong lumabas ng bahay kahit gabi na. Naglakad-lakad ako hanggang sa makaramdam ako ng pagod. Matapos nu’n ay umuwi na ‘ko at natulog. Pero, binangungot naman ako habang natutulog.

Ano ang ibig sabihin ng panaginip ko?

Naghihintay,

Jonathan

---

Sa iyo, Jonathan,

Ang ibig sabihin ng panaginip mo na naisipan mong lumabas ng bahay kahit gabi na, at naglakad-lakad ka hanggang sa makaramdam ka ng pagod ay hindi mo agad makikita ang resulta ng iyong pagpupunyagi sa buhay. Made-delay ang mga pinaplano mo, at ‘di ka magkakaroon ng mga sagabal.

Samantala, ang umuwi ka na upang matulog pero binangungot ka ay nangangahulugan na nasa ilalim ka ng impluwensiya ng ibang tao. Hindi ka makatanggi-tanggi sa mga inuutos. Dapat kang gumawa ng paraan para makaiwas sa taong iyon. Dahil kung hindi, baka lalo lamang maging miserable ang buhay mo.

Matapat na sumasaiyo,

Maestra Estrellia de Luna

Senyales na makakapag-asawa ng maganda at mayamang babae

ni Maestra Estrellia de Luna @Panaginip Gabay ng Buhay | August 20, 2024

Analisahin natin ang panaginip na ipinadala ni Jonathan ng Pila, Laguna.

Dear Maestra,

Napanaginipan ko na nasa kagubatan ako. May nakita akong lion, at sa dako pa roon ay may nakita naman akong mga bulaklak ng lily.

Ano ang ibig sabihin ng panaginip ko?

Naghihintay,

Jonathan

---

Sa iyo, Jonathan,

Ang ibig sabihin ng panaginip mo na nasa kagubatan ka, may nakita kang lion ay kadakilaan. Magiging dakila ka sa paningin ng mga tao. Ito rin ay nagpapahiwatig na magiging mataas ang posisyon mo sa iyong trabaho. Mapo-promote ka sa pinakamataas na posisyon, at may posibilidad ka pang makapag-asawa ng maganda, matalino at nabibilang sa mayamang angkan.

Samantala, ang lily ay nangangahulugan na magiging masaya ang iyong pag-aasawa. Magtatagumpay din ang negosyong bubuksan mo. Pero kung sa panaginip mo, lanta na ang lily, at ‘di na ito kaaya-ayang pagmasdan, ito ay senyales na makakatanggap ka ng malungkot na balita.

Matapat na sumasaiyo,

Maestra Estrellia de Luna

Kahulugan ng umakyat sa bundok, at basag na itlog

ni Maestra Estrellia de Luna @Panaginip Gabay ng Buhay | August 19, 2024

Analisahin natin ang panaginip na ipinadala ni Daniel ng Pangasinan.

Dear Maestra,

Napanaginipan ko na umakyat ako sa bundok. Ang ganda ng paligid, at ang daming mga sariwang halaman na berdeng-berde ang kulay.

May nakita rin akong isang pugad ng ibon. Pero, basag na ang mga itlog nito.

Ano ang ibig sabihin ng panaginip ko?

Naghihintay,

Daniel

---

Sa iyo, Daniel,

Ang ibig sabihin ng panaginip mo na umakyat ka ng bundok ay marami kang daranasing mga pagsubok sa buhay. Magiging puno ng pagpapakasakit, pagpupunyagi, dalamhati at kapighatian ang nakatakdang danasin mo.

Ang mga sariwang halaman ay nagpapahiwatig na marami kang mga kaibigan na maaasahan mo sa sandali ng kagipitan, at handa ka nilang tulungan kung sakaling lalapit ka sa kanila.

Samantala, ang pugad ng ibon ay nangangahulugang ng kasalan. Ibig sabihin, malapit ka nang ikasal. 

Ang mga basag na itlog na nakita mo sa pugad ay nagpapahiwatig ng pagkabigo sa mga bagay na gusto mong marating sa buhay.

Matapat na sumasaiyo,

Maestra Estrellia de Luna