Palad ng mister na may sloping Head Line… Dahilan kaya ‘di umaasenso ang buhay

ni Maestro Honorio Ong @Kapalaran ayon sa Palad | August 25, 2023

KATANUNGAN

1. Matagal na akong sumusubaybay sa inyong mga kolum, kaya medyo marunong na akong tumingin ng guhit ng palad. Pero magpapaanalisa pa rin ako sa inyo dahil hindi naman ako expert tulad n’yo.

2. May sloping Head Line ako o medyo nakakurbang pabilog ang dulo. Sabi n’yo, dapat straight ang Head Line dahil sila ang mga taong yumayaman. Kung hindi yayaman ang may sloping o pakurbang pabilog na Head Line, ano ang mangyayari sa kanyang kapalaran, lalo na pagdating sa career?

3. Sa ngayon, nag-a-apply ako sa abroad. Ang pinoproblema ko, kapag natuloy ako, sino ang mag-aasikaso sa mga bata? Ngayon kasi, nagtatrabaho rin ang misis ko bilang guro at sabi niya, kahit nasa abroad na ako, hindi pa rin siya magre-resign sa pagtuturo dahil sayang ang benepisyo na matatanggap niya kapag nasa retirement age na siya.

4. Kaya ngayon, kahit may aplikasyon ako sa abroad, nagdadalawang-isip pa rin ako kung tutuloy ako o hindi.

5. Sa palagay mo ba, Maestro, may magandang pag-a-abroad ang nakalaan para sa akin? At kahit sloping ang aking Head Line, maaari rin kaya kaming yumaman?

KASAGUTAN

1. Tulad ng kasalukuyan mong attitude sa buhay, ang nais ipahayag o sabihin ng sloping Head Line (Drawing A. at B. H-H arrow a.) sa kaliwa at kanan mong palad. Mas mauuna ang negatibong pag-iisip mo kaysa sa magagandang mangyayari sa hinaharap.

2. Isang kongkretong halimbawa ang iniisip mong pag-a-abroad, hindi ka pa man natutuloy sari-sari nang negatibong bagay at pag-aalinlangan ang pumapasok sa iyong isipan, dahil sloping ang iyong Head Line (H-H arrow a.) na ang ibig sabihin, ay imbis na lumawak ay unti-unting dumidikit o lumalapit sa Life Line (arrow b.) ay nangangahulugang malayo na sana ang narating at naabot mo kundi lamang masyado kang “self-conscious” sa mga binabalak, iniisip, pinaplano at ginagawa mo.

3. Dagdag dito, hindi ka lang “self-conscious”, ang masaklap pa nito, kapansin-pansin din ang mga pangyayari sa buhay mo na puro negatibong senaryo, na sa halip ay magagandang pangyayari. Ito ang paalala sa’yo ng iyong zodiac sign na Virgo.

4. Sa madaling salita, kapag hindi mo nabago ang iyong pananaw o attitude sa buhay, tulad ng nasabi na, habang malayo na ang nararating ng mga kasabayan at mga kaibigan mo, kayo naman ng misis mo ay isang kahig isang tuka pa rin. Kahit dalawa pa kayo ang nagtatrabaho, mahihirapan pa rin kayo at marami pa rin kayong mga utang na dapat bayaran. Paano nga kasi masyadong negatibo ang pananaw mo sa halos lahat ng sitwasyon at pangyayari dumarating sa inyong buhay.

MGA DAPAT GAWIN

1. Habang, ayon sa iyong mga datos, Denver, kapag hindi mo naiwaksi sa iyong isipan ang pag-aalala at alinlangan sa iyong sariling kakayahan kahit patuloy na magturo sa public school si misis at makapag-abroad ka rin, hindi pa rin kayo yayaman.

2. Sa kabilang banda, tandaang magsisimula lamang kayong yumaman sa sandaling naging positibo at praktikal ang laman ng iyong isipan at kapag mas tinitingnan mo nang mas maganda ang bawat pangyayari sa inyong buhay, unti-unti na ring dumiretso ang sloping Head Line (Drawing A. at B. H-H arrow a.) sa kaliwa at kanan mong palad, hanggang sa unti-unting magbalik sa tamang direksyon — ang pagiging tuwid na Head Line (arrow c.) na nagbabadya ng walang dudang pag-unlad hanggang sa tuluyan na ring yumaman ang inyong pamilya.

Ex-OFW, susuwertehin sa muling pag-a-abroad sa edad na 40

ni Maestro Honorio Ong @Kapalaran ayon sa Palad | August 23, 2023

KATANUNGAN

1. Dati akong ofw sa Saudi, tatlong taon din akong pabalik-balik do’n. at tumigil ako noong taong 2021, mula noon ay ‘di na muli akong nakabalik sa abroad kaya madaling naubos ang inipon naming pera at ngayon ay nabaon na kami sa pagkakautang.

2. Nag-apply ako sa dating kong agency at ang sabi sa akin ng dati kong amo ay welcome umano ako pagbumalik ako ro’n at mag-ayos na raw ako ng mga papeles, dahil maganda naman ang record ko sa kanila.

3. Naisipan kong sumangguni sa inyo, upang itanong kung may ikalawa pa kayang pag-a-abroad na itatala sa aking kapalaran, kahit na medyo may edad na ako? Malakas pa naman ako at kaya ko pa naman ang mga dating trabaho na ginagawa ko.

KASAGUTAN

1. Ayon sa gasgas na kasabihan, “habang may buhay may pag-asa!” Ganu’n ‘yun! Kaya sa edad mong 39, at sabi mo nga ay “welcome” ka namang bumalik sa dati mong pinagtatrabahuhan sa Saudi, hindi ka dapat mawalan ng pag-asa, dahil nakalaan na sa kapalaran mo ang ikalawa at mas produktibong pag-a-abroad.

2. May malawak at malinaw na ikalawang Travel Line (Drawing A. at B. t-t arrow b.) sa kaliwa at kanan mong palad. Ito ay malinaw na darating din ang takdang panahon upang muli kang makapag-abroad at muling kang makapagtrabaho sa dating kumpanyang pinapasukan mo.

3. Ang mahalaga ngayon, ay ‘wag kang mapagod sa pag-a-apply, dahil sa bandang huli, tulad ng naipaliwanag na, matutupad din ang ikalawang pag-a-abroad sa iyong karanasan at ang ikinaganda pa nga nito, ang pag-a-abroad na itatala ay higit na mas magiging produktibo at masagana kaysa sa nauna.

4. Ang pag aanalisang muling gaganda ang iyong kapalaran ay pinatunayan ng iyong lagda na nagkabilog at pumangit sa bandang gitna. Ito ang mga panahon na wala ka pang trabaho, ngunit gumanda at naayos din mula sa gitna hanggang sa dulong bahagi ng iyong pirma. Ibig sabihin, tulad ng naipaliwanag na, sa pagtuntong mo ng edad na 40 pataas, ayon nga sa kasabihan “life begins at 40” magbabago na ang landas ng iyong buhay, darating na kusa ang ikalawang pagkakataong upang muli mong mapaunlad at mapabuti ang iyong career, hanggang sa tuluy-tuloy ka na muling umunlad at yumaman (H-H arrow c.).

DAPAT GAWIN

Habang ayon sa iyong mga datos Mr. Capricorn, tiyak ang magaganap sa first quarter ng susunod na taong 2024, sa buwan ng Enero hanggang Abril, sa edad mong 39 pataas, matutupad na rin sa wakas ang matagal mo nang inaasam-asam, muli kang makakapag-abroad at sa ikalawang pagkakataong muling lalago at sasagana ang inyong kabuhayan, hanggang sa tuluyan na muli kayong yumaman (Drawing A. at B. H-H arrow c.).

Among nagloloko, maid kating-kati na magsumbong kay sir

ni Maestro Honorio Ong @Kapalaran ayon sa Palad | August 20, 2023

KATANUNGAN

1. Ako ay isang katulong dito sa abroad, tatlo kami ng amo kong babae at isa niyang anak na 4-years-old ang naiiwan sa bahay. Ang problema ay may lihim na karelasyon ang amo kong babae na ‘pag nalaman ito ng kanyang asawa ay tiyak na malaking gulo ito.

2. Pero nakakaawa naman kung ‘di malalaman ni kuya na niloloko na pala siya ni ate, dahil nagtitiis at nagsisikap siyang magtrabaho para may maipadala sa kanyang asawa’t anak, tapos lolokohin lang pala siya ni ate.

3. Balak ko sanang magsumbong, kaya lang ay natatakot ako, kung hindi ko naman isusumbong si ate ay baka ako naman ang sisihin ni kuya, kapag nalaman niyang may lalaki ang misis niya. Samantala, bago siya umalis binigyan pa niya ko ng pera at bantayan ko raw nang mabuti si ate.

4. Nalilito ako kung ano ang gagawin ko, kaya balak ko na lang sanang umalis at lumipat ng ibang trabaho para hindi na ako madamay sa gulo, tama ba ang magiging pasya ko, Maestro? Kung lilipat ako ng ibang trabaho madali naman kaya akong makakahanap ng bagong amo na kasing bait nila kuya?

5. Ang huli kong nais malaman, Maestro, 38-years-old na ako at hanggang ngayon ay single pa rin ako, kailan kaya ako magkakaroon ng isang masayang pamilya?

KASAGUTAN:

1. Tama ang iyong pasya hindi ka dapat makialam sa personal na problema ng mag-asawa, lalo na’t mga amo mo sila, dahil sa bandang huli, ikaw pa ang maaaring masisi kapag nakialam ka.

2. Isipin mo kapag nalaman niya na ikaw ang nagsumbong sa mister niya, siguradong yari ka.

3. Kapag naman hindi mo sinumbong ang amo mong babae sa ginagawa niyang panlalalaki at nalaman niya na may alam ka sa mga nangyayari, malamang isa ka rin sa sisihin niya.

4. Ang mas maganda mong gawin ay isipin mo munang mabuti ang gagawin mo, bago pa mahuli ang lahat, umalis ka na sa kasalukuyan mong amo na siya namang nais sabihin ng nagbago ng direksyon na Fate Line (Drawing A. at B. F-F arrow a.) pero hindi naman naputol (arrow b.) sa kaliwa at kanan mong palad.

5. Ibig sabihin, dahil sa isang sitwasyong hindi inaasahan na biglang dumating sa iyong buhay, may pagbabago sa iyong pasya at sa iyong trabaho na sa bandang huli, mula sa dating okey na trabaho lalo pangbubuti at gaganda ang iyong hanapbuhay, ang pagbabago ng career na ito ay ngayon na mangyayari at magaganap sa edad mong 38 pataas sa last quarter ng taon ding ito.

MGA DAPAT GAWIN

1. Habang ayon sa iyong mga datos Clair, hindi ka dapat sumawsaw sa problema ng iyong mga amo. Sa halip, ang isipin mo ay kung paano mo mapapaganda ang iyong trabaho, at ang iyong sariling buhay.

2. Kaya nga tama ang iyong pasya, maghanap ka ng ibang trabaho at makikita mo sa taon ding ito, sa buwan ng Oktubre makakatagpo ka na ng bagong trabaho, na kung saan magiging payapa ang iyong kaisipan at magiging masaya ka habang kasabay nito, tuluy-tuloy na ring uunlad ang iyong kabuhayan hanggang sa makapagsimula ka na rin ng sarili mong pamilya (Drawing A. at B 1-M arrow c.) na nakatakda namang maganap sa susunod na taong 2024 sa edad mong 39 pataas, hatid ng isang lalaking nagtataglay ng zodiac sign na Taurus.