3,500 inilikas sa Cagayan at Isabela dahil sa Bagyong Vicky

ni Lolet Abania | December 20, 2020

Tinatayang nasa 3,500 indibidwal ang nagsilikas ngayong Linggo sa Cagayan at Isabela dahil sa matinding pagbaha na epekto ng Bagyong Vicky at ang tail-end ng isang Frontal System (Shear Line) na iniulat ng PAG-ASA.

Ayon kay Cagayan Gov. Manuel Mamba mayroong 2,500 evacuees sa kanilang lalawigan, kung saan 1,400 ang nasa Tuguegarao City at ang natitirang iba pa ay sa Enrile at Solana. Ang 1,400 evacuees sa Tuguegarao ay mula sa 15 barangay. "Dumadami ang aming mga evacuees," ani Mamba.

"Medyo mabilis tumaas ang tubig galing sa Cagayan River," dagdag ni Mamba at sinabing ang lebel ng tubig sa ilog ay umabot sa 11 meters ngayong alas-11:00 ng umaga. "Last time, umabot tayo ng 13 meters," sabi ni Mamba.

"Kaya nag-a-anticipate din kami na 'pag hindi humupa ang ulan, talagang mauulit ang nangyari sa amin one month ago." Dagdag ni Mamba, inilagay na sa red alert ang buong lalawigan ng Cagayan.

Samantala, ayon kay Isabela Gov. Rodito Albano, tinatayang nasa 1,000 ang evacuees sa ngayon at may report na isa ang nawawala kasabay ng pagbaha sa Isabela. "May isa. Mataas ang ilog, rumaragasa, lumangoy pa, tumawid.

Ayun, nawala," sabi ni Albano at sinabing pinaghahanap na ito ng awtoridad Imino-monitor din nila ang Pinacanauan River, ayon kay Albano. "'Yung tubig sa Pinacanauan River sa bandang Sierra Madre, mukhang rumagasa.

'Pag 'yung tributary na 'yun namamaga, naaapektuhan ang Cagayan, nagkakaroon ng catch basin na naman," paliwanag ni Albano. Dagdag ni Albano, naiulat din na ang bahagi ng national highway sa Cabagan ay hindi na madaanan sa baha. "Nahati ang national highway," sabi ni Albano.

Nasa sampung bayan na raw ang apektado ng pagbaha, pati na ang mga tulay ay inabot na ng pagtaas ng tubig. Gayunman, ayon sa gobernador, ipagpapatuloy nila ang pagbibigay ng cash subsidies sa ilalim ng Social Amelioration Program (SAP) at ng Tulong Panghanapbuhay sa Ating Disadvantaged/ Displaced Workers (TUPAD) program ng Department of Labor and Employment (DOLE) ngayong linggo.

Bagyong Vicky, hanggang sa Linggo pa

ni Thea Janica Teh | December 19, 2020

Magdadala ng malakas na pag-ulan ang Bagyong Vicky sa bansa ngayong weekend habang patuloy nitong binabaybay ang Sulu Sea kasabay ng Tail-End ng Frontal System, ayon sa 5 am Severe Weather Bulletin ng PAGASA ngayong Sabado nang umaga.

Makararanas ng malakas na pag-ulan ang CALABARZON, Bicol Region, Visayas, Aurora, Dinagat Islands, Surigao del Norte, Surigao del Sur, Agusan del Norte, Camiguin, Misamis Oriental, Oriental Mindoro, Marinduque at iba pang parte ng northern at central portion ng Palawan kabilang ang Calamian, Cuyo at Cagayancillo Island.

Mahina hanggang malakas na pag-ulan naman ang mararanasan sa Cagayan Valley, Apayao, Kalinga, Mountain Province, Ifugao, Metro Manila at natitirang bahagi ng Central Luzon, MIMAROPA at Cordillera Administrative Region dahil naman sa northern monsoon o hanging amihan.

Namataan kaninang 4 am ang sentro ng Bagyong Vicky sa 150 kilometers west ng Dipolog City, Zamboanga del Norte na may maximum sustained wind na 45 kilometers per hour (kph) at may bugso ng hangin nang hanggang 55 kph papuntang westward sa 25 kph.

Samantala, nasa Tropical Cyclone Wind Signal (TCWS) No. 1 pa rin ang ilang lugar sa bansa kabilang ang mga sumusunod: Luzon -Northern at central portions ng Palawan (Araceli, Dumaran, Taytay, El Nido, San Vicente, Roxas, Puerto Princesa City, Aborlan, Narra, Quezon) kasama ang Calamian, Cuyo, Cagayancillo at Kalayaan Islands Visayas -Southern portion ng Cebu (Pinamungahan, San Fernando, Carcar, Aloguinsan, Barili, Sibonga, Dumanjug, Ronda, Alcantara, Argao, Moalboal, Badian, Dalaguete, Alegria, Alcoy, Malabuyoc, Boljoon, Ginatilan, Oslob, Samboan, Santander) -Western portion ng Bohol (Loon, Tagbilaran City, Dauis, Panglao, Cortes, Maribojoc) -Siquijor -Negros Oriental -Central at southern portions ng Negros Occidental (San Carlos City, Salvador Benedicto, Talisay City, Bacolod City, Murcia, Bago City, Pulupandan, Valladolid, San Enrique, La Carlota City, La Castellana, Moises Padilla, Pontevedra, Hinigaran, Isabela, Binalbagan, Himamaylan City, Ilog, Kabankalan City, Cauayan, Candoni, Sipalay City, Hinoba-An) -Guimaras -Southern portion ng Iloilo (Barotac Nuevo, Dingle, Anilao, Duenas, Lambunao, Dumangas, Pototan, Zarraga, Mina, Badiangan, Janiuay, Maasin, Cabatuan, New Lucena, Santa Barbara, Leganes, Iloilo City, Pavia, Alimodian, San Miguel, Oton, Leon, Tubungan, Igbaras, Guimbal, Tigbauan, Miagao, San Joaquin) -Southern portion ng Antique (Bugasong, Laua-An, Valderrama, San Remigio, Patnongon, Belison, Sibalom, San Jose, Hamtic, Tobias Fornier, Anini-Y) Mindanao -Misamis Occidental Northern at central portions ng Zamboanga del Norte (Siocon, Baliguian, Gutalac, Kalawit, Labason, Tampilisan, Liloy, Godod, Bacungan, Salug, Sindangan, Siayan, Manukan, Jose Dalman, Sergio Osmena Sr., Pres. Manuel A. Roxas, Katipunan, Dipolog City, Pinan, Mutia, La Libertad, Polanco, Rizal, Sibutad, Dapitan City) -Zamboanga del Sur -Zamboanga Sibugay.

Inaasahan na lalabas na sa Philippine Area of Responsibility (PAR) ang Bagyong Vicky sa darating na Linggo nang hapon o gabi.

Pinaalalahanan ng PAGASA ang publiko lalo na ang mga residenteng naninirahan sa mga lugar na nakapailalim sa signal No. 1 sa posibilidad na pagbaha at landslide dahil sa malakas na pag-ulan.

Bagyong Vicky, hahataw sa Visayas at Mindanao

ni Lolet Abania | December 18, 2020

Ganap nang bagyo ang pumasok sa bansa na tinawag na Tropical Depression Vicky na magdudulot ng malalakas na pag-ulan at pabugsu-bugsong hangin sa bahagi ng Visayas at Mindanao habang makakaapekto sa Luzon ang northeast monsoon, ayon sa PAGASA.

Sa forecast ng PAGASA nang alas-3:00 ng umaga ngayong Biyernes, tinataya ang Bagyong Vicky na nasa layong 220 kilometers silangan ng Davao City na may maximum sustained winds na 45 kilometro kada oras malapit sa sentro at pabugsu-bugso na aabot sa 55 kph at kumikilos pakanluran hilagang-kanluran ng 15 kph.

Makararanas ang Central at Western Visayas, Northern Mindanao, Caraga, Davao Region, Southern Leyte, at Zamboanga del Norte ng mga pag-ulan na may pabugsu-bugsong hangin dulot ng nasabing tropical depression.

Posibleng magkaroon ng mga pagbaha at landslides dala ng katamtaman hanggang sa malakas na pag-ulan. Sa Bicol Region, Marinduque, Romblon, Mindoro Provinces, at natitirang bahagi sa Visayas at Mindanao ay makararanas ng maulap na papawirin na may kalat-kalat na pag-ulan, pagkulog at pagkidlat dahil na rin sa Tail-end ng isang Cold Front at ng Bagyong Vicky.

Posibleng magkaroon ng mga pagbaha at landslides dulot ng katamtaman hanggang sa malakas na pag-ulan. Sa Metro Manila, Cagayan Valley, Cordillera Administrative Region, CALABARZON, at Aurora ay makararanas ng maulap na papawirin na may pag-ulan dahil sa northeast monsoon at posible rin ang mga pagbaha o landslides dulot ng katamtaman hanggang sa malakas na pag-ulan.

Ang natitirang bahagi ng Luzon ay bahagyang maulap hanggang sa maulap na papawirin na may pulo-pulo at mahinang pag-ulan dulot ng northeast monsoon. Sa Luzon, Visayas, eastern section ng Mindanao ay magkakaroon ng katamtaman hanggang sa malakas na bugso ng hangin na kumikilos hilagang-silangan patungong silangan habang magiging katamtaman hanggang sa malakas ang pag-alon sa mga baybayin.

Ang natitirang bahagi ng Mindanao ay makakaranas ng mahina hanggang sa katamtamang bugso ng hangin na kumikilos hilagang-silangan patungong hilagang-kanluran habang mahina hanggang sa katamtamang pag-alon ang mga baybayin.