Cong. Zaldy Co, dapat i-persona non grata sa buong Bicol Region

ni Pablo Hernandez @Prangkahan | September 25, 2025

HATE NI SEN. BONG GO ANG MGA KURAKOT, KAYA KAYSA MANAKAW NA NAMAN ANG P255B FLOOD CONTROL PROJECT SA 2026 NATIONAL BUDGET, DAPAT ANG PONDO ILIPAT SA DOH-MAIFIP PARA MAITULONG SA MGA PASYENTENG NAKA-CONFINE SA OSPITAL -- Suportado ni Sen. Bong Go ang panukala ng Kongreso na ang P255 billion na para sa flood control projects ng Dept. of Public Works and Highways (DPWH) sa 2026 national budget ay i-realign sa Medical Assistance to Indigent and Financially Incapacitated Program (MAIFIP) ng Dept. of Health (DOH).

Ayon kasi kay Sen. Bong Go, kaysa manakaw at ginagawang gatasan ng ilan ang flood control projects, ay mas mainam na ilaan ito (P255B) sa MAIFIP na pantulong sa mga kababayang pasyente sa mga DOH hospital at specialty centers hospital at private hospitals.

Patunay ang statement na iyan ni Sen. Bong Go na hate niya ang mga kurakot at may malasakit sa mamamayan, period!

XXX

DAPAT I-PERSONA NON GRATA SI CONG. ZALDY CO SA BUONG BICOL REGION -- Sa mga isinangkot ni Bulacan DPWH 1-former District Engineer Henry Alcantara sa mga senador, dating senador, kongresista at dating kongresista, ay si Ako Bicol Partylist Rep. Zaldy Co, former chairman ng House Committee on Appropriations sa flood control projects scam, lumalabas na ang partylist congressman na ito ang may pinakamalaking natanggap na kickback, at nakumpirma ito nang sabihin naman ni Bulacan DPWH-1 former Asst. District Engineer Brice Hernandez na may pagkakataon pa raw na nag-deliver sila ng P1 billion kickback kay Cong. Zaldy Co.

Mantakin n’yo, ginamit ni Zaldy Co ang pangalang Bicol sa itinatag niyang Ako Bicol Partylist para iluklok siya ng mga kapwa niya Bikolano sa Kamara, tapos ang gagawin pala ay ‘mangurakot’ sa kaban ng bayan.

Dapat iparamdam ng mga miyembro ng local gov’t. units (LGUs) sa Albay, Camarines Sur, Camarines Norte, Catanduanes at Masbate ang kanilang galit, magkaisa silang magpasa ng resolusyon na idinedeklara nilang persona non grata sa buong Bicol region si Zaldy Co, period!

XXX

PUMAPANGIT ANG IMAHE NI SEN. MARCOLETA SA PAGPUPUMILIT NA GAWING STATE WITNESS ANG MAG-ASAWANG DISCAYA -- Dapat nang tantanan ni Sen. Rodante Marcoleta ang pagpupumilit niyang maging state witness ang mag-asawang Curlee at Sarah Discaya nang walang kapalit, na ibig niyang sabihin ay hindi babawiin ng gobyerno ang higit P207 billion ‘in-scam’ ng mag-asawang Discaya sa kaban ng bayan.

Sa totoo lang, pumapangit ang kanyang imahe sa publiko, naba-bash siya nang todo sa social media sa pagtatanggol at pagpupumilit na gawing state witness ang mag-asawang scammer na ito, boom!

XXX

KAPAG NAGLABAS NG WARRANT OF ARREST ANG ICC LABAN KAY SEN. BATO, BAKA MATULAD KAY FPRRD NA PUWERSAHANG DINALA SA THE HAGUE AT IKINULONG SA ICC JAIL -- Matapos basahan ng mga kasong murder si former Pres. Rodrigo Roa Duterte sa International Criminal Court (ICC) ay nasama ang mga apelyidong "Dela Rosa" at "Aguirre" sa public redacted version na ipinost sa ICC website.

Wala mang mga first name, pero ito ay tumutukoy kina former Philippine National Police (PNP) chief, at ngayo’y Sen. Ronald Dela Rosa at former Justice Sec. Vitaliano Aguirre.

Noong si Sen. Chiz Escudero pa ang Senate President ay nagpalabas ito ng statement na hindi niya papayagang arestuhin si Sen. Dela Rosa sa loob ng Senado sakaling maglabas ng warrant of arrest laban sa kanya (Dela Rosa) ang ICC.

Ang problema ngayon ni Sen. Dela Rosa ay hindi niya kaalyado ang Senate President na si SP Tito Sotto, kaya kung sakaling maglabas ng warrant of arrest sa kanya ang ICC ay malaki ang posibilidad na matulad siya kay FPRRD na puwersahang dinala ng arresting law enforcers sa The Hague (The Netherlands) at ikinulong sa ICC jail, period!

Sa mga kurakot sa gobyerno, si Cong. Zaldy Co ang ‘pinakatulisan’ sa lahat

ni Pablo Hernandez @Prangkahan | September 24, 2025

MAS MALAKI PA ANG KICKBACK NG PARTYLIST REP. KAYSA 3 SENADOR KAYA LUMALABAS NA SA MGA KURAKOT SA GOBYERNO, SI CONG. ZALDY CO ANG ‘PINAKATULISAN’ SA LAHAT -- Isinangkot na ni Dept. of Public Works and Highways (DPWH) Bulacan 1, former District Engr. Henry Alcantara sa flood control project scam sina Senators Joel Villanueva, Jinggoy Estrada, ex-Sen. Bong Revilla, former DPWH Usec. Roberto Bernardo, dating Usec. at ex-Caloocan City Rep. Mitch Cajayon at Ako Bicol Partylist Rep. Zaldy Co, former chairperson ng House Committee on Appropriations.

Sa mga pinangalanang ito ni ex-DE Alcantara, lumabas na si Cong. Zaldy Co ang may natanggap na pinakamalaking kickback na umabot sa bilyun-bilyong piso.

Mantakin n’yo, mas malaki pa ang kickback ni Co kaysa sa tatlong senador na itinuga ni Alcantara, at dahil d’yan lumalabas ngayon na sa mga kurakot sa gobyerno, ang partylist representative na ito (Zaldy Co) ang ‘pinakatulisan’ sa lahat, period!

XXX

FPRRD, BINASAHAN NA NG MGA KASONG MURDER KAYA ‘SUNTOK SA BUWAN’ NA MAKALAYA PA SIYA SA ICC JAIL -- Matapos ianunsyo ni Vice Pres. Sara Duterte-Carpio na may bansa na raw na tatanggap sa kanyang amang si former Pres. Rodrigo Roa Duterte (FPRRD) sakaling pagbigyan ng International Criminal Court (ICC) ang hiling nilang interim release sa dating pangulo, ay isinapubliko ng ICC na binasahan na nila ng mga kasong murder si ex-PDuterte.

Ang ginawang iyan ng ICC na basahan ng mga murder case si FPRRD habang may nakabinbing interim release sa kanya, ay maituturing na “suntok sa buwan” na makalaya pa ang ex-president sa ICC jail sa The Netherlands, tsk!

XXX

P46B PANG-FLOOD CONTROL PROJECTS DAPAT LANG I-REALIGN SA PANG-AYUDA SA MAHIHIRAP KAYSA MAPUNTA SA ‘BUWAYANG’ POLITICIANS, DPWH OFFICIALS AT MGA KONTRAKTOR -- Nais ni Minority Leader, 4Ps Partylist Rep. Marcelino Libanan na ang P46 billion flood control projects ng Dept. of Public Works and Highways (DPWH) na nakapaloob sa 2026 national budget, ay i-realign at ilipat sa mga tanggapan nina Sec. Rex Gatchalian ng Dept. of Social Welfare and Development (DSWD) para sa ayuda program na Assistance to Individuals in Crisis Situation (AICS) at Sec. Bienvenido Laguesma ng Dept. of Labor and Employment (DOLE) para sa ayuda program naman ng

Tulong Panghanapbuhay sa ating Disadvantage/Displaced Workers (TUPAD).

Sa panahon na wala pang nakakasuhan at naipapakulong, dapat lang na ang mga mahihirap na kababayan ang makinabang sa P46B na ‘yan kaysa mga ‘buwayang’ politician, DPWH officials at mga kontraktor, period!

XXX

DAPAT KASUHAN NG OBSTRUCTION OF JUSTICE ANG MGA MAKABAYAN BLOC REPRESENTATIVES DAHIL SA PAGTATANGGOL NILA SA MGA KABATAANG NANGGULO SA MANILA -- Kahit kailan talaga ay anti-pulis itong mga partylist na miyembro ng Makabayan bloc dahil mga parak pa ang sinisisi nila sa nangyaring gulo sa Maynila, na kesyo hindi raw nagpatupad ng maximum tolerance ang mga pulis at basta na lang daw pinaghuhuli at nagsagawa ng police brutality sa mga kabataan.

Kita naman sa mga kumalat na video na nagpairal ng maximum tolerance ang mga pulis at kita rin sa mga video na mga kabataan ang unang gumawa ng gulo, pinagbabato ang mga parak kaya marami sa kanila ang nasugatan, tapos nanunog pa ng isang trak, isang motorsiklo, sinira ang mga kagamitan ng Manila LGU at pribadong establisimyento, ninakaw pa ang vault ng isang motel sa Maynila, kaya natural lang na aaksyon na ang mga otoridad para dakpin ang mga nanggugulo.

Dapat sa mga Makabayan bloc partylist representatives na ito ay sampahan ng pulisya ng kasong obstruction of justice para maturuan ng leksyon dahil hindi nila dapat kinakampihan ang mga gumawa ng mali, naging marahas, nanggulo sa rally sa Maynila, boom!

Mag-asawang Discaya, nag-ikot sa buong ‘Pinas para mangurakot, walanghiya talaga!

ni Pablo Hernandez @Prangkahan | September 23, 2025

NAG-IKOT SA BUONG ‘PINAS ANG MAG-ASAWANG DISCAYA PARA MANGURAKOT SA MGA TANGGAPAN NG DPWH, SA METRO MANILA, LUZON, VISAYAS AT MINDANAO -- Hindi lang pala sa Bulacan at Quezon City may flood control projects ang mag-asawang Curlee ar Sarah Discaya, kundi pati sa iba-ibang lungsod sa Metro Manila, gayundin sa iba pang lugar sa Luzon, Visayas at Mindanao.

Ibig sabihin niyan inikot ng mag-asawang Discaya ang mga tanggapan ng Dept. of Public Works and Highways (DPWH) sa buong Pilipinas para mangurakot, mga walanghiya talaga, pwe!

XXX

WALANG POLITICAL WARLORD NA IDINAWIT NG MAG-ASAWANG DISCAYA SA KICKBACK KAYA KASINUNGALINGAN ANG SINASABI NILANG MAY BANTA SA BUHAY NILA -- Malaking kasinungalingan ang sinasabi ng mag-asawang Curlee at Sarah Discaya na kaya nila gustong sumailalim sa witness protection program ay dahil daw natatakot sila sa banta sa kanilang buhay matapos nilang pangalanan ang ilang kongresistang tumatanggap daw ng kickback sa mga nakukuha nilang flood control projects sa DPWH.

Sa mga kongresistang idinawit nila sa kickback ay wala ni isa man sa mga ‘yan ang political warlord kaya’t kasinungalingan talaga ang sinasabi nilang may banta sa kanilang buhay, period! 

XXX

SABLAY ANG PABIDA NG MGA KABATAANG NANGGULO SA MANILA, BINASH NA SILA NG NETIZENS SA SOCIAL MEDIA, NAKULONG PA SILA -- Sablay ang pabida ng mga kabataang nanggulo sa Maynila habang may idinadaos na anti-corruption rally sa Luneta, EDSA Shrine at sa iba pang lugar sa buong bansa.

Akala kasi ng mga kabataang ito ay matutuwa ang publiko sa kanilang ginawang panggugulo nang gayahin nila ang marahas na rally ng mga tinaguriang Gen Z sa Nepal at Indonesia. Mali ang akala nilang iyan dahil bukod sa binash na sila ng netizens ay ‘natuwa’ pa ang mamamayan nang arestuhin, sampahan ng kaso at ikulong sila ng mga awtoridad, boom!

XXX

MARCOS ADMIN VS MANONG CHAVIT NA, KAYA WALA NA ANG SOLID NORTH -- Matapos manawagan si former Ilocos Sur Gov. Chavit Singson sa mga kabataan na pangunahan ang rebolusyon para mapatalsik ang Marcos administration, ang resbak dito ng Malacañang sa pamamagitan ni Presidential Communications Office (PCO) spokesperson, Usec. Claire Castro ay sampahan umano ng kasong sedition si Manong Chavit.

Ang banggaan na iyan ng Marcos admin at ni Manong Chavit ay patunay iyan na wala na ang solid north, period!