Atake ni Usec. Castro kay Manong Chavit, kay PBBM nag-boomerang

ni Pablo Hernandez @Prangkahan | October 7, 2025

SABLAY ANG PABIDA NI SEN. CAYETANO SA ‘SNAP ELECTION’ DAHIL PINAGTUTULUNG-TULUNGAN NA SIYA NGAYONG I-BASH NG MGA MARCOS LOYALIST, DDS AT PINKLAWAN-DILAWAN -- Sablay ang pabidang hamon ni Sen. Alan Cayetano na magsipag-resign ang lahat ng mga nakaupong opisyal ng pamahalaan mula presidente, bise presidente, mga senador at kongresista at saka magdaos ng snap election, at aniya para manumbalik ang tiwala ng publiko sa mga gov’t. elected official ay wala raw sinuman sa mga magri-resign ang lalahok sa halalan, na ibig sabihin hindi puwedeng kumandidato sa pagka-presidente at bise presidente sina Pres. Bongbong Marcos (PBBM), Vice Pres. Sara Duterte-Carpio, Naga City Mayor Leni Robredo o kaya si Sen. Risa Hontiveros, na ang lahat ng mga incumbent senators at congressmen hindi na rin puwedeng kumandidato.

Kaya natin nasabing sablay ang statement ni Sen. Cayetano dahil pinagtutulung-tulungan siya ngayon na i-bash ng mga Marcos loyalist, Duterte Diehard Supporters (DDS) at mga pinklawan at dilawang supporters, period!

XXX

PAGBUHAY SA KINASANGKUTAN NI PBBM SA PORK BARREL SCAM NI NAPOLES, RESBAK NI MANONG CHAVIT SA MGA ATAKE SA KANYA NI USEC. CASTRO -- Kay PBBM nag-boomerang ang mga atake ni Presidential Communications Office (PCO) spokesperson, Usec. Claire Castro kay business tycoon, former Ilocos Sur. Gov. Chavit Singson.

Matapos kasing sabihin ni Usec. Castro na paiimbestigahan nila sa Dept. of Justice (DOJ) si Manong Chavit kung may nilabag ito na batas sa panawagan na mag-resign na si PBBM, at dinagdagan pa na kaya lang daw kumakampi kay VP Sara ang dating gobernador ay dahil hindi naibigay ang hinihingi nitong puwesto sa Philippine Charity Sweepstakes Office (PCSO), ay agad rumesbak ang former governor, ipinakita nito ang mga news clippings noon na nasangkot din sa pork barrel scam ni Janet Napoles ang noo’y Sen. Bongbong Marcos, boom! 

XXX

ATAKE NI HARRY ROQUE KAY SEN. RISA, MISTULANG INILAGLAG DIN NIYA SI SEN. ESCUDERO SA ISYU NG P142.7B INSERTIONS O AMENDMENTS SA 2025 NATIONAL BUDGET -- Inatake nang todo ni former presidential spokesman Harry Roque si Sen. Risa Hontiveros dahil naglilinis-linisan lang daw ito nang sabihin ng senadora na hindi insertions, kundi amendment ang higit P3 billion proyekto niya, dahil ayon sa dating presidential spokesman ay iisa lang daw ang kahulugan ng insertions at amendments.

Sa tema ng sinabing ito ni Harry Roque na dahil sa tindi ng galit niya kay Sen. Risa ay mistulang inilaglag na rin ng former presidential spokesman ang kaalyado niyang si Sen. Chiz Escudero.

Ang palusot kasi ni Sen. Escudero nang mabulgar na nagsingit umano siya ng P142.7 billion sa 2025 national budget ay kesyo hindi raw ito insertions kundi amendments daw, pero sa statement ni Harry Roque, iisa lang ibig sabihin ng insertions at amendments na ‘ika nga, ito ay singit sa budget, period!

XXX

SAKIT-ULO NA ANG MGA PORK BARREL SENATOR AND CONGRESSMEN DAHIL HINDI NA SILA MAKAPAGSISINGIT NG ‘PORK’ SA DPWH AT UNPROGRAMMED FUNDS -- Ayon kay SP Sotto, napagkaisahan daw nila ni Sen. Sherwin Gatchalian na huwag nang isama sa second reading ng Senado ang "unprogrammed funds" sa 2026 national budget, na ibig sabihin nito, ay tila isi-zero budget na nila ito (unprogrammed funds) sa 2026 GAA (General Appropriations Act).

Hindi man aminin ay siguradong sakit-ulo ngayon ang mga pork barrel senatos and congressmen kasi hindi na sila makapagsisingit ng pork barrel sa Dept. of Public Works and Highways (DPWH) dahil mahigpit si Sec. Vince Dizon, hindi na rin sila makapagsisingit ng "pork" sa "unprogrammed funds" dahil isi-zero budget na ito nina Tito Sen. at Sen. Gatchalian, boom!

Bad news sa taumbayan, imbestigasyon sa flood control scam stop na sa Kamara, closed-door sa ICI at suspended sa Senado

ni Pablo Hernandez @Prangkahan | October 6, 2025

IMBESTIGASYON SA FLOOD CONTROL PROJECT SCAM, STOP NA SA KAMARA, CLOSED-DOOR SA ICI AT SUSPENDED SA SENADO -- Ang pagsuspinde ni Senate President Pro-Tempore Ping Lacson sa nakatakdang hearing ng Senate Blue Ribbon Committee sa October 8, 2025 ay tila indikasyon na stop na ang live telecast na imbestigasyon ng Senado sa flood control projects scam.

Bad news iyan sa mamamayan dahil hindi na masasaksihan ang imbestigasyon sa mga sangkot sa flood control projects scam, pinatigil na ni House Speaker Bojie Dy ang House Infrastructure Committee na pinamumunuan ni Bicol Saro Partylist Rep. Terry Ridon sa pag-iimbestiga, pinanindigan ng Independent Commission for Infrastructure (ICI) ang kanilang closed-door investigation, at ngayon nga sinuspinde ang hearing ng Senate Blue Ribbon Committee sa imbestigasyon sa mga nagsabwatan sa pang-i-scam sa kaban ng bayan na nasa Dept. of Public Works and Highways (DPWH), tsk!

XXX

SAKALING NAPATUNAYANG GUILTY SI SEN. CHIZ, SIBAK NA SA PAGKA-SENADOR, KULONG PA! -- Bukod sa inirekomendang mga kasong malversation of public funds at indirect bribery ng National Bureau of Investigation (NBI) matapos masangkot sa flood control projects scam, ay inisyuhan na rin ng Comelec si Sen. Chiz Escudero ng show cause order, at inireklamo pa siya ni Atty. Marvin Aceron sa Senate Ethics Committee kaugnay sa pagtanggap niya ng campaign fund sa kaibigan niyang kontraktor na si Lawrence Lubiano.

Masamang pangitain iyan para kay Sen. Chiz dahil sakaling naisampa ang mga kaso o reklamo laban sa kanya at napatunayang guilty siya, bukod sa sibak na siya sa pagka-senador, kulong pa ang aabutin niya, period!

XXX

DAPAT TULUYAN NG COMELEC SI SEN. ESCUDERO DAHIL KAPAG PINALUSOT, SANGKATUTAK NA PULITIKO ANG GARAPALANG MANGHIHINGI NG CAMPAIGN FUNDS SA MGA KONTRAKTOR -- Depensa ni Sen. Escudero na wala raw paglabag sa batas ang pagtanggap niya ng campaign fund sa kontraktor.

Kung ganyan ang depensa ni Sen. Chiz ay dapat talaga siyang kasuhan ng Comelec para agad-agad matanggal siya sa pagka-senador at makulong, dahil kung kakatigan ng komisyon ang depensang ito ng senador, malamang sangkatutak na mga pulitiko ang garapalan na manghihingi ng campaign funds sa mga kontraktor, boom!

XXX

DAPAT MAGPAIRAL NG 1-STRIKE POLICY SI COMM. NEPOMUCENO, NA ANG SINUMANG CUSTOMS DISTRICT COLLECTOR NA MALULUSUTAN NG SMUGGLED PRODUCTS, SIBAK AGAD! -- Sa nakaraang pagdinig ng Senate Committee on Agriculture na pinamumunuan ni Sen. Kiko Pangilinan ay nabulgar dito na tuloy pa rin ang pagpasok sa bansa ng mga smuggled agricultural product.

Sa totoo lang, hindi lang naman mga smuggled agricultural product ang naipupuslit papasok sa ‘Pinas, kundi pati mga smuggled luxury cars, krudo, ukay-ukay, plastic resins, electronics, firecrackers, general merchandise at iba pa.

Wala naman ibang dapat sisihin sa talamak na smuggling sa ‘Pinas kundi ang mga Customs district collector dahil sila ang mga namumuno para bantayan at suriin ang mga kargamentong pumapasok sa bansa. 

Dapat si Customs Commissioner Ariel Nepomuceno ay gumamit at magdeklara na ng 1-strike policy, na sibak agad sa puwesto ang sinumang Customs district collector na malulusutan ng mga smuggled products, period!

Nakumpiskang luxury cars sa pamilya Discaya, imbes wasakin, isusubasta para mapakinabangan

ni Pablo Hernandez @Prangkahan | October 5, 2025

MAG-ASAWANG DISCAYA, DAGDAGAN NG KASONG LARGE-SCALE ESTAFA KAPAG HINDI BINAYARAN ANG P300B PENALTY NA IPAPATAW NG DPWH -- Sinabi ni Sec. Vince Dizon ng Dept. of Public Works and Highways (DPWH) na aabot daw sa P300 billion ang ipapataw nilang penalty sa mag-asawang Discaya dahil lahat daw ng 1,214 na kanilang nakuhang flood control projects sa DPWH ay mga substandard, mga iniwang nakatengga at mga ‘ghost’ projects. 

Kaya kapag hindi nabayaran ng mag-asawang Discaya ang P300B penalty nila na iyan, bukod sa mga kasong malversation of public funds at indirect bribery, ay sampahan na rin sila ng kasong large-scale estafa, period!

XXX

TAMA ANG DESISYON NI CUSTOMS COMM. NEPOMUCENO NA ISUBASTA ANG MGA NAKUMPISKANG LUXURY CARS NG PAMILYA DISCAYA PARA ANG MAPAGBENTAHAN MAPAKINABANGAN NG BAYAN AT MAMAMAYAN, ‘DI TULAD NG GINAWA NG NOO’Y COMM. LAPENA NA MAKAPAGPABIDA LANG, PINAWASAK ANG MGA MAMAHALING SASAKYAN -- Ayon kay Customs Commissioner Ariel

Nepomuceno ay wala raw siyang plano na wasakin ang mga nasabat na luxury cars na nakumpiska nila sa mag-asawang Curlee at Sarah Discaya, at sa halip ipasusubasta (o ipagbibili) raw niya ang mga mamahaling sasakyan na ito.

Ganyan naman talaga dapat, ang mga kumpiskadong luxury cars ay dapat isubasta para ang mapagbebentahan ay pakinabangan pa ng bayan at mamamayan, hindi tulad ng noo’y Customs Comm. Isidro Lapena, na para lang makapagpabida kay dating Pres. Rodrigo Roa Duterte (FPRRD), ang ginawa winasak sa pamamagitan ng bulldozer ang mga nasabat nilang luxury cars sa Adwana, pwe!

XXX

KAPAG ANG BUDGET NG OVP TINAPYASAN TIYAK MAS TITINDI ANG BANGAYAN NG MGA MARCOS LOYALIST AT DDS -- Dahil sa patuloy na pang-i-isnab ni Vice Pres. Sara Duterte-Carpio sa budget deliberation, plano ng mga pro-Marcos congressmen na tapyasan ang hirit na P945.4 million  budget ng Office of the Vice President (OVP) para sa year 2026 at gawin na lang itong P713.4M.

Kapag tinuluyan ng pro-Marcos congressmen na bawasan ang 2026 budget ng OVP ay asahan nang mas titindi ang bangayan ng mga Marcos loyalist supporters at Duterte Diehard Supporters (DDS) sa social media, abangan!

XXX

MATALINHAGANG PRIVILEGE SPEECH NI SEN. ESCUDERO WA’ EPEK SA COMELEC DAHIL INISYUHAN PA RIN SIYA NG SHOW CAUSE ORDER -- Inisyuhan na ng show cause order ng Comelec si Sen. Chiz Escudero kaugnay sa pagtanggap umano nito ng campaign funds na P30M sa flood control project contractor na si Lawrence Lubiano.

Ibig sabihin niyan ay wa’ epek sa Comelec ang matalinhagang privilege speech ni Escudero, na kaya raw siyang ginigipit ng Marcos administration ay dahil pinangalanan daw niya si Leyte Rep. Martin Romualdez na sangkot sa flood control projects scam, boom!