'Pag 'Pinas, nadamay sa giyera... Tapang-tapangan, 'di uubra – Duterte

ni Zel Fernandez | May 5, 2022

Iginiit ni Pangulong Rodrigo Duterte na sakaling madamay umano ang Pilipinas sa alitang namamagitan sa Ukraine at Russia ay hindi aniya kailangang tapang ang pairalin kundi maayos na pakikipagnegosasyon.

Ayon kay Pangulong Duterte, sa kasalukuyang tensiyon sa pagitan ng Russia at Ukraine, hindi umano ngayon ang panahon para magtapang-tapangan at sa halip ay dapat aniyang pairalin ang maayos na pakikipag-usap para sa kalinawan at kaligtasan.

Ani Duterte, kung daraanin umano sa tapang ang paghawak sa sitwasyon ay tiyak na bomba raw ang sasalubong sa bansa na wala sa atin. Aniya, ang mga armas na tanging mayroon ang Pilipinas ay nakalaan lamang para sa insurgency problem ng bansa.

Samantalang ang mga armas umanong gagamitin sa panlabas na kaguluhan ay hindi kakayanin dahil wala umanong kakayahan ang Pilipinas na makipagsabayan sa malalakas na bansa.

Anang Punong Ehekutibo, sa diplomasya at negosasyon pa rin aniya dapat idaan ang lahat sakali mang may umusbong na tensiyon sangkot ang Republika ng Pilipinas.

Du30: Safety protocols, 'wag kalimutan sa community pantry

ni Ronalyn Seminiano Reonico | June 15, 2021

Saludo si Pangulong Rodrigo Duterte sa mga community pantry organizers sa bansa dahil sa kanilang magandang intensiyon, ngunit nilinaw niya na kailangang sundin ng mga ito ang ipinatutupad na COVID-19 health protocols ngayong panahon ng pandemya.

Matatandaang ilang community pantries na rin ang dinumog ng mga tao kung saan nalabag ang mga health protocols katulad ng social distancing.

Saad ni P-Duterte, "Wala namang question itong pantry scheme. As a matter of fact, I salute the people behind this and those who originated it. Nagkulang sila and maybe they are ignorant of the prohibition imposed by law not by me.

"Hindi siguro n’yo nabasa pero sa totohanan lang, if it is a matter of assessing whether or not you are doing good, you are doing super good. Saludo ako at maganda ang kunsensiya ninyo sa tao but please, read the restrictions first.”

Si Ana Patricia Non ang unang nagtayo ng Maginhawa Community Pantry na tinularan ng maraming Pinoy at ayon sa House Resolutioin, umabot na sa 6,000 ang community pantries sa iba’t ibang lugar sa bansa.

Samantala, una nang nagpaalala ang Department of the Interior and Local Government sa mga organizers ng community pantry na iwasan ang pagkakaroon ng mahabang pila ng mga tao lalo na ang mass gathering.

Pati ang kaibigang si Pastor Quiboloy… P-Du30, makasuhan 'pag 'di na pangulo

ni Lolet Abania | June 10, 2021

Itinuturing na paglabag umano sa batas ang ginawa ni Pangulong Rodrigo Duterte nang tanggapin ang mamahaling regalong ibinigay sa kanya tulad ng isang bahay, ayon kay Tony La Vina, dating dean ng Manila-based Ateneo School of Government.

Matatandaang binanggit ni Pangulong Duterte na tumanggap siya ng isang bahay mula kay Pastor Apollo Quiboloy ng Kingdom of Jesus Christ noong siya ay mayor pa ng Davao City at magmamay-ari lamang siya nito kapag nagretiro na sa pulitika.

Gayunman, bilang government official, dagdag ni La Vina, dapat na i-observe ang “no gifts” policy. “Anything substantial, ‘di mo siya puwedeng tanggapin while nasa gobyerno ka. It doesn’t matter kahit sabihin mo na technically magiging sa 'yo lang sa pagkatapos ng term mo,” ani La Vina sa isang virtual interview ngayong Huwebes.

“That violates not just the spirit of the law but the law itself. ‘Di naman sinasabi ng law na kailangan ‘yung regalo na sa 'yo na. Kung ang intent na sa 'yo na, violation po ‘yun ng (Anti)-Graft and Corrupt Practices Act,” saad pa ni La Vina.

Maaari umanong maharap sa kaso si P-Duterte matapos ang kanyang termino dahil sa paglabag sa batas habang si Quiboloy ay posibleng sampahan din ng reklamo.

“Hindi naman ibig sabihin na kung transparent ka, tama na. ‘Di lang siya puwedeng sampahan ng kaso ngayon because may immunity ang President,” sabi ni La Vina.

“No gifts policy dapat. Every government official, politician should have a 'no gifts policy,'” diin pa ni La Vina.