Kahit pinalayas na ni P-Du30… Ilang barko ng China, nasa WPS pa rin

ni Ronalyn Seminiano Reonico | May 3, 2021

Pinabulaanan ng Malacañang na hindi pinansin ng China ang panawagan ni Pangulong Rodrigo Duterte na pagpapaalis sa mga Chinese vessels sa West Philippine Sea (WPS).

Noong Abril, iniulat ng task force na may mga namataang 220 Chinese militia vessels sa WPS.

Ayon naman kay Presidential Spokesperson Harry Roque, tinatayang aabot sa 201 barko ang umalis sa WPS matapos makipag-ugnayan si P-Duterte kay Chinese Ambassador to the Philippines Huang Xilian.

Pahayag pa ni Roque sa kanyang press briefing, "Hindi po totoo na in-ignore ang ating Presidente… 201 fishing vessels ang umalis and all because of the message of the President and the warm relations we enjoy with China.

"Doon sa natitirang kaunti, we are still hoping aalis sila."

Sa nakaraang public speech ni P-Duterte, aniya ay malaki ang utang na loob ng Pilipinas sa China ngayong nakikibaka ang bansa laban sa COVID-19 pandemic ngunit aniya, ang territorial waters ng ‘Pinas ay "cannot be bargained."

Samantala, matatandaang kamakailan ay nagsampa na ng diplomatic protest ang Department of Foreign Affairs (DFA) laban sa China dahil sa patuloy na presensiya ng mga Chinese vessels sa WPS.

P30K benepisyo ng empleyadong nagka-COVID, kasado na

ni Lolet Abania | May 2, 2021

Hinihintay na lamang ang pirma ni Pangulong Rodrigo Duterte para sa panukalang P30,000 benepisyo na makukuha ng manggagawang tinamaan ng COVID-19, ayon kay Department of Labor and Employment (DOLE) Secretary Silvestre Bello III.

“'Yung sakit na COVID-19 [ay magiging] compensable na ‘yan, hinihintay na lamang ang approval ng ating pangulo,” pahayag ni Bello sa isang virtual interview ngayong Sabado.

Giit ni Bello, naghain ang Employees’ Compensation Commission (ECC) ng panukalang P30,000 one-time benefit na matatanggap ng isang manggagawa na nagkasakit ng COVID-19.

“Merong resolusyon ang ECC diyan. Kapag tinamaan ka ng COVID sa trabaho mo, mayroon kang assistance na P30,000. One time lang po ‘yan,” ani Bello.

Sinabi ng kalihim, ang empleyado, kahit saan man sila nagtatrabaho – micro, small at medium enterprises – ay maaaring kumuha ng naturang benepisyo sa Social Security System (SSS).

“I have no reason to doubt that the president won’t approve it…Kaya pagdating niyan sa lamesa niya, pipirmahan agad ng presidente natin ‘yan,” sabi ni Bello.

Matatandaang noong April 28, inaprubahan ng ECC na pinamunuan ni Bello ang pagkakasama ng COVID-19 sa listahan ng mga itinuturing na occupational at work-related compensable diseases.

Nangangahulugan ito na ang isang manggagawa mula sa pribado o pampublikong sektor na tinamaan ng virus ay may karapatan na makatanggap ng kompensasyon mula sa tinatawag na Employees’ Compensation Program ng ECC.

Nakasaad sa ECC board resolution 21-04-14, ang isang na-diagnose clinically ng COVID-19 at nagkaroon ng history, signs at sintomas ng COVID-19 habang suportado ng diagnostic proof, kabilang dito ang reverse transcriptase polymerase chain reaction (RT-PCR) test ay itinuturing na compensable sa alinmang sumusunod na kondisyon:

• Kinakailangang may direktang koneksiyon sa mga offending agent o event at ang isang empleyado ay nakabase sa epidemiological criteria at occupational risk (e.g. healthcare workers, screening at contact tracing teams, etc.)

• Ang trabaho ng isang manggagawa ay nangangailangan ng palagiang face-to-face at close proximity interaction sa publiko o sa mga confirmed cases para sa healthcare workers’.

• Nakuha ang COVID-19 sa pinagtatrabahuhan.

• Nakuha ang COVID-19 dahil sa pagko-commute papasok at pauwi sa trabaho.

August 23, start ng klase — DepEd

ni Lolet Abania | April 30, 2021

Binigyang-diin ng Department of Education (DepEd) na ang pinal na desisyon sa pagbubukas ng klase para sa taong 2021-2022 ay na kay Pangulong Rodrigo Duterte, habang ang panukalang August 23 ay isa lamang sa kanilang mga opsiyon.

Ayon sa DepEd, maghahain pa ang ahensiya ng ibang options kay Pangulong Duterte.

“The August 23 start date proposal is only one of the options since DepEd is mandated to open the school year not later than the last day of August under the same law unless the President intervenes,” ayon sa inilabas na statement.

Inisyu ng DepEd ang nasabing pahayag matapos na isa sa mga opisyal ng ahensiya ang nagmungkahi na sa August 23 ay maaari nang simulan ang school year 2021-2022, kung saan wala pang dalawang buwan ang bakasyon ng mga estudyante matapos ang klase ngayong taon.

Samantala, pinalawig ang school year 2020-2021 nang hanggang July 10.

“Nonetheless, we are still conducting policy consultation and review with concerned stakeholders to determine the most appropriate course of action on this matter,” sabi pa sa statement.

Dagdag ng DepEd, maglalabas sila ng official guidelines para sa school year sa mga susunod na araw.