Kauna-unahang OFW Hospital, bukas na sa Mayo 2 —DOLE

ni Lolet Abania | April 30, 2022

Magbubukas na ang kauna-unahang ospital na nakatuon sa mga overseas Filipino workers (OFWs), na matatagpuan sa San Fernando City, Pampanga, matapos na si Pangulong Rodrigo Duterte ay inspeksyunin ito sa Linggo, Mayo 1, ayon sa Department of Labor and Employment (DOLE) ngayong Sabado.

Sinabi ni DOLE Usec. Benjo Benavidez, ang polyclinic ng OFW Hospital ay bubuksan para sa outpatient services sa Lunes, Mayo 2.

Ang mga serbisyo ng ospital ay libre para sa mga OFWs, kabilang na rito ang kanilang mga dependents.

Ayon kay Benavidez, walang limit sa bilang ng mga dependents na maaari ring mag-avail ng mga serbisyo, hangga’t ang mga migrant worker ay naka-register sa Overseas Workers Welfare Administration (OWWA).

Aniya pa, mayroong 100-bed hospital na bukas araw-araw para sa mga kuwalipikadong pasyente.

Matatandaan na nitong pagpasok ng taon, ang DOLE ay nakipag-partner sa Philippine General Hospital (PGH) para sa pamamahala ng nasabing ospital sa mga OFWs.

Walang reported case ng Pinoy na positibo sa COVID-19 sa Shanghai, China — OWWA

ni Jasmin Joy Evangelista | March 29, 2022

Inihayag ng Overseas Workers Welfare Administration (OWWA) ngayong Martes na wala itong natanggap na report ng mga Pilipino na nagpositibo sa COVID-19 sa Shanghai,China sa gitna ng surge ng coronavirus cases sa lugar.

“Nagkaroon nga talaga ng surge doon dahil nagkaroon ng mga ilang asymptomatic cases nitong March 21. Mayroong mga naramdaman na lockdown at minabuti ng Shanghai government na magkaroon ng contact tracing at mass testing para matunton ‘yung positive cases,” ani OWWA administrator Hans Leo Cacdac sa panayam ng Teleradyo.

“Sa ngayon wala namang nabalitaan na Pilipino na nagpositive, at kung meron man mapapagamot sila ng lokal na pamahalaan nang libre,” dagdag niya.

Siniguro naman ni Cacdac na ang OWWA ay “working hand in hand” sa pakikipag-ugnayan sa Philippine authorities sa China upang masiguro ang welfare ng mga Pinoy sa Shanghai.

“We are working hand in hand with our consulate. Ang pinakamalapit kasing POLO (Philippine Overseas Labor Office) dito ay ‘yung [sa] Hong Kong, working closely with the consulate in Shanghai. Tayo naman ay naka-antabay na tumulong kung mayroon tayong kailangan tulungan,” aniya.

Ayon pa kay Cacdac, apektado rin ang Filipino musicians sa pansamantalang pagkawala ng mga trabaho dahil sa lockdown sa Shanghai.

“Handa naman tayong tumulong sa kanila, ay kung mayroong gustong umuwi ay handa tayong tumulong sa kanilang pag-uwi,” paliwanag niya.

2,200 partially vaccinated OFWs naka-quarantine pa sa mga hotel — OWWA

ni Jasmin Joy Evangelista | March 11, 2022

Nasa 2,200 overseas Filipino workers (OFW) na hindi pa fully vaccinated kontra COVID-19 ang nananatiling naka-quarantine sa mga hotel, ayon sa Overseas Workers Welfare Administration (OWWA) nitong Biyernes.

Sa panayam ng GMA News’ Unang Balita, sinabi ni OWWA administrator Hans Leo Cacdac na ang mga naturang OFW ay nananatili sa humigit-kumulang 70 hotels.

“Sa ngayon, meron tayong 2,200 OFWs. Meron pa ring quarantine gawa ng mga partially vaccinated, kailangan pa rin i-quarantine, not fully vaccinated or partially vaccinated.

Higit kumulang mga 70 hotels sila naka-billet ngayon,” aniya.

Nilinaw din ni Cacdac na nakikipag-ugnayan na sila sa mga hotel hinggil sa mga unpaid bills ng OWWA.

Sa ngayon daw ay nasa P600 milyon ang halaga ng babayaran ng ahensiya sa mga hotel.

Humingi rin siya ng paumanhin sa mga hotel owners dahil hinihintay pa rin ng OWWA na mai-release ang pondo na manggagaling mula sa Department of Budget and Management (DBM).