Planong pag-atake sa Rafah, oks sa Israel

ni Angela Fernando - Trainee @News | March 16, 2024

Inaprubahan ng Israel nu'ng Biyernes ang potensyal na pagsalakay sa Gaza City of Rafah habang patuloy ding umaasa sa tigil-putukan sa pamamagitan ng planong magpadala ng isa pang delegate sa Qatar para sa mga usapin hinggil sa posibleng kasunduan sa mga bihag kasama ang grupong Hamas.

Nagpahayag ang opisina ni Israeli Prime Minister Benjamin Netanyahu na pumayag ito sa plano na atakihin ang lungsod sa timog kung saan nagtatago ang mahigit sa kalahati ng 2.3-milyong residente ng Gaza matapos ang limang buwan na mga pag-atake.

Ang mga global na kaalyado at kritiko ay nanawagan kay Netanyahu na pigilin ang pag-atake sa Rafah, sa takot ng malawakang pagkasawi ng mga sibilyan.

Giit ng Israel, ito ay isa sa mga huling tahanan ng Hamas na pinangako nilang wawakasan.

Siniguro naman nilang ma-e-evacuate ang mga mamamayan ng Gaza.

Samantala, sinabi ng White House national security spokesperson John Kirby na hindi pa nakakahanap ang United States ng plano para sa Rafah, ngunit nais nila itong makita.

Sinabi rin nito sa isang regular na briefing na ang proposal ng Hamas para sa tigil-putukan para sa mga bihag ay nakapaloob sa mga limitasyon ng kung ano ang posible.

Matatandaang nagpresenta ang Hamas ng isang proposal para sa tigil-putukan sa Gaza sa mga mediator at sa U.S., na kasama ang pagpapalaya ng mga bihag na Israeli kapalit ng kalayaan para sa mga bilanggong Palestinian, kung saan 100 sa kanila ay nagsisilbi ng panghabambuhay na sentensya, base sa isang source na nakita ng Reuters.

Hotel sa Somalia, inatake, 3 patay

ni Eli San Miguel - Trainee @News | March 16, 2024

Namatay ang tatlong katao at 27 naman ang nasaktan sa pag-atake ng mga terorista sa isang hotel malapit sa palasyo ng presidente ng Somalia, ayon sa Somalia National Television (SNTV).

Limang armadong lalaki ang sumalakay sa SYL Hotel sa kabisera ng Mogadishu noong Huwebes ng gabi. Ayon sa mga pulis ng Somalia, napatay ng mga pwersa ng seguridad ang limang terorista.

Kinilala sa SNTV na mga sundalo ang tatlong namatay sa sagupaan. Dagdag pa, inilikas mula sa hotel ang marami pang ibang tao, kasama na ang mga opisyal ng pamahalaan.

Napag-alaman ding mula sa teroristang grupo na Al-Shabaab ang mga umatake, ayon kay Somali police spokesman Colonel Qasim Ahmed Roble

TikTok, iba-ban sa U.S.

ni Eli San Miguel - Trainee @News | March 15, 2024

Ipinasa ng House of Representatives sa U.S. noong Miyerkules ang bill na naglalayong ipagbawal ang TikTok app sa bansa.

Umani ng malakas na suporta ang Protecting Americans from Foreign Adversary Controlled Applications Act, na nakakuha ng 352 pabor na boto at 65 lamang ang hindi pabor.

Nagbabala ang mga opisyal ng United States na may impluwensya ng gobyerno ng China ang TikTok. Bilang halimbawa, iniiwasan nilang magamit ng China ang app upang makialam sa 2024 U.S. elections, ayon kay Director of National Intelligence Avril Haines.

Kasalukuyang walang katiyakan ang susunod na hakbang na haharapin ng TikTok bill. May ilang mga senador na mas pinipili ang ibang paraan upang kontrolin ang mga foreign-owned apps na nagdudulot ng mga alalahanin sa seguridad.

Binanggit naman ni Senate Majority Leader Chuck Schumer na patuloy na susuriin ng Senado ang batas.