College student, pinutol ang mga binti para sa P72.7M insurance scam

ni Eli San Miguel - Trainee @News | March 21, 2024

Sinubukan ng isang college student sa Taiwan na makakuha ng $1.3 million o P72.7 milyong insurance payout sa pamamagitan ng pagputol ng kanyang mga binti.

Inilubog ng kinikilalang 23-anyos na si Zhang ang kanyang mga paa sa dry ice sa loob ng mahigit sa 10 oras upang magdulot ng malubhang pagkasugat na nangangailangan ng amputation, ayon sa ulat ng Taiwan Criminal Investigation Bureau nitong Huwebes.

Sinabi ng ahensya na isang kaibigan ni Zhang mula sa high school, na kinilalang si Liao, ang nangumbinsi sa kanya na gawin ang insurance scam.

Ayon sa mga imbestigador, nalugi ang 23-anyos na si Liao dahil sa cryptocurrency, at inuto niya si Zhang upang pumirma ng isang legal na kasulatan na nag-uutos sa kanya na magbayad ng halos $800,000 o P44,700,000.

Noong gabi ng Enero 26, 2023, nag-motorsiklo sina Liao at Zhang sa Taipei, na naglalayong magpakita ng kagulat-gulat na alegasyon na nadale si Zhang ng frostbite habang nagmamaneho ng motor. Ilang araw bago ito, binili ni Zhang ang ilang mamahaling life insurance, travel insurance, at accident insurance.

Ayon sa mga piskal, naputol ang mga binti ni Zhang dahil sa kanyang mga frostbite injuries.

Inaresto sina Liao at Zhang at parehong sinampahan ng "fraud" at "abetting serious injury" noong Enero 17.

Mga 'itlog ng alien', natagpuan

ni Angela Fernando - Trainee @News | March 21, 2024

Natagpuan ang literal na unidentified floating objects o UFO sa isang lawa sa Oklahoma at marami ang naghihinalang itlog ito ng alien.

Ibinida ng Oklahoma Department of Wildlife Conservation ang mga mistulang itlog ng alien na natagpuan sa McGee Creek Reservoir sa isang Facebook post na viral na sa kasalukuyan sa mga social media platforms.

“If you’re out boating somewhere like McGee Creek Reservoir you may notice these strange jelly-like balls hanging from submerged tree limbs,” saad ng ahensya sa kanilang post.

Kasama sa kanilang post ang mga larawan ng isang matigas na balat, malabnaw na mga bilog na nakabitin mula sa isang puno sa ilalim ng lawa na animo'y itlog.

Wala pang linaw hanggang ngayon kung ano nga ba ang tinaguriang "Alien eggs," o "Godzilla eggs" na lumutang sa nasabing lawa.

35 pirata, papatawan ng parusa sa India

ni Eli San Miguel - Trainee @News | March 20, 2024

NEW DELHI - Dadalhin at papatawan ng parusa sa India ang 35 pirata mula sa Somalia na umatake at kumuha ng kontrol sa kanilang barko sa Somalia.

Inaasahang darating sa India sa Sabado ang mga nahuling pirata at isusuplong sa mga ahensya ng batas, ayon sa isang opisyal na tumangging magbigay ng pagkakakilanlan.

Hindi rin agad nilinaw ang mga paratang at parusang ipapataw laban sa mga pirata, dagdag pa niya.

Noong nakaraang Sabado, nakagawa ng paraan ang mga navy commandos ng India na mabawi ang commercial ship na may bandilang Malta, ang MV Ruen. Sinakop ng mga pirata mula sa Somalia ang barko noong Disyembre 14, na may layong 450 nautical miles sa silangan ng Socotra sa hilaga ng Arabian Sea.

Ito ang unang pag-atake at pag-hijack ng mga Somali na pirata sa isang barkong pangkalakal mula noong 2017. Sa pinakamataas na bilang ng kanilang mga pag-atake noong 2011, tinatayang nagkakahalaga ng $7 bilyon ang pinsalang idinulot ng mga pirata mula sa Somalia sa pandaigdigang ekonomiya, kasama ang daan-daang milyong dolyar na ransom.