Botswana, nagbantang magpadala ng 20k elepante sa Germany

ni Eli San Miguel - Trainee @News | April 4, 2024

Nagbanta ang pangulo ng Botswana na magpadala ng 20,000 elepante sa Germany, dahil sa isang alitan tungkol sa pangangalaga sa kalikasan at pagbabawas sa importasyon ng mga “hunting trophies.”

Ayon sa Pangulo ng Botswana na si Mokgweetsi Masisi, dapat subukan ng mga German na mamuhay kasama ang mga elepante upang maunawaan ang isyu ng kanilang bansa.

Itinaas naman ng Germany ang posibilidad ng mas mahigpit na limitasyon sa pag-iimport ng mga hunting trophies dahil sa kanilang mga alalahanin sa pangangaso ng mga hayop ngayong taon.

Ipinaglalaban ni Masisi na kinakailangan ang pangangaso upang kontrolin ang pagdami ng mga elepante sa kanilang bansa.

Kumokontra ang Botswana, na may lumalaking populasyon ng mga elepante, sa panukala ng Germany at itinuturing itong hindi makatarungan na pakikialam sa kanilang mga usapin.

Kinikilala ang Botswana bilang tahanan ng 130,000 elepante, ayon sa African Wildlife Foundation.

332 toneladang pagkain, ipadadala sa Gaza

ni Eli San Miguel - Trainee @News | March 31, 2024

Umalis na mula sa Larnaca port sa Cyprus ang mga barkong magdadala ng 332 toneladang pagkain patungo sa Gaza, noong Sabado.

Inaasahan ang mga barko na dumaong sa Gaza sa maagang bahagi ng linggong ito.

Ito ang pangalawang shipment sa Marso, matapos buksan ng Israel ang 17-taong harang sa Gaza upang payagan ang pagpasok ng tulong mula sa Cyprus, na inihanda ng U.S. charity World Central Kitchen (WCK) para sa mga nagugutom na Palestino.

Sa isang hiwalay na misyon, plano ng United States na magtayo ng lumulutang na pier sa Gaza para magbigay ng tulong. Ayon kay Cypriot President Nikos Christodoulides, inaasahan na matapos ito sa ika-1 ng Mayo, ngunit maaaring handa na ito bandang ika-15 ng Abril.

Inihirit naman ng mga ahensya na ang pagpapadala ng pagkain sa pamamagitan ng dagat patungo sa Gaza, bagamat tinatanggap, hindi sapat upang matugunan ang pangangailangan ng mga tao. Patuloy silang nananawagan sa Israel na payagan ang mas maraming tulong na dumating sa pamamagitan ng pagbiyahe sa lupa.

Nagbabala na ang United Nations na malapit nang magkaroon ng nakamamatay na taggutom sa hilagang bahagi ng Gaza Strip, kung saan 300,000 katao ang naipit sa giyera.

Mahigit sa kalahati ng populasyon ng Gaza na 2.3 milyon ang maaaring magdusa sa malubhang gutom sa Hulyo.

Babaeng naging bihag ng Hamas, nagsalita na sa pang-aabuso

ni Angela Fernando - Trainee @News | March 27, 2024

Isang babaeng Israeli na naging bihag ng Hamas sa Gaza ang nagsalita na patungkol sa pang-aabuso at iba pang karahasang dinanas niya sa loob ng 55 araw sa poder ng mga ito, ayon sa The New York Times.

Kinilala ang nasabing bihag na si Amit Soussana, isang lawyer na dinukot mula sa kanyang tahanan ng hindi bababa sa 10 kalalakihan.

Ayon kay Soussana, nakakatakot ang sunud-sunod na mga pangyayari sa kanyang buhay matapos siyang maging bihag ng Hamas.

Ibinahagi rin nito kung paano siya kinadena, kinulong, at inabuso sa ilalim ng banta ng baril.

Magugunitang nakalaya si Soussana mula sa pagkakabihag sa kanya nu'ng Nobyembre 2023 kapalit ng mga hostage na Palestines na hawak ng mga Israel.