Tren binomba ng mga militante, 20 dedbol, 70 iba pa sugatan

ni Jenny Rose Albason @World News | May 26, 2026

Patay ang hindi bababa sa 20 katao habang sugatan naman ang 70 iba pa matapos sumabog ang isang tren na sinasakyan ng mga tauhan ng militar sa Pakistan.

Nangyari ang pagsabog habang bumibiyahe ang tren sa Chaman Phatak station sa Quetta, kabisera ng rehiyon ng Balochistan, noong Linggo ng umaga.

Ayon sa mga opisyal, tatlong bagon at ang makina ng tren ang nadiskaril habang dalawa pa ang tumaob. Karamihan sa mga sakay ay mga sundalo at kanilang pamilya na pauwi sana para sa Eid holiday.

Sinabi ng pamahalaang panrehiyon na ang separatist group na Balochistan Liberation Army (BLA) ang responsable sa pag-atake at isa umano itong suicide bombing. Ayon sa mga saksi, isang sasakyang may kargang pampasabog ang bumangga sa tren dahilan ng malakas na pagsabog.

Kinumpirma ng mga opisyal na kabilang sa mga nasawi ang tatlong sundalo at posibleng madagdagan pa ang bilang ng mga biktima.

Mariing kinondena ni Prime Minister Shehbaz Sharif ang insidente habang nagdeklara naman ng emergency sa mga ospital na tumatanggap sa mga sugatan.

Hindi ito ang unang pag-atake ng BLA sa mga tren sa Balochistan. Noong Marso 2025, nagbihag din ng mga pasahero ang mga militante matapos i-hijack ang isang tren patungong Peshawar.

Inaakusahan ng BLA ang pamahalaan ng Pakistan na pinakikinabangan umano ang yamang-mineral ng Balochistan nang hindi nakikinabang ang mga lokal na residente.

Minahan ng karbon sumabog, 90 todas

ni Jenny Rose Albason @World News | May 25, 2026

Nasawi ang 90 katao sa pagsabog ng isang minahan ng karbon sa hilagang China.

Naganap ang gas explosion sa Liushenyu Coal Mine na pinamamahalaan ng Tongzhou Group sa Shanxi Province.

Agad na nagpadala ng daan-daang rescuers sa lugar upang hanapin ang mga posibleng nakaligtas at mabawi ang mga biktima ng insidente.

Nakaantabay rin ang mga paramedic at ambulansya, kung saan mahigit 100 katao ang iniulat na isinugod sa mga ospital para sa agarang lunas.

Ayon sa ulat, nasa 247 minero ang nasa loob ng minahan nang mangyari ang pagsabog.

Kasunod ng insidente, nanawagan si Chinese President Xi Jinping na walang oras ang dapat sayangin sa paggamot sa mga sugatan at sa patuloy na paghahanap sa mga survivor.

Iniutos din niya ang masusing imbestigasyon upang matukoy ang sanhi ng aksidente at mapanagot ang mga responsable.

Batay sa state media, ilan sa mga opisyal na namamahala sa minahan ay naka-detine na habang isinasagawa ang imbestigasyon. Hindi pa tiyak ang eksaktong dahilan ng pagsabog, ngunit lumalabas sa paunang ulat na umabot sa delikadong antas ang carbon monoxide—isang nakalalasong, walang amoy na gas na karaniwang matatagpuan sa mga minahan.

Ang Shanxi ay isa sa mga pinakamahihirap na probinsya ng China at kilala bilang sentro ng industriya ng coal mining sa bansa.

Ang naturang insidente ay kabilang sa mga pinakahuling malalaking trahedya sa sektor, kasunod ng pagguho ng isang open-pit coal mine sa Inner Mongolia noong 2023 na ikinasawi ng 53 katao.

Habang nagpoproseso... Green card applicants sa U.S., pauuwiin sa pinagmulang bansa

ni BRT @Overseas News | May 24, 2026

Photo: Donald Trump - Al Jazeera

Inanunsyo ng Trump administration nitong weekend ang malaking pagbabago sa immigration policy ng Estados Unidos.

Sa ilalim ng bagong patakaran, ang mga indibidwal na may temporary visas na nais mag-apply ng green card ay kinakailangang bumalik muna sa kanilang sariling bansa upang dumaan sa consular processing.

Dati, pinapayagan ang mga aplikante na magsumite ng adjustment of status habang nasa loob ng U.S., lalo na ang mga asawa ng U.S. citizens at kanilang mga anak. 

Sa bagong sistema, ang aplikasyon ay dadaan na sa mga embahada o konsulado ng U.S. sa labas ng bansa.

Tinatayang maaapektuhan ang mahigit isang milyong aplikante na kasalukuyang naghihintay ng kanilang green card.

Ayon sa U.S. Citizenship and Immigration Services (USCIS), tanging sa “extraordinary circumstances” o kung may malaking economic benefit sa U.S. papayagan ang adjustment of status sa loob ng bansa.

Mariin naman itong tinutulan ng mga immigrant advocates at ilang mambabatas dahil maaari umano itong magdulot ng family separation at dagdag-abala sa mga aplikante.