Elon Musk inendorso si Rick Scott bilang US Senate majority leader

ni Eli San Miguel @Overseas News | Nov. 11, 2024

Photo: Elon Musk at Rick Scott / Circulated / Rick Scott socmed

Inendorso ng bilyonaryong si Elon Musk, na kaalyado ng President-elect na si Donald Trump, si Republican Sen. Rick Scott bilang majority leader ng Senado ng U.S. kamakailan.

"Rick Scott for Senate Majority Leader!" saad ni Musk sa isang post niya sa social media platform na X.

Magugunitang nag-iinit na ang labanan para sa nasabing posisyon matapos masungkit ng partido ni Trump ang kontrol sa Senado.

Inaasahang makakakuha ng hindi bababa sa 52 na puwesto ang mga Republican sa 100-miyembrong Senado matapos nilang makuha ang tatlong upuan na dating hawak ng mga Democrat sa West Virginia, Ohio, at Montana sa nakaraang eleksyon na ginanap nu'ng Martes.

Samantala, inihayag ni Mitch McConnell, kasalukuyang Senate Republican Leader, na nanguna sa kanyang partido sa Senado mula pa nu'ng 2007, na siya ay bababa sa posisyon pagkatapos ng eleksyon.

Iran foreign minister, itinangging may planong patayin si Trump

ni Angela Fernando @World News | Nov. 10, 2024

Photo: Iran Foreign Minister Abbas Araqchi at Pres. Donald Trump - AP E/ van Vucci-AP

Itinanggi ni Abbas Araqchi, Foreign Minister ng Iran, ang mga akusasyon mula sa United States (US) na may kinalaman ang Tehran sa isang sinasabing plano upang patayin si Donald Trump.

Sa isang pahayag sa kamakailan, nanawagan si Araqchi para sa pagpapalakas ng tiwala at mga hakbang na magpapabuti sa relasyon ng dalawang bansang magkaaway.

"Now ... a new scenario is fabricated ... as a killer does not exist in reality, scriptwriters are brought in to manufacture a third-rate comedy," saad ni Araqchi sa social media platform na X.

Tinutukoy niya ang sinasabing plano na ayon sa Washington ay iniutos ng elite Revolutionary Guards ng Iran upang patayin si Trump, na nanalo sa halalan nu'ng Martes at papasok sa kanyang posisyon sa Enero.

"The American people have made their decision. And Iran respects their right to elect the President of their choice. The path forward is also a choice. It begins with respect. [...] Iran is NOT after nuclear weapons, period. This is a policy based on Islamic teachings and our security calculations. Confidence-building is needed from both sides. It is not a one-way street," saad pa nito.

Magugunitang sinabi ng Iranian Foreign Ministry spokesperson na si Esmaeil Baghaei na ang mga paratang ay isang "repulsive" na plano ng Israel at ng oposisyon ng Iran sa labas ng bansa upang pag-isahin ang mga usapin sa pagitan ng Amerika at Iran.

10K lumikas dahil sa wildfire sa California

ni Eli San Miguel @Overseas News | Nov. 9, 2024

Photo: Wildfire sa California / Courtney Davis via Reuters

Napalikas ng mga wildfires ang libu-libong Californian at sinira rin nito ang mahigit 100 istruktura.

Kahit kumalma na ang malakas na hangin, patuloy pa rin ang pagsisikap ng mga bumbero na mapatay ang apoy na kumalat na sa mahigit 20,000 ektarya sa Ventura County.

Sinabi pa ng Cal Fire na nananatiling banta ang sunog sa mga kritikal na imprastruktura at patuloy na masusunog ang mga nakapaligid na lugar.

Noong Huwebes, mahigit 10,000 katao ang inutusang lumikas mula sa mga kapitbahayan malapit sa Camarillo, mga 45 milya pababa ng Pacific Coast mula sa Santa Barbara.

Pagkatapos nito, ilang bahay ang sinilaban ng mga uling na dinala ng hangin na umabot sa bilis na 80 mph (130 kph). Mahigit 130 na istruktura ang nawasak sa sunog, ayon sa ulat ng Los Angeles Times.