20 patay sa landslide sa Uganda

ni Eli San Miguel @Overseas News | Dec. 1, 2024

Photo: Ang pag-search ng mga Red Cross workers matapos ang landslide sa Uganda - Irene Nakasiita / Associated Press

Umabot na sa 20 ang bilang ng nasawi sa mapaminsalang landslide sa Bulambuli district, silangang Uganda, nitong Biyernes matapos makarekober ng mas maraming bangkay at mamatay ang isang sugatang biktima sa ospital, ayon sa mga ulat.

Nagdulot ang malalakas na pag-ulan noong Miyerkules ng gabi ng landslide na sumira sa anim na baryo, naglubog sa mga bahay at sakahan.

Iniulat ng Uganda Red Cross na 125 na mga bahay ang nasira, na nagresulta sa paglikas ng 750 katao. Sa mga ito, 216 ang pansamantalang nanunuluyan sa isang lokal na paaralan.

Patuloy ang paghahanap ng mga otoridad, kasama ang mga sundalo, sa mga bangkay na natabunan ng debris, ngunit nahihirapan ang operasyon dahil sa patuloy na pag-ulan at putik na sumasakop sa mga kalsada.

Biden at Macron, iaanunsyo ang tigil-putukan sa Israel at Hezbollah

ni Angela Fernando @Overseas News | Nov. 26, 2024

Photo: Sina United States (US) Pres. Joe Biden at French Pres. Emmanuel Macron - File-Jim Watson / The Associated Press

Inaasahan si United States (US) Pres. Joe Biden at French Pres. Emmanuel Macron na mag-anunsyo ng ceasefire sa pagitan ng Hezbollah at Israel sa lalong madaling panahon, ayon sa apat na matataas na opisyal ng Lebanon.

Nagpahayag si White House national security spokesperson John Kirby sa Washington, na malapit na ngunit nilinaw na hindi pa tapos ang pag-uusap ukol sa ceasefire.

Ayon naman sa French presidency, malaki na ang naging progreso ng mga pag-uusap tungkol sa tigil-putukan.

Samantala, isang mataas na opisyal mula sa Israel ang nagsabi na magpupulong ang gabinete ng Israel ngayong Martes, upang aprubahan ang kasunduan sa ceasefire.

Gayunman, kahit may mga senyales ng diplomatic breakthrough, patuloy pa rin ang malalakas na airstrike ng Israel sa mga suburb ng Beirut na kontrolado ng Hezbollah, bilang bahagi ng kanilang pag-atake na sinimulan nu'ng Setyembre kasunod ng halos isang taon ng mga labanan sa mga borders.

Tumanggi naman ang opisina ni Prime Minister Benjamin Netanyahu na magkomento ukol sa mga ulat na nagsasabing sinang-ayunan na ng parehong Israel at Lebanon ang nilalaman ng kasunduan.

UAE inaresto ang 3 suspek para sa pagpaslang sa isang Israeli

ni Angela Fernando @Overseas News | Nov. 25, 2024

Photo: Si Rabbi Zvi Kogan, Chabad supervisor ng kosher kitchens sa UAE, taong 2021. Times of Israel / Lazar Berman

Inaresto ang tatlong indibidwal sa United Arab Emirates (UAE) kaugnay sa sinasabing pagpatay sa isang Israeli citizen, ayon sa pahayag ng Emirati Interior Ministry kamakailan.

Hindi binanggit sa pahayag ng ministeryo ang mga detalye tungkol sa mga suspek o kung sila ay kinasuhan, ngunit sinabi nitong gagamitin ang lahat ng legal na hakbang upang tugunan nang tama ang anumang aksyon o pagtatangkang nagbabanta sa tibay ng lipunan.

Binigyang-diin ng opisina ni Israeli Prime Minister Benjamin Netanyahu ang pagpatay kay Rabbi Zvi Kogan, 28, bilang karumal-dumal at teroristang aksyon. Sinabi rin ng Israel na gagawin nila ang lahat ng kanilang makakaya upang maparusahan ang mga responsable.

Ayon sa mga lokal na otoridad, si Kogan ay isang residente ng UAE at mayroong Moldovan nationality.

Nagtatrabaho siya sa New York-based na Orthodox Jewish Chabad movement at unang iniulat na nawawala nu'ng Huwebes. Natagpuan naman ang kanyang katawan nu'ng Linggo.