47 caregivers, nakaalis na… OFWs, puwede na uli sa Israel

ni Lolet Abania | July 29, 2021

Inumpisahan na ng Pilipinas na magpadala ng mga home-based caregivers sa Israel kasunod ng isang labor agreement na pinirmahan ng dalawang bansa noon pang 2018.

Ayon sa Department of Labor and Employment (DOLE) ngayong Huwebes, 48 caregivers ang umalis patungong Israel nitong Martes, Hulyo 27.

Batay naman kay Philippine Overseas Employment Administration (POEA) Chief Bernard Olalia, bahagi sila ng unang batch ng 377 overseas Filipino workers (OFWs) na nakatakda sanang i-deploy noong nakaraang taon, subalit nagkaroon ng pagkaantala sa pagpoproseso ng kanilang mga dokumento at flights dahil sa COVID-19 restrictions.

“We are now processing the documents of the qualified applicants for the second round of recruitment, and this time, we are looking at more than 1,000 OFWs who will undergo the usual process of selection, hiring and matching with their respective employers in Israel,” ani Olalia.

Bukod sa mga caregivers, household service workers, at nurses, ayon sa DOLE, hiniling din ng Israel ang iba pang manggagawa sa mga sektor ng technology, services, hospitality at manufacturing.

Sinabi pa ni Olalia na ang deployment ng mga OFWs sa Israel ay sang-ayon sa labor agreement na pinirmahan nina DOLE Secretary Silvestre Bello III at dating Israeli Interior Minister Aryeh Machluf Deri. “We took the initiative to address the concern and request of Israel for caregivers. Since we cannot disregard the fact that there are illegal recruiters here and there, Secretary Bello continues to remind OFWs to avoid dealing with bogus recruiters and under-the-table transactions that require placement fees of about P500,000,” sabi ni Olalia.

Matatandaang noong May, pansamantalang sinuspinde ng DOLE ang deployment ng OFWs sa Israel kasunod ng labanan sa pagitan ng Israeli forces at Palestinian militants. Gayunman, binawi ng bansa ang suspensiyon noong Hulyo 14 kasabay ng umaayos na sitwasyon ng seguridad sa Israel.

IT, engineer, accountant, ipapadala sa Germany

ni Lolet Abania | June 23, 2021

Pinag-iisipan na ng pamahalaan na mag-deploy ng mga skilled workers sa Germany, ayon sa Philippine Overseas Employment Administration (POEA).

Bumuo ang Pilipinas at Germany ng isang technical working group para sa mga skilled workers sa ilalim ng Triple Win Agreement. Nauna rito, ang Pilipinas ay nakapag-deploy na ng mga nurses sa Germany sa ilalim ng nasabing agreement.

“Kaya ngayon, ipa-pattern nila ‘yung ating framework for the deployment of nurses doon sa other skills nila,” ani POEA Administrator Bernard Olalia sa isang interview ngayong Miyerkules.

Sa ngayon, pinag-aaralan ng technical working group ang posibleng itakdang qualifications para sa mga skilled workers.

At dahil sa ito ay kasunduan sa pagitan ng dalawang gobyerno, ang mga interesadong indibidwal ay maaaring mag-apply sa POEA.

“Nandiyan na po lahat ng other skills like, for example, sa medical field, sa technological field, sa IT, sa accountancy, sa engineering, sa lahat pa po ng professions na available,” sabi ni Olalia.

Kapag na-finalize na ang agreement at naihain na ang kailangang trabaho, maglalabas ng advisory ang POEA kung paano at kailan maaaring mag-apply. Gayunman, nagbabala ang ahensiya sa publiko na mag-ingat sa mga illegal recruiters.

73 Pinoy sa India na positibo sa COVID-19, bawal umuwi

ni Ronalyn Seminiano Reonico | May 2, 2021

Pauuwiin na ang mga Pinoy sa India na nais bumalik sa Pilipinas kapag muli nang binuksan ang mga commercial flights at kapag inalis na ang mga ipinatupad na travel ban, ayon sa ambassador sa New Delhi ngayong Linggo.

Una nang ipinagbawal ang pagdating sa bansa ng mga manggagaling sa India dahil sa paglobo ng kaso ng COVID-19 doon. Sa teleradyo interview kay Ambassador Ramon Bagatsing, Jr., aniya ay 73 na ang mga Pilipinong nagpositibo sa COVID-19 sa India.

Aniya, “Ang report na sa amin is 73… it is all over India. India is very, very huge… 73 po ang naka-record sa amin but most of them… sa aking balita, wala pa namang ganu’n kaseryoso maliban lang sa dalawang nasawi.” Ayon din kay Bagatsing, dahil sa mga ipinatupad na travel ban at walang direct flights mula sa India papuntang Pilipinas, hindi pa mapapauwi ang mga Pilipino.

Aniya, “No matter how much we want to come up with the repatriation flight, it’s extremely difficult. Logistically difficult dahil wala ngang flights na papapasukin. At ngayon, nag-order ang gobyerno natin na bawal ang India, we have to follow that. Bagama’t Filipino citizen ito, we have to follow that.” Hindi rin naman daw ganu’n karami ang mga Pinoy sa India na nais nang umuwi sa Pilipinas.

Saad ni Bagatsing, “Hindi pa naman ganu’n karami. Although, isang Pilipinong gustong umuwi, kinakailangang tulungan natin. But on the logistic side, we need at least 150 passengers to make it viable. "Sabi ni (Foreign Affairs) Secretary (Teodoro) Locsin, habang 'di pa puwede 'yan, siguro 'pag June or middle of the month, 'pag medyo okay na. But otherwise, we wait until the commercial flights to resume and then we can do that."

Samantala, noong Sabado, nakapagtala ang India ng highest record na mahigit sa 400,000 kaso ng COVID-19 sa isang araw lang. Sa kabuuang bilang, umabot na sa mahigit 19.5 million cases ang naitala sa India at higit 211,000 ang mga pumanaw.