Deployment ng healthcare workers sa ibang bansa, stop muna — POEA

ni Jasmin Joy Evangelista | November 6, 2021

Pansamantalang ititigil ng Philippine Overseas Employment Administration (POEA) ang pagpoproseso ng mga papeles ng mga nurses at iba pang mga healthcare workers na nagnanais na magtrabaho sa ibang bansa.

Ito ay dahil naabot na ang itinakdang deployment cap ng Inter-Agency Task Force (IATF) o bilang ng mga health care workers na maaaring magtrabaho abroad.

Dahil dito ay hindi muna mag-i-issue ng Overseas Employment Certificate (OEC) sa mga healthcare workers na nagbabalak na mag-abroad.

Matatandaang 6,500 lamang ang bilang ng mga healthcare workers na papayagang mangibang-bansa sa taong ito batay sa patakaran ng IATF.

“Pursuant to POEA Governing Board Resolution No. 17, Series of 2020 and POEA Advisory No. 79, Series of 2021 on the lifting of the moratorium or temporary suspension on the deployment of nurses, nursing aides and nursing assistants, and increasing the annual deployment cap from 5,000 to 6,500, the Administration hereby announces that the said ceiling has been reached as of date,” ani POEA head Bernard Olalia sa Advisory No. 144.

Magpapatuloy ang pagpapatupad sa nasabing suspensiyon hanggang wala pang panibagong inilalabas na anunsyo ang Inter-Agency Task Force.

Samantala, nilinaw naman ng POEA na papayagang makabiyahe ang mga nakakuha na at nakapagproseso na ng kanilang mga papeles bago pa man ilabas ng ahensiya ang nasabing kautusan.

Transfer ng registration ng balikbayan, hanggang Setyembre 30 na lang

ni Jasmin Joy Evangelista | September 4, 2021

Hanggang Setyembre 30, 2021 na lamang maaaring mag-apply ng transfer of overseas registration ang mga repatriated Filipino voters na nagnanais bumoto sa Eleksiyon 2022, ayon sa Commission on Elections.

"The Commission en Banc recognizes the need to prevent the disenfranchisement of a great number of our kababayans who have been unexpectedly repatriated due to the COVID-19 pandemic, hence the decision to extend the deadline. If they will be in the Philippines on election day, then they can still exercise their right of suffrage by casting their ballot here,” ayon kay Comelec spokesperson James Jimenez.

Dagdag pa ng Comelec, ang mga nagnanais magpa-transfer ng rehistro mula sa ibang bansa ay kinakailangang residente ng lugar kung saan nila nais bumoto sa Mayo 2022.

Kailangan ding personal silang mag-apply sa Office of the Election Officer sa kanilang munisipalidad.

Pinaalalahanan din ng Comelec ang publiko na hanggang Setyembre 30 na lamang maaaring magparehistro para sa local at overseas voters.

Namaga ang puso 1-anyos patay sa COVID-19

ni Lolet Abania | August 11, 2021

Labis ang pagdadalamhati ng isang Pinay na ina matapos na ang kanyang 1-anyos na anak na lalaki ay nasawi dahil sa COVID-19 sa Dubai.

Sa lumabas na ulat ngayong Miyerkules, ayon kay Roxy Sibug, ang nag-iisa niyang anak na si Luther Ezekiel ay namatay ilang araw lamang matapos makitaan ng sintomas na katulad ng isang regular na lagnat.

Nang tumaas ang temperature nito ng 39°C, agad na ipina-test sa COVID-19 ng mag-asawang nakabase sa Dubai ang anak na si Luther, lalo na ang ama nito na isang linggo bago pa ay nakaranas ng lagnat at sakit ng ulo. Tulad ng kanilang kinatatakutan, nagpositibo ang resulta ng test sa bata.

Nakitaan naman umano ng improvement si Luther nang bigyan ng mga gamot at vitamins sa isang clinic, subalit nagsimula itong makaramdam ng panghihina at namamaga ang mga mata matapos ang 2 araw. Gayunman, tiniyak naman sa mga magulang ng bata ng mga health workers sa ospital na “nothing's wrong” sa pasyente.

“We brought him to a hospital, where he had a blood test. His temperature was taken, a urine sample was taken -- they didn’t see anything wrong. They told us: ‘Mommy, your son is completely okay. There’s nothing wrong with your baby, so you can go home,’” pahayag ni Roxy.

Subalit, lalong lumala ang naging lagay ni Luther, kaya ibinalik ng mag-asawa ang anak sa ospital. Doon na nabatid ng mag-asawa na ang puso ng kanilang anak ay namamaga na dahil sa COVID-19. “Noong chineck ‘yung heart niya, nalaman na namamaga ‘yung heart niya dahil sa COVID-19,” sabi ni Roxy habang naiiyak. “Kahit na bawal ang ginagawa ko, kumukuha ako ng kumot, tapos ayaw nilang pakumutan ang anak ko,” dagdag niya.

“Walang damit ‘yung anak ko, puro apparatus. Sabi ko, 'Hindi!' Inilalagay ko siya rito sa chest ko… kasi alam ko, kailangan, gustung-gusto niyang matulog, eh.” Matapos si Luther na i-intubate ay umuwi ng bahay sina Roxy at kanyang mister, kung saan ilang oras lamang ang nakalipas, ipinaalam sa kanila na ang blood pressure ng anak ay bumababa na.

Sinubukan pa rin ng mga doktor na i-revive si Luther, subalit tuluyan nang namatay ang bata. “Imbes na kasama namin siya sa huling sandali niya rito sa mundo, hindi namin siya kasama,” sabi ni Roxy.

“Nasa morgue siya, naninigas siya doon, nilalamig siya roon. Wala siyang kumot doon, wala kaming magawa,” dagdag ni Roxy. Ayon pa kay Roxy, hindi nila mabigyan ng maayos na wake si Luther, dahil siya mismo ay nagpositibo na rin sa COVID-19 at kinailangang mag-isolate sa bahay.

Paalala naman ni Roxy sa mga nakakaramdam ng sintomas na magpa-test agad sa COVID-19, hindi lang para sa sarili kundi para na rin sa mga mahal sa buhay. “If you're feeling any of the symptoms, even just a light fever, have yourself tested, please,” sabi ni Roxy. “Gastusan n'yo. Mas magandang gumastos na lang kayo sa magkanong halaga, kaysa sa mawala 'yung mga mahal n'yo sa buhay,” ani pa niya.