195 OFWs sa Hong Kong, may COVID-19 – OWWA

ni Lolet Abania | March 10, 2022

Umabot na sa 195 ang bilang ng mga overseas Filipino workers (OFWs) sa Hong Kong na tinamaan ng COVID-19, ayon sa Overseas Workers Welfare Administration (OWWA) ngayong Huwebes.

Sa isang radio interview, sinabi ni OWWA Administrator Hans Leo Cacdac na nakatakdang magbigay ang gobyerno ng assistance sa mga apektadong Pinoy workers sa Hong Kong.

“By the way it stands at 195, ‘yung COVID-19 case and more than half of them are staying in their employer home isolation facility,” ani Cacdac. Ayon sa opisyal, ang 10 OFWs naman na may COVID-19 ay nasa mga ospital.

Gayundin aniya, tinatayang nasa 53% ng mga infected na OFWs ay sumailalim na sa home isolation facility ng kanilang employers habang ang natitirang iba pa ay nasa pasilidad ng Hong Kong government, non-government organizations, at OWWA.

Sinabi rin ni Cacdac, na ang mga OFWs mula Hong Kong na nakabalik na sa Pilipinas ay makatatanggap ng livelihood at iba pang assistance mula sa pamahalaan, kabilang dito ang college scholarship aid para sa kanilang mga anak.

63 Pinoy mula sa Ukraine, nasa ‘Pinas na; naghihintay na 136, safe — DFA

ni Lolet Abania | March 9, 2022

Umabot na sa 63 Filipinos na mula sa Ukraine ang nakauwi na sa bansa, ayon sa Department of Foreign Affairs (DFA) ngayong Miyerkules.

“We are happy that 199 Filipinos are already out of harm’s way. A total of 63 have arrived from Ukraine, and 136 are awaiting repatriation,” sabi ni DFA Undersecretary for Migrant Workers’ Affairs Sarah Lou Arriola sa Laging Handa briefing.

Una nang itinaas sa Alert Level 4 ng DFA nitong Lunes ang sitwasyon sa Ukraine sanhi ng tumitinding sigalot sa pagitan ng naturang bansa at Russia.

Agad ding ibinaba ng ahensiya, ang mandatory repatriation sa mga Pinoy na nasa Ukraine.

Gayunman, ayon kay Arriola, may mga Pinoy pa rin sa Ukraine ang tumatangging umuwi ng Pilipinas dahil hindi umano nila maiwan ang kanilang mga trabaho habang ang iba naman ay may mga pamilya na roon.

“Doon po talaga sa iba who refused to go back home, binigyan natin sila ng financial assistance mula sa Honorary Consulate natin sa Kyiv at ‘yung presence ng ating embahada sa Lviv. ‘Yung ating seafarers, nakikipag-ugnayan ang DFA with POEA (Philippine Overseas Employment Administration) and the local manning agencies, and we’re doing everything we can para ma-extract sila,” saad ni Arriola.

Aniya pa, nakikipag-ugnayan na rin ang ahensiya sa Department of Labor and Employment (DOLE), Overseas Workers Welfare Administration (OWWA), at Department of Social Welfare and Development (DSWD) upang agad na matulungan ang mga nagnanais na umuwing mga kababayan.

“Specially, kailangan din po nila ng stress debriefing dahil napansin po namin doon sa ibang umuwi, lalo na doon sa galing sa matindi ‘yung armed conflict, medyo meron pa rin silang war shock at medyo tulala pa ‘yung ang ating mga kababayan which is understandable,” ani Arriola.

Matatandaang ipinahayag ng DFA na may mahigit sa 300 Pinoy ang nagtatrabaho at naninirahan na sa Ukraine.

Itinaas sa Alert Level 4.. Mandatory repatriation ng mga Pinoy sa Ukraine, ipapatupad — DFA

ni Lolet Abania | March 7, 2022

Itinaas na ng Department of Foreign Affairs (DFA) ngayong Lunes ang crisis alert level sa Ukraine sa Alert Level 4 habang tumitindi ang pananakop ng Russia sa naturang bansa.

Sa ilalim ng Alert Level 4, ipapatupad ng DFA ang mandatory evacuation ng mga Pilipino sa Ukraine, kung saan gastos ito ng gobyerno.

“Due to the rapidly deteriorating security situation in Ukraine, the Department of Foreign Affairs has raised the crisis alert level for all areas in Ukraine to Alert Level 4 (Mandatory Repatriation),” batay sa inilabas na pahayag ng DFA ngayong Lunes.

Gayundin, ang mga Pinoy sa Ukraine ay aasistihan ng Philippine Embassy in Poland.

“Filipinos in Ukraine will be assisted by the Philippine Embassy in Poland and the Rapid Response Team, which are currently assisting Filipino nationals for repatriation and relocation,” ayon sa DFA. Marami na ring Pilipino ang nakabalik na ng bansa habang ang iba ay nakuhang makatakas doon patungo sa kalapit na mga bansa.

Una nang sinabi ng DFA na may nananatili pa na tinatayang 116 Pinoy sa Ukraine. Ayon kay DFA Undersecretary Sarah Arriola, hanggang nitong Huwebes, 93 Pilipino na ang umalis ng Ukraine mula sa 209 na naitalang bilang ng ahensiya. Aniya, may 45 Pinoy pa ang nananatili naman sa Kiev.