Kauna-unahang OFW Hospital, bukas na sa Mayo 2 —DOLE

ni Lolet Abania | April 30, 2022

Magbubukas na ang kauna-unahang ospital na nakatuon sa mga overseas Filipino workers (OFWs), na matatagpuan sa San Fernando City, Pampanga, matapos na si Pangulong Rodrigo Duterte ay inspeksyunin ito sa Linggo, Mayo 1, ayon sa Department of Labor and Employment (DOLE) ngayong Sabado.

Sinabi ni DOLE Usec. Benjo Benavidez, ang polyclinic ng OFW Hospital ay bubuksan para sa outpatient services sa Lunes, Mayo 2.

Ang mga serbisyo ng ospital ay libre para sa mga OFWs, kabilang na rito ang kanilang mga dependents.

Ayon kay Benavidez, walang limit sa bilang ng mga dependents na maaari ring mag-avail ng mga serbisyo, hangga’t ang mga migrant worker ay naka-register sa Overseas Workers Welfare Administration (OWWA).

Aniya pa, mayroong 100-bed hospital na bukas araw-araw para sa mga kuwalipikadong pasyente.

Matatandaan na nitong pagpasok ng taon, ang DOLE ay nakipag-partner sa Philippine General Hospital (PGH) para sa pamamahala ng nasabing ospital sa mga OFWs.

Mandatory insurance sa mga OFWs – DMW

ni Zel Fernandez | April 27, 2022

Kasabay ng muling pagbubukas ng foreign employment sa bansa, muling pinaalalahanan ng Department of Migrant Workers (DMW) ang mga overseas Filipino workers (OFWs) sa implementasyon ng Expanded Compulsory Insurance para sa mga balik-manggagawa at direct hires.

Batay sa Department Order No. 228, Series of 2021, o ang Expanded Compulsory Insurance Coverage for Rehires at Direct Hire ng Department of Labor and Employment (DOLE) at Philippine Overseas Employment Administration (POEA) Memorandum Circular No. 10 na nilagdaan ni POEA Administrator Bernard Olalia, ipinatutupad ang mandatory insurance bilang pagbibigay-proteksiyon sa mga manggagawang Pinoy na nagtatrabaho, abroad.

Ayon sa kawani, ang pagkakaroon ng insurance sa panahong ito ay makatutulong na magbigay ng seguridad sa mga migranteng manggagawa sa gitna ng pandaigdigang krisis sa kalusugan; saklaw ang insidente ng kamatayan, kapansanan at iba pang medical emergency.

Gayundin, sakop ng insurance policy ang repatriation o deportation ng mga OFWs, kabilang ang transportasyon ng mga personal na gamit kapag napatunayang ang manggagawa ay tinanggal ng employer sa kanyang trabaho nang walang wasto o makatarungang basehan.

Sa inilabas na abiso ng DMW, ibinahagi nito ang listahan ng mga insurance companies na accredited na ng Insurance Commission (IC) ng POEA para mag-alok ng OFW insurance.

Kabilang sa mga tinukoy ay ang Paramount Life & Insurance Corporation, Fortune General Corporation, Pioneer Insurance & Surety Corporation, MAPFRE Insular Corporation, UCPB General Insurance Company Inc., Stronghold Insurance, at Philippine British Assurance Company, Inc.

1.7 M overseas absentee voters, nagsimula nang bumoto

ni Lolet Abania | April 10, 2022

Sinimulan na ng ilang 1.7 milyong Pilipino abroad ngayong Linggo ang pagpili ng mga kandidato na ilalagay sa kanilang mga balota para sa 2022 national at local elections.

Batay sa mga Philippine posts, ang overseas absentee voting (OAV) ay tatagal mula Abril 9 hanggang May 10, kung saan gamit ang parehong automated at manual voting systems.

Ang mga absentee voters sa Dubai ay nag-umpisa na ng kanilang pagboto na ginawa sa Philippine Consulate General sa Dubai ngayong Linggo.

Ayon sa Philippine Consul General (PCG), ang United Arab Emirates (UAE) ang may pinakamalaking bilang ng mga registered voters na aabot sa 200,000.

Ang voting hours ay ginanap ng alas-8:00 ng umaga hanggang alas-4:00 ng hapon ngayong Linggo, at alas-7:30 ng umaga hanggang alas-3:30 ng hapon mula naman sa Abril 11 hanggang Mayo 8. Samantala, ang oras ng botohan sa Mayo 9 ay mula alas-8:00 ng umaga hanggang alas-3:00 ng hapon.

Una nang pinostponed ng Commission on Elections (Comelec) ang pagsisimula ng overseas voting sa Shanghai, China dahil sa COVID-19 surge sa lugar. Sinabi ni Comelec Commissioner Marlon Casquejo na tinatayang may 1,600 Filipino voters sa lungsod.

Ayon kay Casquejo, pinag-aaralan naman ng Comelec ang posibilidad ng pag- suspinde ng eleksyon sa pitong iba pang mga bansa at siyudad kabilang dito ang Baghdad; Iraq; Algeria; Chad; Tunisia; Libya; in Islamabad, Afghanistan at Ukraine. Mayroong kabuuang 127 registered voters sa naturang mga bansa.