7K Pinoy nurses, puwede nang magtrabaho abroad – POEA

ni Lolet Abania | February 15, 2022

Dinagdagan at ginawa na ng Philippine Overseas Employment Administration (POEA) sa 7,000 Filipino nurses ang papayagang makapagtrabaho sa ibang bansa ngayong taon.

Sinabi ni POEA Deputy Administrator Bong Plan na mas mataas na ito kumpara sa 3,500 deployment cap simula nang tumama ang pandemya ng COVID-19 sa bansa.

“Actually, from a low of 3,500 cap last year, this year we are already allowing 7,000 nurses for deployment. Basically, tumaas na po tayo ng 100%,” sabi ni Plan sa isang interview ngayong Martes.

Ayon sa opisyal, nadagdagan ang mga pinayagang Pinoy nars na makalabas ng Pilipinas dahil aniya, bumaba na rin ang kaso ng mga nahahawahan ng COVID-19, kung saan mas kailangan sila dito sa bansa.

“The reason is number 1, ‘yung demand po ng mga nurses natin dito is medyo bumaba na because medyo bumaba na po ang mga cases ng COVID-19 dito sa atin,” sabi ni Plan.

“Second, mayroon na po tayong mga licensure exams para sa mga nurses natin so nakakapagdagdag tayo ng mga lisensyadong nurses natin and other healthcare workers, so these are the factors na kinokonsider natin whenever we decide on deployment cap,” paliwanag pa ni Plan.

Nabatid na sa United Kingdom, Germany, United States, at Saudi Arabia ay nangangailangan ng mga nars.

Matatandaan na ipinahayag ng Malacañang noong nakaraang taon, na kanilang itataas ang annual cap sa 7,000 mula sa dating 6,000 para sa deployment ng mga bagong mga health workers abroad.

Mga ospital posibleng maparalisa sa pagre-resign ng mga nurse — PHAPI

ni Jasmin Joy Evangelista | October 21, 2021

Patuloy na dumarami ang bilang ng nurse na nagre-resign kaya nangangamba ang grupo ng mga pribadong ospital na maaaring kapusin sila sa manpower.

Umaalis daw ang mga ito dahil mas pinipiling magtrabaho abroad.

Ayon kay Dr. Jose Rene de Grano, pangulo ng Private Hospitals Association of the Philippines (PHAPI), posibleng maramdaman ang kabawasan sa mga umaalis na nurse sa loob ng 6 na buwan.

"For the past, siguro 2 or 3 weeks, nakita natin na medyo mga around 5 percent or more ng ating mga nurses... ay nagfa-file ng kanilang resignations dahil gusto ho nilang mag-work sa ibang bansa," ani De Grano.

Ayon sa grupo, hinihiling nila sa pamahalaan na matulungan ang malilit na ospital at mga private hospital na mabigyan ng subsidiya para maitaas ang sweldo ng mga nurses.

Sagot naman ng Department of Health, pinag-aaralan na nila kung ano ang susunod na hakbang, lalo't may mga bansa ring niluwagan ang requirements sa pagkuha ng mga Pinoy nurse.

"Kahit wala ka nang practice, eh kinukuha ka na nila dahil nangangailangan din sila ng health care workers. And that is why it is so unfair. Pero wala po tayong magagawa eh, kasi ang ating healthcare workers, they want a higher salary," ani Department of Health spokesperson Usec. Maria Rosario Vergeire.

P9.02 B allowance ng mga health workers, ibibigay na

ni Lolet Abania | June 27, 2021

Pinal nang nai-release ng Department of Budget and Management (DBM) ang P9.02 bilyong pondo ng Department of Health (DOH) para sa special risk allowance (SRA) na nakalaan sa mga medical workers sa buong bansa na inaasahang maibigay nang hanggang Hunyo 30, 2021.

Ayon kay DBM Assistant Secretary Kim Robert de Leon sa interview ngayong Linggo, nai-release na ng ahensiya ang pondo para sa DOH noong Hunyo 25, kung saan matatanggap ang monthly allowance na hanggang P5,000 ng mahigit 300,000 health workers ng parehong mga pribado at pampublikong ospital na nangangalaga sa mga COVID-19 patients.

Sinabi rin ni De Leon na nakasakop ang monthly allowance ng mula Disyembre 2020 hanggang June 30, 2021. “Maaasahan ng mga health workers na maire-release ng DOH ang SRA hanggang June 30, 2021,” ani De Leon.

Sa tanong kung kakayaning matapos ito at maibigay ang mga allowance ng health workers sa natitirang tatlong araw, ani De Leon, “They (DOH staff) are starting to process na beginning Friday para masiguro na magagamit ito definitely by June 30.”

Paliwanag pa ni De Leon, ang pera para sa SRA ay nanggaling sa hindi nagamit o natirang pondo mula sa Bayanihan 2 Law o “Bayanihan to Recover as One Act,” na nakatakdang mag-expire sa Hunyo 30.