Intelligence Major General Luna, sinibak sa palpak na listahan ng mga napatay na NPA

ni Lolet Abania | January 28, 2021

Sinibak na sa puwesto ni Department of National Defense (DND) Secretary Delfin Lorenzana si Deputy Chief of Staff for Intelligence Major General Alex Luna dahil sa lumabas na maling listahan ng mga NPA na napatay ng militar.

Epektibo ngayong araw, Enero 28, 2021, ang pagtanggal sa posisyon kay Luna.

Sinabi ni Lorenzana na sa opisina ni Luna sa J2 nanggaling ang maling listahan ng mga rebeldeng napatay ng militar. Ipinaliwanag ng kalihim na isa itong kapabayaan sa trabaho na hindi maaaring palagpasin kaya nararapat lamang na siya ay managot sa napakalaking pagkakamali.

Matatandaang umani ng matinding batikos ang AFP matapos lumabas ang mali-maling listahan ng mga NPA na napatay ng militar kung saan mali ang pangalan na nakalagay habang ang iba naman ay buhay pa talaga.

"I am relieving MGen Alex Luna from his post as Deputy Chief of Staff for Intelligence, J2, effective today (28 Jan 2021). The publication of an erroneous list, originating from his office OJ2, of alleged NPA killed by the military is an unforgivable lapse. His negligence only shows a lackadaisical attitude towards his job resulting to confusion and damage to reputation. We do not take these offenses lightly and I want to hold the people involved accountable,” ayon kay Lorenzana.

Ateneo, DLSU, FEU, UST, etc., pumalag na kuta ng recruitment ng NPA

ni Lolet Abania | January 24, 2021

Mariing tinutulan ng Ateneo de Manila University, De La Salle University, Far Eastern University, at University of Santo Tomas ang pahayag ng isang anti-insurgency official na ang mga unibersidad ay recruiting grounds para sa mga rebelde at komunista.

Sa isang joint statement ngayong Linggo, ayon sa mga nasabing unibersidad, ang akusasyon na ginawa ni National Task Force to End Local Communist Armed Conflict Spokesperson Lieutenant General Antonio Parlade, Jr. ay walang kaukulan o suportadong pruweba.

“We therefore object to General Parlade’s statement and emphasize that our institutions neither promote nor condone recruitment activities of the New People's Army (NPA) and, indeed, of any movement that aims to violently overthrow the government,” nagkakaisang pahayag ng mga naturang unibersidad.

“This charge, though, is really 'getting old' -- a rehash of the public accusation the general made in 2018 -- irresponsibly since they were cast without proof,” dagdag nila.

Matatandaang kahapon ay pinangalanan ni Parlade ang 18 top universities at colleges sa bansa, kabilang na ang apat na paaralan, na pugad umano ng communist recruitment.

Iginiit ng mga unibersidad na pinahahalagahan nila ang itinuturing ng mga Pilipino na tinaguriang ‘Constitutional rights of speech, thought, assembly, and organization’.

“As universities with high aspirations for our country, we seek to direct our students to engage in acts that contribute to the strengthening of social cohesion, defend the country's democratic institutions, and promote nation-building,” sabi nila.

“And as institutions of higher learning that are stewards of the youth, repositories and producers of knowledge, and builders of communities, we must retain independence and autonomy from the State and other social institutions,” dagdag nilang pahayag.

Ipinunto pa ng pamunuan ng mga nasabing paaralan na ipinatutupad nila ang sagradong pagtitiwala na ang pangunahing responsibilidad ay maitaguyod ang nararapat na kaalaman at pangalagaan ang karapatan ng mga kabataang nag-aaral sa kanilang institusyon.

“We are committed to this mission and have always held ourselves accountable to our primary constituents, the learners, and by extension, their parents,” anila pa.

Ang joint statement ay pinirmahan nina ADMU President Fr. Roberto C. Yap SJ; DLSU President Br. Raymundo B. Suplido FSC; FEU President Dr. Michael M. Alba; and UST Vice-rector Fr. Isaias D. Tiongco OP.

3 sundalo, niratrat ng NPA, patay

ni Lolet Abania | January 17, 2021

Tatlong sundalo ang namatay matapos na pagbabarilin ng mga hinihinalang miyembro ng New People’s Army (NPA) sa Legazpi City ngayong Linggo ng umaga, ayon sa Philippine Army's Southern Luzon Command.

Sa ulat na inilabas ni SolCom commander Lieutenant General Antonio Parlade Jr., naganap ang insidente sa Barangay Bangkerohan.

Ayon pa sa opisyal, ang mga biktima ay walang dalang armas at nakasibilyan na dadalo sa isang pagpupulong na kasama ang lokal na pamahalaan upang pag-usapan ang tungkol sa pagkakaroon ng security para sa isasagawang road construction project nang pagbabarilin ng mga armadong kalalakihan.

Naniniwala ang militar na posibleng pagganti ang motibo ng mga hinihinalang NPA makaraang magsagawa ng combat operation ang mga sundalo laban sa kanila kamakailan.

Sa nasabing operasyon ay nagresulta ito ng pagsuko ng 11 miyembro ng NPA kabilang dito ang isang vice platoon leader.

Wala pang ibinigay na detalye si Parlade sa pagkakakilanlan ng mga nasawing sundalo.