Toll fee sa NLEX, libre

ni Ronalyn Seminiano Reonico | December 7, 2020

Tuluyang naghain ng business permit suspension si Valenzuela Mayor Rex Gatchalian laban sa North Luzon Expressway (NLEX) ngayong Lunes nang hapon dahil sa aberya sa RFID na nagdulot ng matinding trapiko.

Aniya, “We don’t want to cause more anxiety sa ating riding public.”

Paglilinaw naman ni Gatchalian, “Ang nilalaman lang nu’n, number one, suspended na ‘yung business permit nila. Number two, itataas nila ‘yung mga barrier kasi tuloy ‘yung operations nila.”

Tuloy pa rin naman ang operasyon ng NLEX ngunit hindi sila maaaring maningil ng toll fee hanggang hindi natatapos ang suspensiyon.

Personal na inihain ni Gatchalian ang suspension notice sa Mindanao Ave tollgate, Bgy. Ugong dahil hindi nakapagsumite sa itinakdang 5 PM deadline ang NLEX ng kanilang action plan kaugnay ng mga anomalya sa RFID system.

Nais din ni Gatchalian na mag-public apology ang management ng NLEX dahil sa insidente.

Samantala, pahayag naman ni NLEX Senior Vice President for Communications Atty. Romulo Quimbo, “Sinabi po namin sa letter na unang-una, kinikilala po namin na meron kaming mga technical problems po roon sa pag-implement ng 100% cashless [system]. Pangalawa, humingi po kami ng pang-unawa at paumanhin sa mga taga-Valenzuela.

“Pangatlo po, naglagay po kami ng mga aksiyon, mga hakbang na aming gagawin nang hindi na po maulit itong heavy traffic around the Valenzuela toll plaza.”

Aniya pa, “Para sa amin po, ang paniningil po ng toll ay sakop po ‘yan ng national government at ng Department of Transportation at saka ‘yung attached agency na Toll Regulatory Board, so mainam po na idulog doon ‘yung issue nang magkaroon po ng proseso.”

MPTC, umapela kay Gatchalian sa suspensiyon ng RFID system

ni Thea Janica Teh | December 7, 2020

Umapela ngayong Lunes ang Metro Pacific Tollways Corp. (MPTC) kay Valenzuela City Mayor Rex Gatchalian na i-reconsider ang suspensiyon ng implementasyon ng RFID system na naging sanhi ng matinding traffic sa lungsod.

Nitong Biyernes, binigyan ni Gatchalian ang NLEX Corp. ng 24 oras upang makapagpasa ng action plan at 72 oras para maipaliwanag kung bakit hindi dapat suspendihin ang kanilang business permit.

Nag-request ang NLEX Corp. na gawin itong 15 araw ngunit hindi ito tinanggap ni Gatchalian.

Ayon kay MPTC Chief Communication Officer Junji Quimbo, iginagalang umano nila ang karapatan ng pamahalaang lokal at tinitingnan na nila kung paano makakasunod.

Bukod pa rito, humingi na rin ng pasensiya ang NLEX Corp. sa mga residente ng Valenzuela at sinabing bukod sa RFID system, dahilan din ng matinding traffic ang papalapit na Kapaskuhan.

Sa ngayon, inaayos na at pinaplano na ng NLEX Corp at San Miguel Corp na siyang nag-o-operate sa South Luzon Expressway ang implementasyon ng RFID system.

RFID, binantaang ayusin, dahil sa traffic... Gatchalian sa NLEX: Bawal maningil!

ni Lolet Abania | December 7, 2020

Pinagsabihan ni Valenzuela City Mayor Rex Gatchalian ang pamunuan ng North Luzon Expressway (NLEX) na dapat humingi ng paumanhin o magdeklara na lamang ng isang toll holiday ang kumpanya dahil sa kaguluhang idinulot ng pagpapatupad ng kanilang RFID cashless payment system.

"The least NLEX can do is one, publicly apologize to the riding general public. Two, while fixing its RFID system --- toll holiday muna," post sa Facebook ni Gatchalian ngayong Linggo. "Walang singilan hanggang mai-deliver nila ang maayos na service sa mga toll plaza nila," sabi pa ng alkalde.

Matinding traffic ang nangyari sa mga toll plazas sa NLEX simula nang ipinatupad ang cashless payment system noong December 1 kasabay ng ibinigay na mandato ng Department of Transportation (DOTr). Punumpuno ng mga sasakyan at napakahabang traffic sa mga lugar na malapit sa Karuhatan sa Valenzuela City dahil sa RFID sa toll gate ng lungsod.

Ayon naman sa Toll Regulatory Board, ang dami ng mga sasakyan na naipon sa expressway ay tinatawag nilang “birth pain.” Anila, ang ilang lanes ng NLEX toll plaza ay para sa mga sasakyang mayroon nang RFID, habang ang iba ay sa installation ng RFID stickers.

Gayunman, noong Biyernes, nagpadala ng sulat si Gatchalian sa NLEX Corporation chief operating officer na si Raul Ignacio, kung saan binibigyan ng lokal na pamahalaan ng Valenzuela ang kumpanya ng 24-oras matapos na matanggap nila ang sulat, upang magsumite ng kopya ng kanilang gagawing plano para agad na malutas ang kaguluhan sa RFID.

Nakasaad din sa sulat na hinihingan ang NLEX Corp. ng 72-oras pagkatanggap nito ng paliwanag kung bakit ang kanilang business permit ay hindi dapat suspendihin. Sinagot naman ng kumpanya kahapon, December 5, ang sulat na pinirmahan ng presidente at general manager na si J. Luigi Bautista, kung saan humihingi ito ng 15-araw upang matugunan ang hinihiling na ito ni Gatchalian.

Ayon kay Bautista, nagtalaga na sila ng grupo na magsusumite ng rekomendasyon para maisaayos ang problema sa RFID sa lungsod. Inimbitahan din ng kumpanya si Gatchalian sa isang structured observation at bibisita sa toll plazas sa NLEX kasama ang mga TRB representatives.