Terminal 4 ng NAIA, balik-operasyon na — MIAA

ni Lolet Abania | March 28, 2022

Binuksan na ulit ang Terminal 4 ng Ninoy Aquino International Airport (NAIA) matapos ang halos dalawang taon na isinara ito sanhi ng pandemya ng COVID-19 ngayong Lunes, ayon sa Manila International Airport Authority (MIAA).

Dahil sa limitado ang mga flights noong mga nakaraang taon kasabay ng pagpapatupad ng mga travel restrictions, ipinatigil naman ang operasyon ng Terminal 4 ng NAIA.

Subalit nang lumuwag ang mga restriksyon habang isinailalim na rin sa Alert Level 1 ang National Capital Region (NCR), muling nag-operate ang naturang terminal, kung saan napuno ito ng mga biyahero ngayong araw.

“’Yung T3 (Terminal 3) po ay napupuno dahil lahat ng mga domestic flight ay nanggagaling dito bago natin isinarado, ay inilipat natin sa T3,” pahayag ng general manager ng MIAA na si Ed Monreal.

Gayunman, kahit na isinara ang Terminal 4 sa mga flights operation, nagamit naman ito bilang COVID-19 vaccination site.

99 bagong immigration officers, itinalaga sa NAIA

ni Lolet Abania | September 3, 2021

Nagtalaga ang Bureau of Immigration (BI) ng 99 bagong immigration officers sa Ninoy Aquino International Airport (NAIA) kaugnay ng layunin ng ahensiyang dagdagan ang kanilang manpower para sa pangunahing gateway ng bansa.

Ayon kay BI Port Operations Division Chief Carlos Capulong ngayong Biyernes, ang mga bagong deploy na empleyado ay nagsimula nang mag-report sa trabaho sa tatlong terminal ng NAIA noong nakaraang linggo.

Kada linggo, ang mga immigration inspectors ay magpapalitan ng kanilang shift assignments na aniya, “So that they can experience the challenges and grasp the enormity of their roles and responsibilities as border control officers of our country.

“We believe that as more and more Filipinos are vaccinated, this pandemic will soon be a thing of the past and there will be an influx of international travelers into our country. Thus, this early we are already preparing and bracing for this eventuality,” sabi pa ni Capulong.

Paalala naman ni BI Commissioner Jaime Morente sa mga bagong empleyado na bukod sa trabahong pigilan ang pagpasok ng mga undesirable aliens, kailangan din nilang tingnan kung may mga mahihirap na Pilipinong posibleng nabibiktima ng human traffickers na nagre-recruit at tinatangkang ipadala sila abroad.

Ayon pa sa BI, ang mga bagong immigration officers ay dumaan at nakakumpleto ng kanilang three-month training para sa immigration laws, mga panuntunan at pamamaraan o patakaran bago ang kanilang deployment.

Sinabi ni Morente na isa pang batch ng immigration officers ang inaasahang magga-graduate bago matapos ang taon.

Higit 362K doses ng Pfizer, dumating na

ni Ronalyn Seminiano Reonico | August 26, 2021

Dumating na sa bansa ang 362,700 doses ng Pfizer COVID-19 vaccine noong Miyerkules.

Lumapag sa Ninoy Aquino International Airport (NAIA) Terminal 3 ang Air Hongkong flight LD456 lulan ang mga naturang bakuna.

Ayon sa National Task Force Against COVID-19, ang 50,310 doses ng Pfizer ay dumating sa Cebu City bandang alas-5 nang hapon at 50,310 doses din ang nakatakdang dalhin sa Davao City ngayong Huwebes.

Ang iba pang Pfizer vaccines ay dinala naman sa PharmaServ Express cold-chain storage facility sa Marikina City, ayon sa NTF.

Ayon naman kay Assistant Secretary Wilben Mayor, head ng National Task Force Against Covid-19 (NTF) sub-task force, ang mga bakuna ay dadalhin sa mga lugar na nakakapagtala ng pagtaas ng kaso ng Coronavirus.

Aniya pa, "Though meron na tayo ngayong tinatawag na from the spot, nagkakaroon agad ng inoculation. Dinadala na agad doon sa area and pagdating doon, ini-inject na kaagad.

"But, again, we leave it to the Vaccine Cluster to decide on whether to which particular area that they will distribute or allocate this Pfizer vaccine."