Sa botong 265... Cong. Barzaga, sibak

ni Jeff Tumbado @News | June 3, 2026

Photo: Kiko Barzaga - FB

Pinatawan ng expulsion ng Kamara si Cavite 4th District Rep. Kiko Barzaga matapos aprubahan ng House of Representatives ang rekomendasyon ng House Committee on Ethics sa botong 265 pabor, 14 tutol, at 8 abstentions.

Nag-ugat ang desisyon sa mga alegasyon ng disorderly behavior at conduct unbecoming of a member of the House of Representatives laban sa kongresista.

Isinagawa ang botohan sa plenaryo bilang pagsunod sa rekomendasyon ng House Committee on Ethics matapos ang kanilang imbestigasyon sa naturang usapin.

P600M donasyon ng 'Pinas sa WHO, talupan — Imee

ni Mylene Alfonso @News | June 3, 2026

Photo: Sen. Imee Marcos / FB

Nais paimbestigahan ni Sen. Imee Marcos ang umano’y $10 milyong donasyong ipinangako ng Pilipinas sa World Health Organization sa pamamagitan ng Department of Health.

Ito ay makaraang maghain ng Senate Resolution No. 418 si Marcos.

“‘Yang $10 million katumbas 600 milyong piso. Mas mahalaga ba ngayon na ilaan sa WHO ang ganyan kalaking halaga kaysa sa mga ospital at health facilities dito na diretsong pinakikinabangan ng mga Pilipino?” ayon sa senador.

Giit pa niya, nananatiling mabigat ang suliranin ng bansa sa sistemang pangkalusugan, kabilang na rito ang bilyun-bilyong utang ng PhilHealth sa DOH hospitals, habang umabot na rin sa P18.49 trilyon ang kabuuang utang ng bansa.

Binigyang-diin niya ang pangangailangang busisiin kung ang naturang donasyon ay legal, maayos, at napapanahon.

Patay sa gumuhong hotel, 20 na

ni Jeff Tumbado @News | June 3, 2026

Photo: Ang isa sa mga labi na narekober ng mga rescuer mula sa debris ng gumuhong gusali habang inililipat sa ambulansya sa patuloy na mano-manong search, rescue and retrieval efforts sa iba pang nawawala. (Jeff Tumbado)  

Pumalo na sa 20 ang mga naitalang nasawi mula sa pagguho ng isang 9-storey concrete building sa Balibago, Angeles City, Pampanga, ngayong Martes, Hunyo 2.  

Ayon sa Angeles City LGU, ang ika-18 at 19 na mga bangkay ay nakuha mula sa mga guho ala-1:17 ng hapon habang ang ika-20 ay ala-1:19 ng hapon. 

Tiniyak ng LGU na agad isinagawa ng City Health Office ang tamang proseso ng retrieval, tagging, at Disaster Victim Identification (DVI) sa narekober na mga bangkay. 

Nagpapatuloy ang search, rescue, at retrieval ng mga awtoridad kasabay ang clearing operations, sa pangunguna ng Unified Command.