Oklahoma at Kansas, nasa state of emergency dahil sa wildfire

by Jenny Rose Albason @Overseas News | February 20, 2026

Photo: The Weather Channel / weathercom

Maraming residente ng Tyrone, Texas County, Oklahoma ang inatasang lumikas dahil sa mabilis na pagkalat ng wildfire, na nagdulot ng malawakang pinsala sa mga lupaing sakop ng Oklahoma at Kansas. Ang Tyrone ay nasa ilalim ng Level 3 evacuation order (“GO NOW”).

Ayon sa Oklahoma Forestry Services at Department of Emergency Management, ang pinakamalaking sunog, na tinatawag na Ranger Road Fire, ay umabot na sa humigit-kumulang 145,000 acres, habang ang iba pang apoy sa Texas County ay nasunog din ng libu-libong ektarya. Ang malakas na hangin at tuyong kondisyon ng panahon ang nagpahirap sa mga bumbero, at iniulat na ilan sa kanila ang nasugatan habang tinutugis ang apoy.

Nagtulung-tulong ang mga bumbero mula sa iba’t ibang estado upang kontrolin ang sunog. Nagdeklara rin ng state of emergency ang gobernador ng Oklahoma para sa mga apektadong county, kabilang ang Beaver, Texas, at Woodward, upang ma-mobilize ang karagdagang resources at tulong pederal.

Libu-libong residente ang nailikas at patuloy ang efforts ng mga otoridad upang mapigilan ang pagkalat ng apoy at matulungan ang mga apektadong komunidad.

Libreng kuryente para sa mga low-consumption households, isinusulong ni Rep. Marcos

by Lester Bautista @Business | February 18, 2026

Photo: Sandro Marcos / FP

Panukalang libreng kuryente

Isinusulong ni House Majority Leader at Ilocos Norte 1st District Rep. Sandro Marcos na gawing libre ang kuryente sa mga pamilyang may mababang konsumo ng kuryente.

Layon ng House Bill No. 2700 o ang "Free Electricity for Low-Consumption Households Act" na buwagin ang kasalukuyang cross-subsidy system, at palitan ito ng direct government subsidy para gawing mas abot-kaya ang kuryente sa buong bansa.

Sa ilalim ng panukala ni Rep. Marcos, kabilang sa eligible households ang mga residential consumer na ang average na buwanang pagkonsumo ay hindi hihigit sa 135 kilowatt-hours (kwh) sa nakalipas na tatlong buwan, o mayroong monthly bill na hindi hihigit sa P2,000.

US nagre-ready vs. Iran

by Jenny Rose Albason @World News | February 16, 2026

Photo: Donald J. Trump - FB

Naghahanda ang militar ng Estados Unidos para sa posibilidad ng tuluy-tuloy at ilang linggong operasyon laban sa Iran kung mag-uutos si US President Donald Trump na atakihin ang bansa. 

Ayon sa kanila, mas malawak at mas seryoso ang plano kumpara sa mga naunang military retaliation ng Amerika.

Nakasaad na nakatakdang makipagpulong sina Steve Witkoff at Jared Kushner, kinatawan ng Amerika, sa mga kinatawan ng Iran sa Geneva sa Martes, sa tulong ng Oman bilang tagapamagitan para talakayin ang kasunduang pangkapayapaan. Sinabi naman ni US Secretary of State Marco Rubio na mas nais ni Trump ang kasunduan sa Tehran, ngunit aminadong mahirap itong makamit.

Kasabay nito, patuloy ang pagdami ng puwersang militar ng US sa rehiyon. Kinumpirma ng Pentagon ang pagpapadala ng karagdagang aircraft carrier, libu-libong tropa, fighter aircraft, at guided-missile destroyers sa Middle East.

Sa isang talumpati sa North Carolina, binanggit ni Trump ang posibilidad ng “regime change” sa Iran, bagama’t hindi tinukoy kung sino ang nais niyang pumalit. Ayon sa White House spokesperson na si Anna Kelly, “all options on the table with regard to Iran,” at si Trump ang magpapasya base sa interes ng Amerika. Tumanggi namang magkomento ang Pentagon sa detalye ng operasyon.

Noong nakaraang taon, nagsagawa ang US ng limitadong pag-atake sa mga nuclear site ng Iran, kabilang ang “Midnight Hammer” na gumamit ng stealth bombers. Gumanti ang Iran sa pamamagitan ng limitadong strike sa isang base ng US sa Qatar. Ayon sa mga opisyal, mas kumplikado ang planong operasyon ngayon, at posibleng targetin hindi lamang ang nuclear facilities kundi pati ang mga pasilidad ng estado at seguridad ng bansa.

Babala ng mga eksperto, mataas ang panganib sa mga puwersa ng US dahil sa arsenal ng missile ng Iran. Posible rin na ang serye ng gantihan ay magpalawak sa tensyon ng gera sa buong rehiyon. Matatag ang Islamic Revolutionary Guard Corps ng Iran at sinabi nitong maaari silang gumanti laban sa alinmang base militar ng US sakaling atakihin ang kanilang teritoryo.

May mga base militar ang US sa Jordan, Kuwait, Saudi Arabia, Qatar, Bahrain, United Arab Emirates, at Turkey. Sa gitna ng tumitinding tensyon, sinabi ni Israeli Prime Minister Benjamin Netanyahu na anumang kasunduan sa Iran ay dapat maglaman ng elementong makikinabang sa Israel. Ipinahayag naman ng Iran na handa silang talakayin ang limitasyon sa nuclear program kapalit ng pag-alis ng mga sanksyon ng Amerika, ngunit tumangging isama sa negosasyon ang kanilang missile program.