US, pinalikas ang mga tauhan sa Haiti sa gitna ng kaguluhan

ni Angela Fernando - Trainee @News | March 11, 2024

Mabilis na umaksyon ang United States at pinalikas ang mga non-essential embassy staff sa Haiti sa gitna ng patuloy na kaguluhan.

Pinatibay na rin ng US ang seguridad sa Port-au-Prince na kilalang kapitolyo ng bansa.

Ito ay matapos ang mga pag-atake ng gangs sa mga paliparan at kulungan.

Nais ng mga gangs na alisin sa puwesto ang Haitian Prime Minister na si Ariel Henry.

Samantala, kinumpirma ng US Embassy na ang US State Department ang nagdesisyon ng pagpapalikas sa kanilang mga tauhan sa tumitinding kaguluhan sa nasabing bansa.

Matatandaang hindi pa nakabalik sa kanyang bansa si Henry dahil sa mga pag-atake ng gangs kaya nanatili ito sa Puerto Rico.

Nakipag-ugnayan naman si US Sec of State Antony Blinken, pangulo ng Kenya, para tumulong sa Haiti at maibalik ang dating kapayapaan dito.

Inilikas na rin ng Germany at European Union Missions ang mga diplomatic staff nila mula sa tumitinding kaguluhan.

$1.3 M ginto, ninakaw sa Italy

ni Eli San Miguel - Trainee @News | March 11, 2024

Ninakaw ang halos 50 piraso ng ginto na likhang sining ng Italian sculptor na si Umberto Mastroianni, mula sa isang eksibisyon malapit sa Lake Garda, Italy.

Sinabi ng isang tagapagsalita para sa Vittoriale degli Italiani noong Sabado na 49 na likhang sining na nagkakahalaga ng €1.2 milyon (higit sa $1.3 milyong USD) ang ninakaw.

Natagpuan ang isa sa mga obra na tinatawag na "Uomo/Donna" (Lalaki/Babae), sa loob ng mga exhibition grounds, ngunit nananatiling nawawala ang iba pang 48 piraso.

Sa kasalukuyan, patuloy ang mga imbestigasyon tungkol sa pagnanakaw.

5 patay sa ‘airdrop aid’ sa Gaza

ni Eli San Miguel - Trainee @News | March 9, 2024

Namatay ang hindi bababa sa limang tao at nasugatan ang 10 iba pa nang mahulog sa kanila ang mga 'airdrop aids' sa kampo ng Al Shati sa kanluran ng Gaza City.

Sinabi ni Khader Al Zaanoun sa CNN na nasaksihan niya ang mga aid package na bumabagsak mula sa mga sasakyang panghimpapawid sa kampo ng Al Shati noong Biyernes, ngunit hindi niya matiyak kung aling bansa ang nasa likod ng airdrop.

Kinumpirma ni Muhammad Al-Sheikh, Head of Emergency Care Department sa Al Shifa Medical Complex sa Gaza City, na limang tao ang namatay sa insidente.

Ayon kay Al-Sheikh, ilan sa mga nasugatan sa insidente at nailipat sa Al Shifa at nasa malubhang kalagayan.

Patuloy namang nagpapadala sa Gaza ng mga ‘airdrop aids’ ang United States at iba pang mga bansa.