Cargo ship, inatake ng mga pirata, 23 bihag

ni Eli San Miguel - Trainee @News | March 13, 2024

Inatake ng mga pirata ang isang malaking cargo ship mula sa Bangladesh, malapit sa baybayin ng Somalia.

Binihag ng mga pirata ang 23 crew members ng barkong MV Abdullah.

May dala ang barko ng 55,000 toneladang uling mula sa kabisera ng Mozambique na Maputo, patungo sa United Arab Emirates nang atakihin ito noong Martes.

Kinumpirma ng maritime security firm na Ambrey na isang grupo ng armadong tao ang kumuha ng kontrol sa barko.

Nangyari ang pag-atake sa Indian Ocean, na 1,111km sa silangan ng kabisera ng Somalia na Mogadishu, ayon sa Ambrey.

Pinayuhan ng United Kingdom Maritime Trade Operations (UKMTO) ang iba pang mga sasakyang pandagat sa lugar na maging maingat at sinabi nilang iniimbestigahan nila ang pangyayari.

Nikotina, hindi dapat tuligsain

ni Chit Luna @Brand Zone | March 13, 2024

Kinikilala ng mga medikal na propesyonal at mga dalubhasa sa pampublikong kalusugan ang nagbabagong pananaw sa nikotina kasabay ng paglipat ng mga naninigarilyo sa mga makabagong produktong walang usok tulad ng vape, heated tobacco at nicotine pouch.

Ang mga kalahok sa isang panel discussion sa nakaraang Global Forum on Nicotine ay sumang-ayon na ang nikotina ay kinikilala na ngayon sa mas malawak na gamit nito.

Dapat na anilang itigil ang pagsisi sa nikotina bilang sanhi ng mga sakit na nauugnay sa tabako.

Sinabi ni Dr. Garrett McGovern, isang dalubhasa sa addiction medicine na ang nikotina ay tila sinisisi at itinuturing bilang scapegoat ng iilan.

Ayon kay Dr. McGovern, ang popularidad ng e-cigarette kaysa sa sigarilyo ay nagpabago ng interes ng publiko sa epekto ng nikotina.

Aniya, walang malawakang diskusyon tungkol sa nikotina at epekto nito sa utak bago ipinakilala sa merkado ang e-cigarette o vape. "It's time to liberate nicotine and explore its potential benefits," sabi ni Dr. McGovern.

Pinasinungalingan naman ni Mark Oates, direktor ng We Vape at Snus Users Association, ang maling akala ng publiko na ang nikotina mismo ay nagdudulot ng mga sakit na nauugnay sa paninigarilyo.

Sinabi naman ni Clive Bates, direktor ng Counterfactual Consulting Limited, na malaki ang magagawa ng tobacco harm reduction para matulungan ang 1.1 bilyong naninigarilyo sa buong mundo.

Walong milyong tao ang namamatay mula sa paninigarilyo taun-taon at daan-daang libong tao ang nagkakasakit. Ito ay maiiwasan kung ang mga naninigarilyo ay lilipat sa mga produkto na makakabawas ng pinsala, sabi ni Bates.

Ibinahagi ni Dr. Carolyn Beaumont mula sa Australian na ang kanyang karanasan sa pagreseta ng nikotina sa mga naninigarilyo na lumipat sa vaping. Ang kanyang pananaliksik ay nagsiwalat na higit sa kalahati ng kanyang mga pasyente na lumipat sa vaping ay mga lalaki na may edad 30 hanggang 50. Ito, aniya, ay nagpapahiwatig ng kanilang kagustuhan para sa mas ligtas na mga alternatibo.

Idiniin ni Dr. Alex Wodak, dating direktor ng Alcohol and Drug Service sa St. Vincent's Hospital sa Sydney, ang kahalagahan ng harm reduction para pigilan ang pagkamatay ng 8 milyon dahil sa paninigarilyo. Ang bilang na iyan ay katumbas ng populasyon ng Switzerland, dagdag niya.

Sinabi ni Dr. Wodak na ito ang dapat pagtuunan ng pansin at maging pangunahing layunin ng lahat.

Sinabi niya na habang ang mga tao ay naninigarilyo para sa nikotina, madami ang mamamatay kung patuloy na tututulan ang harm reduction.

Inilarawan ni Dr. Paul Newhouse, direktor ng Vanderbilt Center for Cognitive Medicine, ang nikotina bilang isang kumplikadong sangkap na may magkakaibang epekto sa utak.

Binanggit niya ang dalawahang katangian ng nikotina, kabilang ang pagbibigay ng libangan at potensyal na therapeutic na gamit nito.

Ayon kay Dr. Newhouse, maaaring walang gamit ang nikotina sa ibang tao, subalit para sa ilan, ito ay kapaki-pakinabang at mahalaga para sa kanila, “For a certain percent of the population, nicotine will be helpful… We have to acknowledge that for some folks and for some brains, nicotine has beneficial effects.”

Sinabi naman ni Oates na wala siyang nakitang katibayan ng alinmang lipunan na nagsimulang gumamit ng nikotina at biglang tumigil sa paggamit nito.

Ayon kay Oates, ang tanging nakita niya ay mga bansang tulad ng Sweden na lumipat sa mas ligtas na produktong nikotina kumpara sa sigarilyo. Ang Sweden ang may pinakamababang antas ng paninigarilyo sa buong mundo.

Sinabi ni Oates na dapat tanggapin ng mga awtoridad na ang tanging paraan para matulungan ang mas maraming naninigarilyo ay ang paglipat sa mas ligtas na produkto.

Eroplano bumagsak, 50 nadale

ni Angela Fernando - Trainee @News | March 11, 2024

Nasugatan ang hindi bababa sa 50 katao nang biglang bumagsak ang Boeing 787 na pinamamahalaan ng LATAM Airlines (LTM.SN) mula Sydney patungong Auckland nitong Lunes, ayon sa airline.

Nakaranas ang eroplano ng malakas na pagyanig na nagresulta sa 10 pasahero at tatlong kawani ng cabin crew na madala sa isang ospital, pagbabahagi ng South American carrier habang iniimbestigahan ang sanhi ng pangyayari.

Nag-land ang nasabing flight na may 263 pasahero at siyam na kawani ng cabin crew sa Auckland airport base sa oras ng takdang pagdating nu'ng Lunes ng hapon.

Isa ang nasa kritikal na kalagayan habang ang iba ay sugatan, saad ng tagapagsalita ng Hato Hone St John, na gumamot sa halos 50 katao sa paliparan.

Samantala, hindi agad natukoy ang dahilan ng tila biglaang pagbabago ng trajectory ng LATAM 800.

Sinasabi ng mga safety experts na karamihan sa mga aksidente sa eroplano ay sanhi ng pinaghalo-halong mga rason na kailangang aralin mabuti.