COVID-19 cases sa NCR, nasa peak na — DOH

ni Lolet Abania | January 24, 2022

Ipinahayag ng Department of Health (DOH) na umabot na sa peak o rurok ang bagong COVID-19 cases araw-araw sa National Capital Region (NCR) sa gitna ng pagbaba ng bilang ng impeksyon na nai-report nitong mga nakalipas na araw.

“Lumalabas nag-peak na at nakita natin ilang araw nang sunud-sunod na bumababa ang kaso ng NCR at lumiliit ang porsyenteng inaambag nito sa ating total case load,” ayon kay DOH Secretary Francisco Duque III sa Laging Handa briefing ngayong Lunes.

Nitong Linggo, nakapagtala ang bansa ng 29,828 bagong kaso ng COVID-19 cases, kung saan sinira nito ang record na mahigit 30,000 daily cases sa naunang tatlong araw.

Nang tanungin kung handa na ang NCR sakaling ang alert level ay ibaba na sa Alert Level 2 sa Pebrero, sabi ni Duque, “Oo, handa naman ang Metro Manila.”

Ayon kay Duque, ang alert level sa NCR ay maaaring i-downgrade sa Alert Level 2, kapag naabot na ang pamantayan na itinakda ng gobyerno.

Kabilang sa pamantayan aniya, kailangan na ang two-week growth rate ay nasa moderate risk at dapat na ang average daily attack rate ay nasa tinatayang isa hanggang pitong kaso bawat 100,000 populasyon. Habang ang healthcare utilization rate naman ay dapat nasa 49% at pababa.

“’Yan automatic, ‘yan, kapag maabot ‘yan, bababa tayo to Alert Level 2,” saad ni Duque.

Batay sa datos ng DOH ay lumabas na 48% ng ICU beds sa NCR ang okupado na habang 46% ng isolation beds naman ang nagamit.

Subalit, ayon kay Duque, kailangan pang talakayin ito ng Inter-Agency Task Force (IATF).

“Baka kailangan tingnan pa rin kung ang healthcare utilization rate ay nagkaroon na ng pagbabaklas o decoupling. Kumbaga tumaas ng kaso, ito raw ‘yung kwan natin, ‘yung mga severe, critical, nasa baba,” sabi pa ni Duque.

15 lugar sa NCR, nagtala na ng Omicron cases – DOH

ni Lolet Abania | January 18, 2022

Ipinahayag ng Department of Health (DOH) na 15 mga lugar sa Metro Manila ay mayroon nang mga kaso ng mas nakahahawang Omicron COVID-19 variant.

Gayunman, hindi binanggit ni DOH Epidemiology Bureau director Dr. Alethea de Guzman kung saan mga lugar ito.

“Our latest whole genome sequencing showed that the Omicron variant is now the predominant variant in the National Capital Region,” ani De Guzman sa isang congressional briefing.

“It’s also detected in 13 of 17 regions and in the National Capital Region, 15 of its 17 areas already have local Omicron cases,” sabi ng opisyal.

Ayon kay De Guzman, ang pagtaas ng COVID-19 cases ay dulot ng highly transmissible na Omicron variant.

Subalit aniya, ang pagdami ng mga lumalabas habang nabawasan ang pagsunod ng mga indibidwal sa minimum public health standards, gayundin ang pagkaantala ng pag-detect at isolation ng mga kaso, ay nakadagdag sa pagtaas ng mga naiimpeksyon sa virus.

Una nang sinabi ni DOH Undersecretary Maria Rosario Vergeire nitong weekend, na ang community transmission ng Omicron variant ay nakikita na nila sa NCR.

Binanggit pa ni Vergeire, nakitaan din ng DOH ng kaparehong sitwasyon sa Metro Manila sa ibang mga rehiyon gaya ng Region IV-A, Region II, CAR, Region VI, VII, at V.

Ayon naman kay DOH Secretary Francisco Duque III na ang Omicron variant ay nakapag-record na ng 90% sa latest genome sequencing.

Giniit din ni Duque na ang Pilipinas ay nananatiling nasa critical risk sa COVID-19, kahit pa ang growth rate ng infections ay bumagal na.

19.7 degrees Celsius, pinakamababang temperatura naitala sa NCR – PAGASA

ni Lolet Abania | January 16, 2022

Naitala ang pinakamababang temperatura sa Metro Manila ngayong Amihan season ng 19.7 degrees Celsius, pahayag ng Philippine Atmospheric, Geophysical and Astronomical Services Administration (PAGASA) ngayong Linggo.

Ayon sa PAGASA, alas-5:30 ng umaga, naiulat ang malamig na temperatura sa PAGASA Science Garden station sa Quezon City.

Ang top 10 stations na nakapag-record ng lowest temperature sa bansa ngayong Linggo ng umaga ay ang mga sumusunod:

• Baguio City, Benguet - 11.0°C

• Tanay, Rizal - 18.0°C

• Casiguran, Aurora - 18.6°C

• Laoag City, Ilocos Norte - 18.6°C

• Malaybalay, Bukidnon - 19.0°C

• Basco, Batanes - 19.1°C

• San Jose, Occidental Mindoro - 19.1°C

• Sinait, Ilocos Sur - 19.5°C

• Science Garden, Quezon City - 19.7°C

• Abucay, Bataan - 19.8°C

Sinabi naman ng PAGASA na ang lowest temperature na naitala sa Metro Manila ay 14.5 degrees Celsius na nai-record noong Enero 11, 1914.

Matatandaang naideklara noong Oktubre 26, 2021, ang onset ng Amihan season, kung saan nararanasan sa buong silangang bahagi ng Pilipinas.

Noong Disyembre 31, 2021, nai-record naman ang pinakamalamig na temperatura sa nasabing panahon sa Benguet province ng 7.7 degrees Celsius.