Metro Manila mayors inirekomenda na ibaba na sa Alert Level 1 ang NCR simula March 1 — Olivarez

ni Jasmin Joy Evangelista | February 23, 2022

Napagkasunduan na ng Metro Manila mayors na irekomenda ang pagbaba sa Alert Level 1 ng NCR simula March 1, 2022, ayon kay Metro Manila Council chairperson Parañaque City Mayor Edwin Olivarez.

“Downgrade to Alert Level 1 starting March 1,” ayon kay Parañaque City Mayor Edwin Olivarez sa text message sa mga miyembro ng media nang tanungin hinggil sa rekomendasyon ng council matapos ang ginanap na pagpupulong nitong Martes ng gabi.

Sa ilalim ng Alert Level 1, ang intrazonal at interzonal travel ay papayagan para sa lahat. Lahat ng establisimyento, indibidwal , o mga aktibidad, ay pinapayagang mag-operate, magtrabaho, at magsagawa ng full on-site venue/seating capacity basta sumusunod sa minimum public health standards.

Sa isang panayam nitong Martes, sinabi ni Metropolitan Manila Development Authority (MMDA) officer-in-charge at general manager Romando Artes na ang mga local government units (LGUs) sa NCR ay handa nang mag-shift sa Alert Level 1.

Matagumpay din umanong naipatupad ng NCR ang mga COVID-19 response programs.

Nito ring Martes, sinabi ng independent monitoring group na OCTA Research na bumaba na ng 4.9% ang positivity rate sa NCR, mas mababa sa recommended 5% ng World Health Organization.

Ayon sa OCTA, ito ang unang pagkakataon na bumaba sa 5% ang positivity rate sa NCR simula December 26, 2021.

Nanatili rin ang NCR sa "low risk" classification for COVID-19 na may average daily attack rate (ADAR) na 2.85 at may reproduction number na 2.85.

NCR, Alert Level 2 pa rin hanggang Peb. 28 – Malacañang

ni Lolet Abania | February 14, 2022

Mananatili ang National Capital Region (NCR) sa ilalim ng Alert Level 2 hanggang Pebrero 28, 2022, ayon sa Malacañang ngayong Lunes.

Sa inilabas na anunsiyo, sinabi ni acting presidential spokesperson Karlo Nograles na ang mga lugar na isasailalim sa Alert Level 3 ay Iloilo City, Iloilo province, Guimaras, Zamboanga City, Davao de Oro, Davao Occidental, South Cotabato.

Ginawa ng Malacañang ang pahayag, matapos na ang Metro Manila Council (MMC), na binubuo ng 17 alkalde sa NCR, ay napagkasunduan na i-extend sa ilalim ng Alert Level 2 ang rehiyon hanggang sa katapusan ng Pebrero.

Sa ilalim ng Alert Level 2, ang ikalawa sa pinakamababang bagong alert level system ng bansa, ang mga partikular na establisimyento at mga aktibidad ay pinapayagan na sa 50% capacity indoors para sa fully vaccinated adults (at minors, kahit hindi pa nabakunahan), at 70% capacity outdoors.

Sa ilalim naman ng Alert Level 3, maraming establisimyento ang pinapayagan na mag-operate ng 30% indoor venue capacity subalit para lamang sa fully vaccinated individuals, at 50% outdoor venue capacity habang ang mga empleyado ay dapat fully vaccinated na.

Ang in-person classes, contact sports, fun fairs, perya, at casinos ay ilan sa mga aktibidad at establisimyento na ipinagbabawal na mag-operate sa ilalim ng Alert Level 3.

Ang iba pang lugar na isasailalim sa Alert Level 2 mula Pebrero 16 hanggang 28 ay ang mga sumusunod:

Sa Luzon:

• Abra, Apayao, Baguio City, Benguet, Ifugao, Kalinga at Mountain Province sa Cordillera Administrative Region;

• Dagupan City, Ilocos Norte, Ilocos Sur, La Union at Pangasinan sa Region I;

• Batanes, City of Santiago, Cagayan, Isabela, Nueva Vizcaya at Quirino sa Region II;

• Bulacan, Angeles City, Aurora, Bataan, Nueva Ecija, Olongapo City, Pampanga, Tarlac at Zambales sa Region III;

• Cavite, Rizal, Batangas, Laguna, Lucena City at Quezon Province sa Region IV-A;

• Marinduque, Occidental Mindoro, Oriental Mindoro, Palawan, Puerto Princesa City at Romblon sa Region IV-B;

• Albay, Camarines Norte, Camarines Sur, Catanduanes, Masbate, Naga City at Sorsogon sa Region V.

Sa Visayas:

• Aklan, Antique, Bacolod City, Capiz at Negros Occidental sa Region VI;

• Cebu City, Lapu-Lapu City, Mandaue City, Bohol, Cebu, Negros Oriental at Siquijor sa Region VII;

• Ormoc City, Tacloban City, Eastern Samar, Leyte, Northern Samar, Western Samar, Biliran at Southern Leyte sa Region VIII.

Sa Mindanao:

• City of Isabela, Zamboanga del Sur, Zamboanga del Norte at Zamboanga Sibugay sa Region IX;

• Bukidnon, Cagayan de Oro City, Camiguin, Iligan City, Lanao del Norte, Misamis Occidental at Misamis Oriental sa Region X;

• Davao City, Davao del Sur, Davao del Norte at Davao Oriental sa Region XI;

• General Santos City, North Cotabato, Sarangani at Sultan Kudarat sa Region XII;

• Surigao del Norte, Surigao del Sur, Agusan del Norte, Agusan del Sur, Butuan City at Dinagat Islands sa Region XIII (CARAGA);

• Basilan, Maguindanao, Sulu, Tawi-Tawi, Cotabato City at Lanao del Sur sa Bangsamoro Autonomous Region sa Muslim Mindanao.

F2F classes, tuloy na uli sa NCR

ni Lolet Abania | February 9, 2022

Nagbalik na sa kanilang mga classrooms ang ilang mga estudyante sa elementary at high school sa Metro Manila ngayong Miyerkules, habang ang mga paaralan ay nagpatuloy na rin sa kanilang in-person classes sa ilalim ng Alert Level 2.

Kasabay ng pagre-resume ng klase ay ang pagsisimula naman ng “expansion phase” ng in-person classes sa National Capital Region (NCR) sa ilalim ng mga paaralan na pinayagang magsagawa na rin ng face-to-face sessions.

Una nang ipinahayag ng Department of Education (DepEd) na ang 28 eskuwelahan na nakiisa sa “pilot phase” ay maaari nang ipagpatuloy ang kanilang in-person classes. Hindi naman agad masabi ng ahensiya kung ilang paaralan ang muling magbubukas sa ilalim ng expansion phase.

Sa ulat, sinalubong ng Disiplina Village Bignay Elementary School (DVBES) sa Valenzuela City ang kanilang mga estudyanteng papasok ulit, kung saan nasimulan na ng paaralan ang pilot face-to-face classes. Ipinagpatuloy na ng paaralan ang kanilang F2F classes matapos na ang National Capital Region (NCR) ay isailalim sa Alert Level 2 mula Pebrero 1 hanggang 15.

Naghanda ang DVBES ng maraming classrooms para sa mga estudyante ng Kinder at Grades 1 hanggang 3. Nasa tinatayang 16 na estudyante kada year level, ang pinapayagang mag-participate sa pilot face-to-face classes.

Ayon sa mga guro ng naturang paaralan, plano na rin nilang i-resume ang F2F classes para sa mga estudyante ng Grades 4 hanggang 6. Samantala, isa sa mga eskuwelahan na nagsimula na ulit ng kanilang in-person classes sa ilalim ng expansion phase ay ang Pio del Pilar Elementary School sa Manila, kung saan ang mga estudyante at mga guro ay makikitang labis ang excitement sa kanilang pagbabalik, matapos ang halos 2 taon ng tinatawag na remote learning dahil sa pandemya.

Tiniyak naman ni Principal Susan Ramos ng Pio del Pilar Elementary School, na handa ang paaralan para i-isolate ang sinuman na magkakasakit o makararanas ng COVID-19 symptoms.

“’Pag may symptoms ang bata, ipapa-test namin siya. I-isolate kaagad siya. Mayroon kaming clinic,” sabi ni Ramos. Ayon sa DepEd, ang expansion phase ay ikalawa mula sa three-part plan ng ahensiya para sa gradwal na pagbubukas muli ng basic education schools sa gitna ng pandemya ng COVID-19.