DITO Telecom, start na sa Cebu at Davao

ni Mary Gutierrez Almirañez | March 8, 2021

Nagsimula na ng operasyon ang DITO Telecommunity Corporation bilang pangatlong telecommunication provider sa bansa ngayong araw, Marso 8.

Ayon kay Chief Administrative Officer Adel Tamano, labinglimang bayan pa lamang sa Metro Cebu at Metro Davao ang nasasakop ng kanilang serbisyo, habang sa Metro Manila naman ay ilang linggo pa umano ang kailangang hintayin bago sila makapagbigay-serbisyo.

Aniya, "The answer that we will tell you is we will be here in NCR in a few weeks. Medyo maghintay-hintay lang, Dito will be in NCR very soon."

Kaugnay nito, sinimulan na rin nila ang pagbebenta sa mga SIM cards na may prefixes digits na 0991, 0992, 0993, 0994, 0898, 089, 0896, at 0895.

Pagbubukas ng mga sinehan at video arcades, pinalagan ng NCR mayors

ni Ronalyn Seminiano Reonico | February 13, 2021

Nabahala ang mga mayor ng National Capital Region (NCR) at nais nilang umapela sa pamahalaan kaugnay ng muling pagbubukas ng mga traditional cinemas sa mga lugar na nasa ilalim ng general community quarantine (GCQ), ayon kay Metro Manila Council Chairman and Parañaque City Mayor Edwin Olivarez.

Aniya, "Magkakaroon kami ng reservation. Baka mag-appeal kami sa Inter-Agency Task Force for the Management of Emerging Infectious Diseases (IATF) sa pagbubukas ng mga sinehan.

"In fact, kausap ko mismo si [Metropolitan Manila Development Authority] Chairman [Benhur] Abalos at ipaparating sa IATF ang aming reservation o manifestation regarding dito sa objection sa pagbubukas ng sinehan.

"Hindi po nagkaroon ng proper consultation tungkol sa specifics ng sinehan. Alam naman po natin na ang sinehan, enclosed po 'yan at mahigit isang oras ang gathering sa loob na air-conditioned."

Inanunsiyo ni Presidential Spokesperson Harry Roque kahapon, Biyernes, na simula sa February 15 ay maaari nang magbalik-operasyon ang mga traditional cinemas sa mga GCQ areas, ayon sa IATF.

Pinayagan na rin ang operasyon ng mga driving schools; video at interactive game arcades; libraries, archives, museums at cultural centers; meetings, incentives conferences at exhibitions; limited social events; accredited establishments ng Department of Tourism; at tourist attractions katulad ng mga parke, theme parks, natural sites at historical landmarks.

Nilinaw naman ni Olivarez na sang-ayon ang mga mayor sa desisyon ng IATF na itaas sa 50% ang venue capacity ng mga religious gatherings.

Aniya, "Sang-ayon lahat ng Metro Manila mayors na payagan ang 50% capacity sa mga religious gatherings, provided na 'yung minimum health protocols ipatutupad din po iyan.

"Nakikita naman po natin na open air naman ang ating mga simbahan so 'yun pong contamination, mako-control po 'yun."

Samantala, bukod sa pagbubukas ng mga traditional cinemas, tutol din umano ang mga mayor sa pag-apruba ng IATF sa mga video and interactive game arcades.

Pahayag ni Olivarez, "Isa po naming apprehension, kasi halos dikit-dikit 'yan at saka enclosure. Hindi pa pinapayagan ang mga bata para po lumabas.”

Aniya pa, "Kapag may mga enclosure, d'yan kami may apprehension, 'yung mga fully air-conditioned talaga, based sa consultation sa mga experts.

“'Yung mga open themed parks, halos wala kaming apprehension. Doon lamang sa mga may enclosure.”

116K health workers, unang sasampulan ng COVID-19 vaccine

ni Lolet Abania | February 5, 2021

Tinatayang nasa 116,000 health workers ng National Capital Region (NCR) ang sumailalim na sa pre-registration para makatanggap ng COVID-19 vaccine, ayon sa Department of Health (DOH).

Ayon kay Dr. Razel Nikka Hao, Deputy of COVID-19 Surveillance and Quick Action Unit, ang 116,000 health workers ay kabilang sa inisyal na listahan pa lamang habang nagpapatuloy ang registration para sa coronavirus vaccine.

“At this point, we are in the process of master listing for group A1 or all of the workers in frontline health care services. Since January this year, we have reached out health care facilities and local governments, to determine sino magpi-fit sa mga criteria, sino itong mga eligible... We are getting the numbers which will guide our operational plans,” ani Hao sa isang online briefing ngayong Biyernes.

Sa ilalim ng COVID-19 vaccination program ng gobyerno, ang mga empleyado na nasa frontline health services ang una sa priority list na mabakunahan.

Gayunman, dahil limitado ang supply ng COVID-19 vaccine, kinokonsidera nilang bawasan ang mga nasa listahan base sa kaso ng COVID-19 sa lugar, ang kapasidad ng isang local government unit (LGU) na magkaroon nito at kayang ipamahaging vaccines, maging ang exposure at peligro sa dami ng namamatay na mga indibidwal.

Batay sa records ng pamahalaan, ang NCR ay nananatiling epicenter ng COVID-19 pandemic sa bansa kung saan may 4,602 bagong coronavirus cases na naitala sa loob lamang nitong dalawang linggo.

Sinabi naman ni Manila Vice-Mayor Honey Lacuña na tinatayang 80,000 residente ng Maynila ang nakapagpa-pre-register na para sa COVID-19 vaccination program ng lungsod.

“Iyong non-Manila residents po na naka-dorm (sa Manila) kasi frontliners, we suggest na iyong gamitin nilang residential address ay iyong kanilang place of work,” ani Lacuña.