Mula Nob. 1-14... Alert Level 3 pa rin NCR, 10 lugar — Malacañang

ni Lolet Abania | October 29, 2021

Pinalawig pa ng gobyerno sa Alert Level 3 classification ang National Capital Region (NCR) ng hanggang unang dalawang linggo ng Nobyembre, ayon sa Malacañang ngayong Biyernes.

Sa isang press briefing, sinabi ni Presidential Spokesperson Harry Roque na ang NCR at 10 iba pang lugar ay isasailalim sa Alert Level 3 mula Nobyembre 1 hanggang 14, 2021.

Bukod sa NCR, nasa Alert Level 3 din ang Baguio City (isinama bilang isang lugar para sa special monitoring), Bataan, Cavite, Laguna, Rizal, Iloilo City, Siquijor, Lanao del Norte, Davao City, Davao del Norte.

“Inuunti-unti natin ang pagbaba ng alert system para hindi sumipa ang COVID-19 cases,” paliwanag ni Roque kung bakit ang NCR ay mananatili sa ilalim ng Alert Level 3.

Sa ilalim ng Alert Level 3, maraming establisimyento, kabilang na ang mga restaurants, gyms, cinemas at movie houses ang papayagan nang mag-operate ng 30% indoor venue capacity na para lamang sa mga indibidwal na fully vaccinated at 50% outdoor venue capacity, subalit lahat ng mga empleyado ay fully vaccinated na.

Gayunman, ayon kay Roque, inaprubahan na ngayon ng pamahalaan na madagdagan ang operational capacity para sa pampublikong transportasyon ng hanggang 70% simula sa Nobyembre 4.

“The DOTr (Department of Transportation) will issue a memo on this,” sabi Roque. Sa pareho ring briefing, inianunsiyo naman ni Roque na ang Aurora, Bacolod City, Negros Oriental at Davao Occidental ay isasailalim sa Alert Level 4.

Samantala, ang mga lugar na isasailalim sa Alert Level 2 ay ang mga sumusunod:

• Angeles City

• Bulacan

• Nueva Ecija

• Olongapo City

• Pampanga

• Tarlac

• Batangas

• Quezon

• Lucena City

• Aklan

• Antique

• Capiz

• Guimaras

• Iloilo

• Negros Occidental

• Bohol

• Cebu City

• Lapu-Lapu City

• Mandaue City

• Cebu

• Bukidnon

• Cagayan de Oro City

• Camiguin

• Iligan City

• Misamis Occidental

• Misamis Oriental

• Davao de Oro

• Davao del Sur

• Davao Oriental

Dahil sa patuloy na oil price hike… Presyo ng karneng baboy sa NCR, posibleng tumaas

ni Jasmin Joy Evangelista | October 29, 2021

Nagbabala ang Samahang Industriya ng Agrikultura na posibleng tumaas ang presyo ng karneng baboy sa NCR dahil sa sunod-sunod na oil price hike.

"Sa tingin ko, tataas pa 'yan. This coming week baka another P20. So, P40 itong buwan na ito," ani Samahang Industriya ng Agrikultura president Rosendo So sa isang panayam.

Ayon pa sa grupo, malaking tulong hindi lang sa mga magbababoy, magsasaka, at mangingisda kundi maging mga sa mga consumer at food transporters kung tatanggalin ang taripa para bumaba ang presyo ng petrolyo.

Matatandaang pinirmahan ni Pangulong Rodrigo Duterte noong Mayo 2020 ang Executive Order 113 kung saan tinaasan ng 10 porsiyento ang taripa ng mga produktong petrolyo.

Nitong mga nagdaang linggo ay naging sunod-sunod ang oil price hike kaya’t umaaray ang lahat ng apektado nito.

Kasabay ng pagluwag ng restrictions… Daloy ng trapiko sa NCR, bumigat

ni Jasmin Joy Evangelista | October 18, 2021

Muling bumigat ang daloy ng trapiko sa mga kalsada sa National Capital Region, ayon sa Metropolitan Manila Development Authority (MMDA).

Ito ay matapos ang pagluluwag ng mga panuntunan kontra COVID-19.

Ayon kay MMDA Chairman Benhur Abalos, nararamdaman ang pagbigat ng trapiko sa Kamaynilaan lalo kapag peak hours.

Gayunman, mananatili umanong suspendido ang coding sa mga sasakyan, maliban sa Makati City, dahil hindi pa rin normal ang operasyon ng mga pampublikong sasakyan.

Unti-unti na ring bumabalik ang mga mamimili sa mga mall sa Metro Manila.

Kasabay nito, dagsa rin ang mga tao sa pagbubukas ng dolomite beach sa Manila Baywalk.

Nagpaalala naman ang OCTA Research Group na hindi dapat magpakakampante ang publiko dahil bagaman mataas na ang vaccination rate sa Metro Manila ay hindi pa tapos ang pandemya.