Bagong quarantine classifications sa iba't ibang lugar, aprub na kay P-Du30

ni Ronalyn Seminiano Reonico | June 29, 2021

Inaprubahan na ni Pangulong Rodrigo Duterte ang rekomendasyon ng Inter-Agency Task Force on emerging infectious diseases (IATF-EID) na quarantine classifications sa iba’t ibang bahagi ng bansa ngayong darating na buwan ng Hulyo.

Inirekomenda ng IATF na isailalim ang NCR Plus na binubuo ng Metro Manila, Bulacan, Cavite, Laguna at Rizal sa general community quarantine (GCQ) “with restrictions” hanggang sa July 15.

Ayon kay Presidential Spokesperson Harry Roque, inaprubahan na ni P-Duterte na ipatupad ang GCQ “with some restrictions” sa Metro Manila, Rizal, at Bulacan habang GCQ “with heightened restrictions” naman sa Laguna at Cavite.

Papairalin naman ang modified enhanced community quarantine (MECQ) sa Cagayan, Apayao, Bataan, Lucena City, Puerto Princesa, Naga City, Iloilo City, Iloilo, Negros Oriental, Zamboanga Del Sur, Zamboanga Del Norte, Cagayan De Oro City, Davao City, Davao Oriental, Davao Occidental, Davao De Oro, Davao Del Sur, Davao Del Norte, Butuan City, Dinagat Islands, at Surigao Del Sur.

Isasailalim din sa GCQ ang Baguio City, Ifugao, City of Santiago, Isabela, Nueva Vizcaya, Quirino, Batangas, Quezon, Guimaras, Aklan, Bacolod City, Negros Occidental, Antique, Capiz, Zamboanga Sibugay, City of Zamboanga, Iligan City, General Santos City, Sultan Kudarat, Sarangani, Cotabato, South Cotabato, Agusan del Norte, Surigao del Norte, Agusan del Sur, at Cotabato City.

Modified GCQ naman ang paiiralin sa iba pang bahagi ng bansa.

NCR Plus, GCQ “with restrictions” pa rin — P-Du30

ni Ronalyn Seminiano Reonico | June 15, 2021

Mananatili sa ilalim ng general community quarantine (GCQ) na may restriksiyon ang NCR Plus na binubuo ng Metro Manila, Bulacan, Cavite, Laguna, at Rizal hanggang sa katapusan ng Hunyo, ayon kay Pangulong Rodrigo Duterte noong Lunes.

Saad ng pangulo, ang Metro Manila at Bulacan ay isasailalim sa GCQ "with some restrictions" habang ang Rizal, Laguna at Cavite naman ay GCQ "with heightened restrictions."

Isasailalim naman sa modified enhanced community quarantine (MECQ) ang ilang lugar sa bansa mula sa June 16 hanggang 30.

Ang mga sumusunod na lugar ay isasailalim sa MECQ mula sa June 16 hanggang 30, ayon kay P-Duterte: Santiago City at Cagayan sa Region 2; Apayao at Ifugao sa Cordillera Administrative Region; Bataan sa Region 3; Lucena City sa Region 4-A; Puerto Princesa City sa Region 4-B; Naga City sa Region 5; Iloilo City at Iloilo sa Region 6; Negros Oriental sa Region 7; Zamboanga City, Zamboanga Sibugay, Zamboanga Del Sur, at Zamboanga Del Norte sa Region 9; Cagayan De oro City sa Region 10; Davao City sa Region 11; at Butuan City, Agusan Del Sur, Dinagat Islands, at Surigao del Sur sa CARAGA.

Ang mga sumusunod na lugar naman ay isasailalim sa GCQ: Baguio City, Kalinga, Mountain Province, Abra, at Benguet sa Cordillera Administrative Region; Isabela, Nueva Vizcaya, at Quirino sa Region 2; Batangas at Quezon sa Region 4-A; Iligan City sa Region 10; Davao Del Norte sa Region 11; General Santos City, Sultan Kudarat, Sarangani, Cotabato, at South Cotabato sa Region 12; at Lanao Del Sur, at Cotabato City sa Bangsamoro Autonomous Region in Muslim Mindanao (BARMM).

Ang iba pang lugar sa bansa ay isasailalim naman sa modified GCQ, ayon kay P-Duterte.

Samantala, pinalawig din ang travel restrictions na ipinapatupad sa mga pasahero na manggagaling sa India, Pakistan, Bangladesh, Sri Lanka, Nepal, United Arab Emirates at Oman hanggang sa katapusan ng Hunyo.

Pagluluwag ng restriksiyon, pinalagan ng mga doktor

ni Ronalyn Seminiano Reonico | June 14, 2021

Nanawagan ang ilang grupo ng mga doktor sa pamahalaan na ‘wag munang luwagan ang quarantine restriction sa Metro Manila dahil puno na umano ang mga intensive care units (ICUs).

Makabubuting panatilihin ang pagsasailalim ng NCR Plus sa general community quarantine (GCQ) “with restrictions,” ayon kay Dr. Maricar Limpin, president ng Philippine College of Physicians.

Aniya sa isang teleradyo interview, "Sa ngayon, although mas kaunti siya kumpara sa mga kaso nu’ng March o April, medyo madami-dami pa rin po ang mga pasyente nating nakikita lalo na sa ICU... Medyo marami kaming nakikitang severe to critical. We would expect ito po ay magtutuloy pa.

"Kailangan sigurong maghinay-hinay muna tayo, 'wag munang luwagan ang quarantine measure kasi mas mahirap pong bumalik sa total lockdown."

Nanawagan din si Limpin sa pamahalaan na tulungan ang mga probinsiya sa laban kontra-COVID-19.

Aniya pa, "Ang kanilang ICU capacity, napupuno na rin ho. Sila po ay humihingi na ng tulong sa ‘min.”

Samantala, noong Linggo, nakapagtala ang bansa ng 7,302 karagdagang kaso ng COVID-19, at sa kabuuang bilang ay umabot na ito sa 1,315,639 cases kung saan 59,865 ang aktibong kaso at 22,788 ang mga pumanaw.