NBI, itinuro... Barilan sa loob ng Senado

ni Mylene Alfonso @News | May 14, 2026

Photo: File

Umalingawngaw ang mga putok ng baril sa Senado sa gitna ng patuloy na lockdown, Miyerkules ng gabi.

Alas-7:48 ng gabi nang marinig ang mga putok ng baril kung saan nasa loob pa rin ng gusali si Senador Ronald “Bato” dela Rosa na nasa ilalim ng protective custody. 

Nadinig ang mga putok ng baril mula sa ikalawang palapag ng gusali ng Senado. 

Hindi pa malinaw kung saan at sino ang nagpaputok ng baril.

Una rito, dumating sa Senado ang mga tauhan ng militar, pulisya, at National Bureau of Investigation (NBI).

Armado rin at naka-full battle gear ang mga sundalo na nagbabantay sa Senado, kasama ang mga tauhan ng Office of the Sergeant-At-Arms ng kapulungan.

Sa Facebook live naman ni Senate President Alan Cayetano, sinabi niya na darating si Interior and Local Government Secretary Jonvic Remulla para i-secure ang Senado at ang mga tao at hindi rin nila umano iiwan si Dela Rosa.

“Kung sino ang nakikinig from the government, this is the Senate of the Philippines, we are allegedly under attack," diin ni Cayetano.

Itinuturo ng OSAA na NBI agents umano ang unang nagpaputok sa Senado at nagpaputok lamang pabalik ang OSSA, ayon kay Sen. Jinggoy Estrada. 

Itinanggi ng NBI na sangkot ang kanilang tauhan sa nasabing insidente.

Ayon naman kay Senate Secretary General Mark Mendoza, walang nasaktan sa putukan sa Senado.

15 huli sa akto sa scam hub

ni Gina Pleñago @News | May 14, 2026

Photo: NBI

Arestado ang 15 katao kabilang ang dalawang dayuhan, ng mga operatiba ng National Bureau of Investigation (NBI) sa pagsalakay sa isang condominium unit na nagsisilbing scam hub sa Mandaluyong City.

Isinailalim na sa inquest proceedings sa Mandaluyong City Prosecutor’s Office ang 12 lalaki at isang babaeng Pilipino, isang Chinese national at isang Malaysian national sa paglabag sa Section 6 ng Republic Act 10175 (Cybercrime Prevention Act of 2012).

Base sa ulat, naaktuhan ng mga operatiba ng NBI-Dangerous Drugs Division sa pagpapatupad ng isang Warrant to Search, Seize, and Examine Computer Data, kasama ang NBI-Digital Forensic Laboratory Division at ng Philippine Air Force Intelligence Unit ang mga suspek na nagtatrabaho sa harap ng mga desktop computer.

Ang pagsalakay ay nag-ugat sa intelligence report kaugnay sa scamming network na pinamumunuan ng isang alyas Boss Choi.

Nadiskubre na gumamit ng isang pekeng website ang grupo upang akitin ang mga biktima sa mga mapanlinlang na cryptocurrency investment scheme.

Nakumpiska ang maraming computer device at agad na isinailalim sa on-site digital forensic examination na tumukoy sa pagkakaroon ng isang organisadong operasyon ng scam na nakikibahagi sa mga aktibidad ng pandaraya sa online investment.

Mabanta ng Peanut Gallery Media Network, arestado sa extortion... P350M kapalit ng flood scam video ni Romualdez

ni Gina Pleñago / Jeff Tumbado @News | May 7, 2026

Photo: Franco Mabanta - FB / NBI

Sa entrapment operation ng National Bureau of Investigation (NBI), nadakip ang social media personality na si Franco Mabanta at apat na kasabwat umano sa pangingikil kay dating House Speaker at kasalukuyang Leyte 1st District Rep. Martin Romualdez.

Kabilang din sa inaresto ang mga opisyal ng Peanut Gallery Media Network (PGMN) na sina Ericson James D. Pacaba, John Alexander Vasquez Gomez, Jardine Christian Requio Serrano at Franco Jose Gallardo na isasailalim sa inquest proceedings sa paglabag sa reklamong Robbery (Extortion), kaugnay sa Republic Act 10175 (Cybercrime Prevention Act of 2012).

Ayon kay NBI Director Melvin Matibag, inaresto si Mabanta at mga kasama batay sa reklamo na nangingikil kay Romualdez kapalit ng hindi paglalabas ng video na may kaugnayan sa flood control scam.

Si Mabanta na president at CEO ng PGMN ay inaresto sa kanyang unit sa Pasig City, Martes ng gabi (Mayo 5).

Batay kay Atty. Palmer Mallari, mahabang oras ang inabot ng operasyon dahil tumanggi si Mabanta na makipagkita para sa ibibigay na P75M bilang paunang bayad sa hinihinging P300M.

Araw ng Martes, alas 5:30 ng hapon, idineliber ang marked money sa Manila Peninsula Hotel sa Makati City, at inutusan sila na dalhin sa isang alyas Jimmy sa Valle Verde Country Club sa Pasig City.

Tinanggap ang entrapment money nina Serrano at Gallardo, at sa unit ni Mabanta naman, kung saan dinala ang pera, ay naroon sina Pacama at Gomez, na inabutan ng mga operatiba.

Ayon sa NBI, nagsimula noong isang taon pa ang umano’y pamba-blackmail kay Romualdez na unang demand ay P350 milyon subalit hindi pinatulan.

Muling tinawagan umano nitong nakalipas na dalawang linggo si Romualdez na nagkasundo na ibaba sa P300M, sa apat na tranche o P75 milyon sa bawat paghahatid ng pera.

Nagbigay umano ng deadline si Mabanta na kung hindi magbibigay ay ilalabas ang unang bahagi ng video sa petsang Mayo 5, kaya isinagawa na ang entrapment sa naturang petsa.

Samantala, sa pahayag ng PGMN, iginiit nilang inosente sila at biktima lamang umano ng isang “setup”. Anila, sa nakalipas na limang buwan, nagsagawa sila ng imbestigasyon hinggil sa umano’y malawakang korupsiyon na kinasasangkutan ni Romualdez.

Ayon pa sa PGMN, “devastating” o lubhang mabigat ang kanilang mga natuklasan, at nakahanda na umano ang isang 90-minutong exposé na naglalaman ng matitibay na ebidensya.