Nangongolekta ng protection money sa mga sabungan... 2 pekeng NBI agent, timbog

by Benjamin Chavez @News | September 15, 2026

Photo: File / NBI

Arestado ang dalawang lalaki na umano’y nagpapanggap na mga ahente ng National Bureau of Investigation (NBI) matapos salakayin kamakalawa ng NBI-NCR ang isang ilegal na sabungan sa Taytay, Rizal.

Naabutan umano ang dalawa, na hindi muna pinangalanan, sa loob ng cockpit arena na may mga pekeng NBI ID at tactical badge, habang nakuha rin sa isa sa kanila ang isang baril na may magazine at limang bala na wala umanong kaukulang lisensya at permit.

Ayon sa NBI, isinagawa ang operasyon matapos makatanggap ng impormasyon hinggil sa umano’y pangingikil ng grupo sa mga sabungan kapalit ng protection money.

Lumabas din sa imbestigasyon na nagpapanggap umano ang mga suspek bilang kinatawan ng BIR upang maningil ng pera, at may kaparehong modus na umabot sa Batangas at Laguna.

Nahaharap sila sa mga kasong Usurpation of Authority, Robbery Extortion at paglabag sa batas hinggil sa firearms and ammunition.

Ibinebenta online... Droga sa delivery ng pagkain, buking

ni Gina Plenago @News | September 13, 2026

Photo: File / NBI

Apektado ang apat na Chinese, isang babae at tatlong lalaki sa isang condominium unit sa Parañaque.

Sa paghalughog sa apat na kuwarto ng unit, natagpuan ang mga high-grade marijuana na kush at shabu, ganoon din ang mga drug paraphernalia.

Sa isang panayam kay National Bureau of Investigation Director Melvin Matibag, iba't ibang klase ng droga ang ipinapadeliber ng mga dayuhan na itinatago sa mga delivery ng pagkain at mga online order. 

Ayon kay Atty. Matibag, ginagamit ang cyberspace para umorder ng iba't ibang klase ng iilegal drugs.

Gumagamit ng pekeng dokumento ng DSWD... Babaeng investment scammer sa Facebook, timbog

ni Gina Plenago @News | September 12, 2026

Photo: NBI

Natimbog ang isang investment scammer sa entrapment operation ng National Bureau of Investigation (NBI) kasunod ng reklamong ginagamit ang isang pekeng Notice of Award (NoA) ng Department of Social Welfare and Development (DSWD), iniulat nitong Biyernes.

Batay sa NBI-Special Action Unit (SAU), ang suspek na si alyas Yhang ay nahuli sa loob ng isang tanggapan ng gobyerno sa Zen Tower Building, sa Ermita, Maynila, nang tumanggap ng entrapment money mula sa mga undercover agent na nagpanggap na mga interesadong investor.  

Ang operasyon ay nagsimula matapos ang isang sumbong mula sa mamamayan kaugnay sa isang NoA na ginagamit ng suspek upang ilegal na makalikom ng mga high-yield investment mula sa publiko.

Sa beripikasyon, naglabas ng sertipikasyon ang DSWD-National Capital Region (NCR) na peke ang NoA at walang rekord sa kanilang procurement.

Modus ng suspek gamit ang Facebook group na manghikayat ng investor na may 10% balik o kita sa Welfare Employees Multipurpose Cooperative (WEMC).

Nakakuha umano ng malalaking kontrata mula sa DSWD-NCR ang kooperatiba at ang NoA ay nakapangalan sa kanya.

Nahuli ang suspek nang makipagkita sa undercover agent.

Mahaharap ang suspek sa reklamong Falsification by Private Individuals sa ilalim ng Article 172 ng Revised Penal Code, na may kaugnayan sa Section 6 ng Republic Act No. 10175 (Cybercrime Prevention Act of 2012).

Nagbabala muli si NBI Director Atty. Melvin Matibag sa publiko sa mga kahina-hinalang high-yield investment na iniaalok sa social media.

Pinayuhan niya ang mga mamamayan na direktang i-verify sa mga kaukulang ahensya ang anumang claim na may kaugnayan sa transaksyon o solicitation ng gobyerno.