Heavy favorite ang Celtics, Doncic at Irving 'di papayag

ni Anthony E. Servinio @Sports | June 7, 2024

Laro ngayong Biyernes – TD Garden

8:30 AM Dallas vs. Boston

Papasok na mabigat na paborito ang Boston Celtics laban sa bisitang Dallas Mavericks sa Game One ng 2024 NBA Finals best-of-seven ngayong araw sa TD Garden simula 8:30 ng umaga. Hahanapin ng Boston ang ika-18 kampeonato sa kanilang mayamang kasaysayan at una mula pa ang huli noong 2008. 

Nakatutok ang pansin sa mga tambalang bituin Jayson Tatum at Jaylen Brown ng Celtics at Luka Doncic at Kyrie Irving ng Mavs. Sa apat, tanging si Irving lang ang may kampeonato noong 2016 para sa Cleveland Cavaliers.

Nakapaglaro rin si Irving sa Celtics mula 2017 hanggang 2019 kung saan nagsilbi siyang kuya sa mga noon ay mga baguhang sina Tatum at Brown. Ngayon, ang hindi niya naihatid na tropeo sa Boston ay dadalhin sa Dallas na ang nag-iisang kampeonato ay natamasa noong 2011 kung saan manlalaro pa nila ang kasalukuyang Coach Jason Kidd. 

Napipisil na mabubura ng mga superstar ang bawat isa.  Malaki ang ambag na puntos ngayong playoffs nina Tatum (26.0) at Brown (25.0) at Doncic (28.8) at Irving (22.8) kaya lilipat ang laban sa pagalingan ng iba pang kakampi. 

Mahalaga na umangat para sa Celtics sina Derrick White, Jrue Holiday at ang babalik na galing sa lampas isang buwan na pilay na si Kristaps Porzingis. Kokontrahin ito nina PJ Washington, Derrick Jones Jr. at Daniel Gafford. 

Ngayong playoffs, 6-2 ang kartada ng Celtics sa kanilang tahanan patungo sa pagbura sa Miami Heat, Cleveland Cavaliers at Indiana Pacers. Ang Mavs ay 7-2 kapag sila ang bisita, malaking dahilan kaya ginulat nila ang mga mas mataas na kalaro LA Clippers, Oklahoma City Thunder at Minnesota Timberwolves. 

Ang Game 2 ay nakatakda sa Lunes sa Boston pa rin. Lilipat ang serye sa American Airlines Center sa Dallas para sa Game 3 sa Hunyo 13 at Game Four sa 15.  

Mavs champ sa West Finals, Boston Celtics haharapin

ni Anthony E. Servinio @Sports | June 1, 2024

Ang Dallas Mavericks nang magkampeon kahapon sa NBA Western Conference final. ( Photo: nbapix )

Laro sa Hunyo 7 – TD Garden

8:30 AM Dallas vs. Boston 

Nanigurado na ang Dallas Mavericks at tinambakan ang Minnesota Timberwolves, 124-103, at koronahan ang sarili bilang 2024 NBA Western Conference Champion kahapon sa Target Center. Tinapos ng bisitang Mavs ang seryeng best-of-five, 4-1, kung saan tatlo sa panalo ay sa tahanan ng paboritong Timberwolves. 

Tumira ng three-points si Luka Doncic makalipas ang unang minuto ng laro upang kunin ng Dallas ang 5-4 lamang at hindi na nila isinuko ito.  Unang quarter pa lang ay nagtayo ng 35-19 bentahe ang Mavs at 20 dito ay kay Luka lang na higit sa kabuuan ng kalaban. 

Lumobo ito hanggang sa 82-46 sa kalagitnaan ng third quarter sa shoot ni Doncic. Parehong nagtapos na may tig-36 sina Doncic at Kyrie Irving at humakot din si Luka ng 10 rebound. 

Nanguna sa Minnesota sina Anthony Edwards at Karl Anthony Towns na parehong may 28. Kinapos sila ng tulong at walang kakampi ang nakaabot ng 10 puntos. 

Ito na ang ikatlong beses na lalaro sa NBA Finals ang Dallas. Una silang nakapasok noong 2006 subalit binigo ng Miami Heat, 4-2, pero nakaganti sa parehong kalaro at iskor noong 2011 para sa nag-iisang tropeo ng prangkisa. 

Nauna nang umabante sa Finals ang Boston Celtics na winalis ang Indiana Pacers sa East Finals, 4-0. Hahanapin ng Celtics ang kanilang ika-18 kampeonato at ang huli ay natamasa nila noong 2008 laban sa malupit na karibal Los Angeles Lakers. 

Ang Game 1 ng NBA Finals ay sa Hunyo 7 sa TD Garden kung saan gaganapin din ang Game 2 (Hunyo 10) at kung kailangan ang Game Five (18) at Seven (24). Ang American Airlines Center ang lugar ng Game 3  (13) at 4 (15) at kung kailangan Game 6 (21). 

Towns ng T'wolves, nakaalpas sa pandudurog ng Mavericks

ni Anthony E. Servinio @Sports | May 30, 2024

Photo: Minnesota Timberwolves

Laro sa Biyernes – Target Center

8:30 a.m. Dallas vs. Minnesota 

Buhay na buhay pa rin ang kampanya ng Minnesota!  Ginulat ng bisitang Timberwolves ang namumurong Dallas Mavericks, 105-100, sa Game 4 ng 2024 NBA Western Conference Finals kahapon sa American Airlines Center at maiwasang mawalis sa seryeng best-of-seven. 

Sinamahan ni Anthony Edwards ng gawa ang kanyang pananalita at muntikan na magtala ng triple double na 29 puntos, 10 rebound at siyam na assist. Tinulungan siya ni Karl Anthony Towns na may 10 ng kanyang 25 sa huling quarter habang may 14 at 7 assist si Mike Conley. 

Nasayang ang triple double ni Luka Doncic na 28 puntos, 15 rebound at 10 assist. Nalimitahan si Kyrie Irving sa 16 puntos lang at malaking bagay din ang pagliban ni sentro Dereck Lively II na nagpapagaling ng tama sa leeg noong Game 3. 

Bumanat ng magkasunod na 3-points sina Towns at Edwards upang mahablot ang bentahe, 95-90, at hindi na nila ito binitawan sa nalalabing limang minuto. Tumira ng tres si Doncic bilang huling hirit ng Dallas, 100-103, subalit sinagot ito ng shoot ni Sixth Man of the Year Naz Reid para itakda ang huling iskor na may 11 segundo pa sa orasan. 

Uuwi na ang Timberwolves para sa Game 5 sa Biyernes sa Target Center. Nakuha ng Mavs ang Game 1 (108-105) at 2 (109-108) kaya bawal magkamali ang Minnesota at maglaro ng perpekto. 

Naghihintay sa magtatagumpay sa West ang Eastern Conference champion Boston Celtics na maagang tinapos ang Indiana Pacers, 4-0. Kahit anong mangyari sa West, ang 2024 NBA Finals ay magsisimula sa Hunyo 7 sa tahanan ng Celtics TD Garden.