Hield mandirigma ng Warriors, Fil-Am Ellis ng Kings nagpasikat

ni Anthony E. Servinio @Sports | Oct. 11, 2024

• 

Photo: Golden State Warriors / Official Page

Naitala ng bisitang Golden State Warriors ang kanilang pangalawang panalo ngayong NBA Preseason at tinalo ang Sacramento Kings, 122-112 sa Golden 1 Center kahapon.  Nagpasikat ang mga bagong-lipat na bituin subalit umagaw ng pansin ang rookie na si kabayan Boogie Ellis ng Kings.

Bumuhos ng 22 puntos sa 19 minuto para sa Warriors si Buddy Hield na galing Philadelphia 76ers. Naglaro lang sa unang half si Stephen Curry at nag-ambag ng 13 pero lamang ang Kings, 68-66.

Namuno sa kanyang unang laro bilang King si dating Chicago Bull DeMar DeRozan na may 15 sa unang half lahat. Sa pangatlong quarter ipinasok si Ellis at bumira agad ng dalawang three-points patungong 10 sa 16 minuto.

Si Ellis ay katatapos lang ng kanyang ika-lima at huling taon sa University of Southern California kung saan pinangunahan ang Trojans na may 16.5 puntos sa 29 laro bilang kapitan. Hindi siya napili sa NBA Draft noong Hulyo kumpara sa kakamping Bronny James na napunta sa Los Angeles Lakers matapos gumawa lang ng 4.8 puntos sa nag-iisang taon sa kolehiyo.

Dahil dito, nagbakasakali ang 6'3" guwardiya sa Sacramento kung saan bahagi ng coaching staff ang PBA at Gilas Pilipinas alamat Jimmy Alapag. Ang kanyang nanay Rowena ay Filipina.

Wagi ang Warriors sa kanilang unang laro noong Linggo kung saan dinaig nila ang LA Clippers, 91-90. Ipinasok ni Lindy Waters III ang tres sabay ng huling busina sa laro na ginanap sa Stan Sheriff Center ng Honolulu, Hawaii.

Samantala, napanood kung ano ang magagawa nina Victor Wembanyama at Chris Paul at binigo ng San Antonio Spurs ang Orlando Magic, 107-97. Hindi naglaro ng tambalan sa unang laro ng Spurs na 107-112 talo sa Oklahoma City Thunder noong Martes at bumawi sila ngayon na may ipinagsamang 16 puntos.

NBA: Gilas player Clarkson namayani kontra kabayan Green sa Preseason

ni Anthony E. Servinio @Sports | Oct. 9, 2024

• 

Photo: Utah Jazz

May plano ba na bawiin ni Gilas Pilipinas player Jordan Clarkson ang Sixth Man of the Year na napagwagian niya noong 2021? Naglaro muli siya bilang reserba sa 122-113 na panalo ng kanyang Utah Jazz laban kay kabayan Jalen Green ng Houston Rockets kahapon sa pagpapatuloy ng 2024 NBA Preseason sa Delta Center.

Nagbantayan ang dalawang bituin hanggang pangatlong quarter na nagwakas pabor sa Utah, 88-84. Hindi na sila ginamit sa huling quarter at pinaubaya ito sa mga rookie at mga beteranong nagbabakasakaling makakuha ang trabaho ngayong taon. 

Nanguna sa Jazz si All-Star Lauri Markkanen na may 17 puntos at sinundan ni Clarkson na may 14 sa loob ng 18 minuto lang. Nagtala si Green ng 21 para sa Rockets mula sa apat na tres sa 20 minuto. 

Perpekto pa rin ang Utah ngayong preseason kasama ang 116-87 tambakan sa New Zealand Breakers ng NBL-Australia noong Sabado habang ito ang unang sabak ng Houston. Parehong hindi nakapasok ang Jazz (31-51) at Rockets (41-41) sa playoffs noong nakaraang torneo.

Patuloy ang lakbay ng Breakers at ibinaon sila ng Philadelphia 76ers, 139-84. Apat na 76ers ang nagsumite ng tig-15 na sina Tyrese Maxey, Reggie Jackson, Jared McCain at Guerschon Yabusele na nakakuha ng kontrata matapos ang mahusay na inilaro para makuha ng Pransiya ang pilak sa Paris 2024 Olympics. 

Isa pang ginamit na daan ang Olympics papuntang NBA si gwardiya Yuki Kawamura ng Japan na nag-ambag ng anim sa 121-116 tagumpay ng Memphis Grizzlies sa kulang na Dallas Mavericks. Nanguna sa Memphis si Brandon Clarke na may 17 habang lumiban sa Mavs sina Luka Doncic, Kyrie Irving at ang bagong kakamping si Klay Thompson. 

1st game ng mag-amang James sa Lakers diniskaril ng Phoenix

ni Anthony E. Servinio @Sports | Oct. 8, 2024

• 

Binigo ng Phoenix Suns ang Los Angeles Lakers, 118-114, sa pagpapatuloy ng NBA Preseason sa Acrisure Arena sa Palm Desert, California kahapon. Maliban sa resulta, sumabay sa unang pagkakataon sa harcourt ang mag-amang LeBron James at Bronny James. 

Kasama si LBJ sa first five at sinamahan siya ng kanyang panganay sa pagsimula ng pangalawang quarter. Naglaro ng 16 minuto lang ang amang si James at gumawa ng 19 sa unang half at umupo sa buong pangalawang half kumpara sa anak na naglaro ng 13 minuto, 7 sa huling quarter, at walang ambag na puntos. 

Namuno sa panalo ng Suns si Josh Okogie na may 10 ng kanyang 15 sa huling quarter. May tig-12 sina Devin Booker, Oso Ighodaro at Collin Gillespie. Kumpara sa kanilang unang pagkikita noong Sabado na dikitan, tinambakan ng World Champion Boston Celtics ang Denver Nuggets, 130-104, sa Etihad Arena ng Abu Dhabi, United Arab Emirates.  Lamang lang ng anim ang Celtics sa halftime, 66-60 at lumayo noong pangatlong quarter, 109-75.

Hindi kinailangan ang mga bituin sa huling quarter subalit nanguna pa rin sina Jaylen Brown na may 21 at Jayson Tatum na may 17. Nagtala ng 20 para sa Denver si Nikola Jokic.  Napigil ng bisitang New York Knicks ang huling banta ng Charlotte Hornets, 111-109.  Bumida sa Knicks sina Miles McBride mula sa apat na tres. 

Sa iba pang mga laro, tinambakan ng Toronto Raptors ang Washington Wizards, 125-98, sa Bell Centre ng Montreal, Quebec. Binigo ng Detroit Pistons ang bisita Milwaukee Bucks, 120-87, sabay ng pagliban ni Giannis Antetokounmpo.