Knicks, Heat at Hornets, umangat at nagpatumba

ni Anthony E. Servinio @Sports | March 1, 2023

Pinatumba ng New York Knicks ang Boston Celtics, 109-94, sa tampok na laro sa NBA kahapon sa Madison Square Garden. Dahil dito, anim na sunod ang tagumpay ng Knicks at may bagong numero unong koponan sa liga na Milwaukee Bucks.

Nakasabay lang ang Celtics sa unang dalawang minuto at buhat doon ay dominado ng New York ang laro hanggang umabot ng 47-27 ang lamang sa 2nd quarter. Namuno sa Knicks sina All-Star Julius Randle at reserba Immanuel Quickley na parehong nagsumite ng 23 puntos.

Kahit mas marami ang panalo ng Boston (44-18), lamang ang Bucks (43-17) sa porsiyento ng panalo. Hahanapin ng Milwaukee ang kanilang ika-15 sunod na tagumpay sa laro ngayong araw sa pagdalaw sa Brooklyn Nets.

Lalong humigpit ang karera sa Eastern Conference at hinila pababa ng Miami Heat ang Philadelphia 76ers, 101-99. Naka-shoot si Jimmy Butler na may 1:28 sa orasan at ibalik ang abante sa Heat, 100-99.

Nahirapan makapuntos ang dalawang panig hanggang napasok ni Butler ang free throw na may walong segundong nalalabi subalit minintis niya ang pangalawa at nakuha ni Joel Embiid ang bola sabay tawag ng timeout. May pagkakataon ang 76ers pero hindi pumasok ang tres ni James Harden sabay ubos ng oras.

Bumida si Butler sa kanyang 23 puntos at 11 rebound. Umangat ang Miami sa 33-29 at ika-pito sa East habang bumaba sa 39-21 at nanatiling pangatlo.

Sa isa pang laro, nagtrabaho ng todo ang mainit Charlotte Hornets upang masugpo ang Detroit Pistons, 117-106, ang kanilang ika-limang sunod. Bumuhay sa Hornets si Terry Rozier na may 22 puntos sa gitna ng maagang pagkawala kay LaMelo Ball matapos mabalian ng bukong-bukong sa third quarter.

Bucks, ginapi ang Heat kahit napilay si Giannis

ni Anthony E. Servinio @Sports | February 26, 2023

Kumulekta ng isa pang panalo ang nagraragasang Milwaukee Bucks sa bisitang Miami Heat, 128-99, sa tampok na laro sa NBA kahapon sa Fiserv Forum. Tila may hatid na malas ang ika-13 sunod ng Bucks at napilayan muli sa All-Star Giannis Antetokounmpo sa tuhod.

Naglaro si Giannis na may pilay sa pulso at nadagdagan ito matapos bumangga ang kanyang tuhod sa tuhod ng isang Heat anim na minuto pa lang ang lumilipas sa laro. Lamang ang Bucks, 22-16, at nagpasya na huwag na siya bumalik at nagtrabaho ng husto ang mga kakampi.

Namuno si All-Star Jrue Holiday na may 24 puntos patungo sa kartadang 42-17 at pangalawa sa Eastern Conference. Tinakpan ni Bobby Portis ang nawalang numero ni Giannis at nag-ambag ng 18 puntos at 11 rebound bilang kanyang kapalit.

Nagpasikat ang isa pang All-Star Julius Randle at nagtala ng 46 puntos upang buhatin ang New York Knicks kontra sa Washington Wizards, 115-109. Pumukol din si Randle ng pitong tres upang makabawi sa kanyang malamyang laro noong Starry 3-Point Contest.

Patuloy ang pagpapatunay ni Trae Young na dapat ay isinama siya sa nakaraang All-Star at bumuhos ng 34 puntos sa 136-119 tagumpay sa Cleveland Cavaliers.

Pansamantalang ginabayan ang Hawks ni assistant coach Joe Prunty matapos masisante si Coach Nate McMillan bago ang All-Star.

Sa ibang laro, tinambakan ng Chicago Bulls ang Brooklyn Nets, 131-87, sa likod ng 32 puntos ni Zach LaVine. Pumulot din ng tagumpay ang Charlotte Hornets sa Minnesota Timberwolves, 121-113, salamat kay LaMelo Ball na gumawa ng 32 puntos at 10 rebound.

Tatum at Giannis, perpekto vs. Lebron sa All-Star game

ni Anthony E. Servinio @Sports | February 21, 2023

Tinapos ni Giannis Antetokounmpo sa tulong ni Jayson Tatum ang perpektong kartada ni LeBron James at nanaig ang Team Giannis sa Team LeBron, 184-175, sa NBA All-Star Game kahapon sa Vivint Arena. Si Tatum ang pinakamaliwanag sa lahat ng bituin at nagtala ng bagong marka na 55 puntos patungo sa Kobe Bryant Trophy para sa Kia All-Star Most Valuable Player.

Hawak ng Team Giannis ang 99-92 lamang sa simula sa third quarter at iyan ang hudyat para kay Tatum na magsabog ng 27 puntos na hinigitan ang dating marka na 21 sa isang quarter ni Stephen Curry noong 2022. Lumobo ang kanilang agwat sa 158-141 at fourth quarter ay naging unahan na makaabot ng 182 puntos.

Hindi pa tapos si Tatum at nagdagdag ng walong puntos para sa 181-170 iskor at wasakin ang dating marka na 52 ni Anthony Davis noong 2017. Pilit ipinasa ang bola kay Tatum para tuldukan ang laro pero napunta ang karangalan kay Damian Lillard na bumomba ng malayong tres para sa huling talaan.

Nagpasikat din si Donovan Mitchell sa kanyang 40 puntos habang 26 si Lillard. Nanguna sa Team LeBron sina Jaylen Brown na may 35 at Joel Embiid at Kyrie Irving na parehong nagtala ng 32 puntos.

Dahil pilay ang pulso, naglaro lang ng 20 segundo si Giannis at umupo agad matapos mag-dunk, 2-0. Mula roon ay pinanood niya ang mga kakampi na ihatid ang kanyang unang tagumpay bilang kapitan matapos mabigo kay LBJ noong 2019 at 2020.

Hindi rin tumagal si James at lumabas na may limang minuto pa sa second quarter dahil nasaktan ang kanang kamay. Gumawa lang ng 13 puntos si LBJ at tapos na ang kanyang limang panalo sa All-Star mula 2018 hanggang 2022.

Sa oras ng laro mismo nalaman kung sino ang mga magiging magkakampi matapos isa-isang tawagin ng mga kapitan ang mga napiling pangalan. Ang 2024 All-Star ay gaganapin sa Indianapolis, Indiana.