Warriors binawian ang Kings, Suns naka-2 na vs. Clippers

ni Anthony E. Servinio @Sports | April 22, 2023

Hindi basta isusuko ng World Champion Golden State Warriors ang kanilang korona at pinabagsak ang bisitang Sacramento Kings, 114-97, sa NBA Playoffs kahapon sa Chase Center. Wagi rin ang Phoenix Suns at tinalo ang LA Clippers, 129-124, para lumamang ng 2-1 sa kanilang seryeng best-of-seven.

Kontrolado ng Warriors ang buong laro at tuluyang humataw palayo sa 15 puntos ni Stephen Curry sa second quarter para sa 55-41 na halftime. Umabot ng 23 ang agwat sa fourth quarter, 114-91, at nakaiwas ang Golden State na malugmok sa 0-3.

Pumukol ng anim na tres si Curry patungo sa 36 puntos habang dumagdag ng 20 si Andrew Wiggins. Sisikapin ng Warriors na itabla ang serye sa Game Four sa Lunes sa parehong palaruan.

Nabawi ng bisitang Suns ang homecourt matapos mapahiya noong Game One. Binuo ni Devin Booker ang three-point play na may 42 segundo sa orasan para sa 125-116 lamang at kinailangan ng Phoenix ang apat na free throw ni Kevin Durant sa huling 11 segundo upang masigurado ang resulta.

Umusok para sa 45 puntos si Booker at sinundan ni Durant na may 28. Hindi naglaro sa Clippers si Kawhi Leonard at inaasahan na bubuti ang kanyang tuhod para sa Game 4 sa Martes.

Sa Eastern Conference, 3-0 na ang Philadelphia 76ers laban sa Brooklyn Nets matapos maitakas ang 102-97 tagumpay. Inagaw ni De’Anthony Melton ang pasa ni Royce O’Neale at naka-shoot para tuldukan ang laro na may 5.4 segundong nalalabi. Namuno sa Philadelphia si Tyrese Maxey na ipinasok ang 10 ng kanyang 25 puntos sa fourth quarter. Hahanapin na ng 76ers ang walis para sa Game Four sa Linggo.

Samantala, iginawad kay Malcolm Brogdon ng Boston Celtics ang 2023 KIA Sixth Man of the Year.

Lakers 'di pinaporma ang T'wolves, Suns, mainit pa rin

ni Anthony E. Servinio @Sports | April 2, 2023

Nagising ang bisitang Los Angeles Lakers sa third quarter at naitala ang maaaring pinakamahalagang panalo ngayong taon laban sa Minnesota Timberwolves, 123-111, sa NBA kahapon sa Target Center.

Wala pa ring talo ang Phoenix Suns basta nariyan si Kevin Durant at hinila pababa ang numero unong Western Conference Denver Nuggets, 100-93.

Lumamang ang Timberwolves sa 3-point play ni Karl Anthony Towns upang simulan ang third quarter, 68-55, at iyan na ang kanilang huling ingay. Mula roon ay uminit para sa 8 puntos si Anthony Davis upang pangunahan ang paghabol ng Lakers na umabante papasok sa 4th quarter, 90-83, at hindi na nila binitiwan ito.

Hindi pa tapos si Davis at nagdagdag ng 17 puntos sa 4th quarter upang magtapos na may 38 puntos at 17 rebound. Double-double din si LeBron James na 18 puntos at 10 rebound at ito ang unang pagkakataon na mas marami ang panalo sa talo ng Lakers na 39-38 at ika-7 sa West katabla ang nagpapahingang New Orleans Pelicans.

Lumapit ang Suns sa playoffs sa ika-42 panalo sa 77 laro matapos ipasok ni Durant ang pito ng kanyang 30 puntos sa 4th quarter. Nalagay sa peligro ang pagiging numero uno ng Nuggets (51-26) at lumiit ang lamang nila sa humahabol na Memphis Grizzlies (49-28).

Sa gitna ng namumurong huling hirit ng Lakers, nagtagumpay ang World Champion Golden State Warriors sa San Antonio Spurs, 130-115, matapos magpaulan ng pitong 3-points si Stephen Curry para sa 33 puntos. Pantay ang Warriors at LA Clippers sa 41-37 para sa ika-lima at ika-anim sa West.

Mitchell ng Cavaliers at Embiid ng 76ers, sakalam

ni Anthony E. Servinio @Sports | March 8, 2023

Naging mas matatag sa overtime ang Cleveland Cavaliers upang pabagsakin ang Boston Celtics, 118-114, sa NBA kahapon mula sa Rocket Mortgage FieldHouse. Kasabay nito ay lalong humigpit ang karera sa taas ng Eastern Conference matapos ang 147-143 panalo ng Philadelphia 76ers sa Indiana Pacers.

Ipinasok nina Donovan Mitchell at Lamar Stevens ng Cavs ang pitong sunod-sunod na puntos upang itayo ang 116-112 lamang at 1:47 sa orasan. Humirit ng shoot si Jaylen Brown upang saglit magbanta, 114-116, subalit walang kabang gumawa ng dalawang free throw si Darius Garland upang mapreserba ang panalo na may siyam na segundong nalalabi.

Nanguna sa Cavs si Mitchell na may 41 puntos at 11 rebound habang 25 puntos at 17 rebound si Evan Mobley. Umangat ang Cleveland sa 41-26 habang tatlong sunod na ang talo ng dating numero uno sa NBA Boston at bumaba sa 45-21.

Sinayang ng Celtics ang pagkakataon na tapusin agad ang laro pero nagmintis ng dalawang free throw si Grant Williams na may 0.8 segundo sa 4th quarter. Hindi naglaro si Jayson Tatum dahil may pasa sa tuhod kaya mag-isa si Brown at nagsumite ng 32 puntos at 13 rebound.

Umarangkada ang 76ers sa 132-121 lamang papasok sa huling anim na minuto at ito ay sumapat sa gitna ng tangkang paghabol ng Pacers. Nagtala ng 42 puntos si Joel Embiid at sumuporta si Tyrese Maxey sa kanyang 24 puntos para sa kanilang ika-42 panalo at lumapit sa Celtics at numero unong Milwaukee Bucks (46-18).

Pinalakas ng Denver Nuggets ang hawak sa liderato ng Western Conference sa 118-113 tagumpay sa Toronto Raptors. Bumawi ang Nuggets (46-19) sa last two minutes sa likod nina MVP Nikola Jokic at Jamal Murray at binura ang 111-105 abante ng Raptors (32-34).