Jokic ng Nuggets angat na vs. Butler ng Heat, 2-1

ni Anthony E. Servinio @Sports | June 9, 2023

Laro sa Sabado – Kaseya Center

8:30 a.m. Denver vs. Miami

Patuloy ang pamamayagpag ng bisitang Denver Nuggets at binigo ang Miami Heat, 109-94, sa Game 3 ng 2023 NBA Finals kahapon sa Kaseya Center. Umakyat ang Nuggets sa seryeng best-of-seven, 2-1, sa gitna ng hindi makakalimutang inilaro nina Nikola Jokic at Jamal Murray.

Si Jokic ang unang manlalaro na nagtala ng 32 puntos, 21 rebound at 10 assist sa Finals, isang marka na hindi naabot ng mga alamat na sentro ng liga. Triple double din si Jamal Murray na 34 puntos, 10 rebound at 10 assist upang bumawi sa mahinang ipinakita noong Game 2.

Mula sa gitgitan na first half na nakuha ng Denver, 53-48, kumilos ang Nuggets sa third quarter at tinambakan ang Heat sa likod ng 12 puntos ni Jokic at hindi inaasahang anim mula sa rookie Christian Braun. Hindi pa tapos si Braun at nagbagsak ng limang sunod na puntos upang ibigay sa Nuggets ang pinakamalaking 93-72 agwat at magtapos na may 15 puntos.

Nakakuha ng 28 puntos ang Miami mula kay Jimmy Butler at 22 puntos at 17 rebound kay Bam Adebayo. Malaking bagay ang nalimitahan si Gabe Vincent sa 7 puntos lang matapos magtala ng 19 at 23 sa unang dalawang laro ng serye.

Hahanapin na ng Denver ang 3-1 lamang sa Game 4 ngayong Sabado sa parehong palaruan. Mahalaga para sa Miami na ipagtanggol ang kanilang tahanan dahil hindi nila kakampi ang kasaysayan at 13 beses pa lang nakabangon ang isang koponan mula sa 1-3 at agawin ang serye.

Pagaganahin ni Butler ang opensa vs. Jokic

ni Anthony E. Servinio @Sports | June 5, 2023

Laro ngayong Lunes - Ball Arena

8:00 a.m. Miami vs. Denver

Manipis na hangin ang isang malaking magdidikta sa takbo ng 2023 NBA Finals. Nakita ito sa Game One noong Biyernes kung saan nagwagi ang Denver Nuggets sa bisitang Miami Heat, 104-93, subalit mahaba pa rin ang seryeng best-seven na magtutuloy ngayong araw sa Ball Arena para sa Game 2 simula 8:00 ng umaga.

Ang lungsod ng Denver ay mahigit 1,600 metro o isang milya ang taas mula sa dagat kaya ito nabansagang “Mile High City”. Bunga ng kakaibang klima, mas kaunti ang oxygen kaya mas mabilis mapagod kahit ang mga beterano ng Nuggets at lalo na sa kanilang mga naging bisita.

Sa huli, malaking suliranin para sa naghahabol na Heat ay kung paano pigilin si Nikola Jokic na sa tangkad na 6’11” ay taglay ang katangian ng isang point guard. Ang trabaho na bantayan siya ay nakasalalay kay 6’9” Bam Adebayo at hindi ginamit ni kabayan Coach Erik Spoelstra ang iba niyang beteranong malaki tulad nina 6’8” Kevin Love at 6’8” Udonis Haslem habang pitong minuto lang si 6’11” Cody Zeller.

Kakalimutan ni Jimmy Butler ang kanyang inilaro sa Game One at kailangan na mahanap muli ang kanyang opensa sabay ang matinding trabaho na bantayan si Jamal Murray at tumulong din kontra kay Jokic. Bumanat si Murray ng 18 ng kanyang 26 puntos sa first half at itulak ang Denver sa 59-42 lamang.

Samantala, kahit nasisante kamakailan ay nakahanap agad ng bagong trabaho ang mga coach na sina Nick Nurse sa Philadelphia 76ers at Monty Williams sa Detroit Pistons.

Ang hamon sa mga bagong coach ay tumagal gaya ng mga coach sa Finals. Si Coach Michael Malone ng Nuggets ay nasa kanyang ika-walong taon habang si Coach Spoelstra ng Heat ay 15 taon na sa koponan.

Buhay pa ang Celtics, nanalo, Melo retired, Lebron balak din

ni Anthony E. Servinio / MC @Sports | May 25, 2023

Nagawa pang buhayin ng Boston Celtics ang kanilang kontensiyon sa Eastern Conference finals nang magwagi sa 116-99 laban sa Miami Heat kahapon upang maampat ang series deficit sa 3-1.

Sumigla ang dugo ni Jayson Tatum sa Celtics sa bisa ng nagawa niyang 33 points, 11 rebounds at assists, habang ang ibang 5 players ay nagtala ng dobleng pigura sa tikas ni Joe Mazzulla.

Matapos ang 128-102 win ng Miami Heat noong Linggo, nahaharap na sana ang Celtics sa posibilidad na matigbak na rin sa 4-0 pero dahil nanaig sila kahapon ay pag-iibayuhin pa nila ang susunod na pressure sa Miami sa pagbabalik nila sa Boston.

At dahil wala pang team sa NBA history ang nagawang makabalikwas sa 3-0 na pagkaiwan at ipanalo ang best-of-seven playoff series, nagpatuloy ang Boston sa kanilang tiwala na kaya nilang makabangon at abutin ang Finals habang nakaabang na ang Denver Nuggets.

Samantala, nagbabalak-balak na rin si LeBron James na magretiro sa pagba-basketball matapos na mawalis ang matigpas ang Los Angeles Lakers sa NBA playoffs ng matikas na Denver Nuggets noong Martes.

Iniuliat ng ESPN na nag-iisip-isip na ang 38-anyos na si LBJ na lisanin na ang sport na sinarhan na ng pintuan matapos ang 20th season niya sa liga.

Sa isang hiwalay na tweet ni Chris Haynes, ang reporter ng TNT broadcaster na "under consideration" na aniya ang pagreretiro ni James.

Pero nauna rito, nagpahayag na rin si Carmelo Anthony, isa sa premier scorers sa kasaysayan ng NBA at three-time Olympic gold medalist ng opisyal na pagreretiro sa basketball.

Naging emosyonal ang anunsiyo na ito ni Anthony sa kanyang social media accounts, at aniya, "the time has come for me to say goodbye" sa laro matapos ang 19 seasons sa NBA.

"I'm excited about what the future holds for me," dagdag ng 38-anyos na si Anthony, na siyang third overall pick sa pamosong 2003 NBA Rookie Draft ng Denver Nuggets.