Olympic warm-up game: USA tinalo ang Canada

ni Anthony E. Servinio @Sports | July 12, 2024

Pasado na ang Team USA sa una nilang pampublikong laro laban sa Canada, 86-72, kahapon sa T-Mobile Arena sa Las Vegas. Ipinagpag ng mga Amerikano ang mabagal na simula para sa unang hakbang patungo sa layunin nilang makamit ang ika-limang sunod na ginto sa Paris Olympics sa katapusan ng buwan. 

Umarangkada ang Canada, 11-1 at inabot ng limang minuto bago naka-shoot ng three-points si Stephen Curry. Lamang pa rin ang Canada matapos ang unang quarter, 21-14, tampok ang pito ni Kelly Olynyk subalit kumilos na ang USA sa sumunod na quarter.  

Bumira ng anim si Anthony Edwards upang buksan ang pangalawang quarter at tuluyang natamasa ng mga Amerikano ang unang lamang, 25-23, sa buslo ni Devin Booker at hindi na nila binitiwan ito. Nagtapos ang halftime sa 41-33 at sa sobrang buwenas ay ipinasok ni Edwards ang tres kasabay ng busina ng third quarter, 69-54. 

Nanguna si Edwards na may 13, 12 si Curry, 11 si Jrue Holiday at double-double si Anthony Davis na 10 at 11 rebound. Gumawa ng 12 si RJ Barrett para sa Canada at sinundan nina Shai Gilgeous-Alexander at Dillon Brooks na may tig-10. 

Samantala, nagpasya si Kawhi Leonard at LA Clippers na mas mabuti na magpahinga na lang siya at tumutok sa paghahanda sa bagong NBA sa Oktubre. Agad inihayag ng USA Basketball na papalitan si Leonard ni Derrick White ng World Champion Boston Celtics. 

Sisikapin na nina White at Jayson Tatum na mapabilang sa maikling listahan ng mga nagwagi sa NBA at Olympics sa parehong taon habang ang kanilang kakampi sa Celtics Holiday ay nais sundan ang doble tagumpay noong 2021 noong siya ay nasa Milwaukee Bucks. Ang iba pang nasa listahan ay sina Michael Jordan (1992), Scottie Pippen (1992, 1996), Kyrie Irving (2016), LeBron James (2012) at Khris Middleton (2021). 

Heavy favorite ang Celtics, Doncic at Irving 'di papayag

ni Anthony E. Servinio @Sports | June 7, 2024

Laro ngayong Biyernes – TD Garden

8:30 AM Dallas vs. Boston

Papasok na mabigat na paborito ang Boston Celtics laban sa bisitang Dallas Mavericks sa Game One ng 2024 NBA Finals best-of-seven ngayong araw sa TD Garden simula 8:30 ng umaga. Hahanapin ng Boston ang ika-18 kampeonato sa kanilang mayamang kasaysayan at una mula pa ang huli noong 2008. 

Nakatutok ang pansin sa mga tambalang bituin Jayson Tatum at Jaylen Brown ng Celtics at Luka Doncic at Kyrie Irving ng Mavs. Sa apat, tanging si Irving lang ang may kampeonato noong 2016 para sa Cleveland Cavaliers.

Nakapaglaro rin si Irving sa Celtics mula 2017 hanggang 2019 kung saan nagsilbi siyang kuya sa mga noon ay mga baguhang sina Tatum at Brown. Ngayon, ang hindi niya naihatid na tropeo sa Boston ay dadalhin sa Dallas na ang nag-iisang kampeonato ay natamasa noong 2011 kung saan manlalaro pa nila ang kasalukuyang Coach Jason Kidd. 

Napipisil na mabubura ng mga superstar ang bawat isa.  Malaki ang ambag na puntos ngayong playoffs nina Tatum (26.0) at Brown (25.0) at Doncic (28.8) at Irving (22.8) kaya lilipat ang laban sa pagalingan ng iba pang kakampi. 

Mahalaga na umangat para sa Celtics sina Derrick White, Jrue Holiday at ang babalik na galing sa lampas isang buwan na pilay na si Kristaps Porzingis. Kokontrahin ito nina PJ Washington, Derrick Jones Jr. at Daniel Gafford. 

Ngayong playoffs, 6-2 ang kartada ng Celtics sa kanilang tahanan patungo sa pagbura sa Miami Heat, Cleveland Cavaliers at Indiana Pacers. Ang Mavs ay 7-2 kapag sila ang bisita, malaking dahilan kaya ginulat nila ang mga mas mataas na kalaro LA Clippers, Oklahoma City Thunder at Minnesota Timberwolves. 

Ang Game 2 ay nakatakda sa Lunes sa Boston pa rin. Lilipat ang serye sa American Airlines Center sa Dallas para sa Game 3 sa Hunyo 13 at Game Four sa 15.  

Morant suspended ng 25 laro, Jordan Hornets team, for sale

ni Anthony E. Servinio @Sports | June 18, 2023

Magsilbi sana itong aral para sa lahat ng atletang propesyunal na bantayan ang lahat ng kanilang pampublikong kinikilos lalo na sa social media. Pinatawan si All-Star Ja Morant ng Memphis Grizzlies ng parusang suspensiyon sa unang 25 laro ng parating na 2023-2024 NBA matapos siyang muling nagpalabas ng bidyo na may hawak na baril.

Ito na ang pangalawang paglabag ni Morant na suspendido ng pinagsamang 9 na laro ng sariling koponan at ng liga noong Marso bunga ng bidyo na kinunan sa isang club sa Denver noong dumayo ang Grizzlies sa World Champion Nuggets. Ang bagong bidyo ay lumabas noong Mayo 13 kung saan hawak niya ang baril kasama ang ilang kaibigan sa isang party sa Memphis.

Maaaring sa Disyembre na makababalik-aksiyon si Morant subalit bawal din siyang sumali sa ensayo o kahit anong aktibidad ng Grizzlies. Kakaltasan din ang kanyang suweldo ng tinatayang $300,000 (P16.7M) bawat laro o kabuuang $7.5M (P418.3M).

Samantala, nagpasya ang alamat na si Michael Jordan na ibenta na ang kanyang pagmamay-aring Charlotte Hornets sa grupo ng mga mamumuhunan sa pangunguna ng mga negosyanteng sina Gabe Plotkin at Rick Schnall. Mananatili pa rin siya na may maliit na bahagi ng koponan na binili niya noong 2010 noong ang kanilang pangalan ay Charlotte Bobcats.

Hindi binanggit ng opisyal na pahayag ng Hornets kung magkano inabot ang transaksyon. Ayon sa ilang nakakaalam sa negosasyon, maaaring kikita si Jordan ng $2B (P111.55B) pero hudyat na rin ito ng pagkawala ng nag-iisang may-ari sa NBA na Aprikanong-Amerikano.

Sa kasamaang palad, hindi natumbasan ni Jordan ang kanyang husay bilang manlalaro sa kanyang bagong papel bilang may-ari at tagapangasiwa ng koponan.