House-to-house bakuna, aprub sa DOH

ni Lolet Abania | July 31, 2021

Sa inaasahang pagsasailalim ng National Capital Region sa enhanced community quarantine (ECQ) sa Agosto 6 hanggang 20, inaprubahan ng Department of Health (DOH) ang mas ligtas na paraan ng pagbabakuna, ang house-to-house vaccinations.

Ayon kay DOH Undersecretary Maria Rosario Vergeire, mas higit na makatutulong sa mga kababayan ang bahay-bahay na pagbabakuna para matiyak na mababakunahan ang mga komunidad kontra-COVID-19 habang magiging mas ligtas din ang mga indibidwal dahil sa may mga mag-iikot na lamang na mga health workers sa halip na pumila sila sa mga vaccination sites.

“Sa tingin namin, maganda ‘yan na strategy, kasi una sa lahat, hindi magkukumpul-kumpol ang mga tao. Ang iikot po, ang [mga magbabakuna] at hindi na kailangang pumunta ng mga tao sa ibang lugar para magpabakuna,” ani Vergeire sa press briefing ngayong Sabado nang umaga.

Maliban dito, magkakaroon pa rin ng pagbabakuna sa mga vaccination sites subalit bubuo ang ahensiya ng mas ligtas na pamamaraan gaya ng pagkakaroon ng scheduling upang maiwasan ang pagdami ng mga tao habang isasagawa ito sa mas malalaking sites para masunod ang physical distancing.

“Gagawa tayo ng safe vaccination sites kung saan sisiguraduhin natin na hindi tayo magkukumpulan kapag tayo ay magpapabakuna na. There will be scheduling, we will be using bigger vaccination sites. Mas madali po ang mobilization ng [babakunahan] and [magbabakuna] para makapagpabakuna tayo ng mas marami,” sabi ni Vergeire.

Una nang sinabi na ipapatupad ang ECQ sa NCR simula sa Agosto 6 hanggang 20 sa gitna ng panganib ng mas nakahahawang Delta variant ng COVID-19.

Gayunman, ayon sa Malacañang, magpapatuloy ang pagbabakuna sa mga lugar kahit na isinailalim sa ECQ.

Truck, bawal na uli

ni Lolet Abania | May 14, 2021

Muling ibabalik ang ipinatutupad na truck ban sa mga pangunahing lansangan sa National Capital Region (NCR) simula sa Lunes, May 17, batay sa anunsiyo ng Metropolitan Manila Development Authority (MMDA).

Ayon sa MMDA, ang mga trak ay bawal dumaan sa mga pangunahing lansangan mula alas-6:00 hanggang alas-10:00 ng umaga at mula alas-5:00 ng hapon hanggang alas-10:00 ng gabi, tuwing Lunes hanggang Sabado.

Kaugnay nito, isang total truck ban naman ang ipatutupad sa kahabaan ng EDSA, magmula Magallanes Interchange sa Makati City hanggang North Avenue sa Quezon City.

Ito ay isasagawa ng 24 oras mula Lunes hanggang Linggo.

“[T]rucks carrying perishable and agricultural foodstuffs are exempted from the ban,” pahayag ng MMDA.

Ayon pa sa ahensiya, ito ay bilang pagsunod sa ipinatutupad na general community quarantine (GCQ) sa NCR at karatig probinsiya ng Bulacan, Rizal, Cavite, at Laguna.

Ang GCQ "with heightened restrictions" ay magsisimula ng May 15 hanggang May 31.

Herd immunity sa NCR sa Nobyembre – Galvez

ni Lolet Abania | May 4, 2021

Inaasahan nang makakamit ng pamahalaan ang target na herd immunity sa National Capital Region (NCR) at kalapit na lalawigan sa Nobyembre, ayon sa vaccine czar na si Secretary Carlito Galvez, Jr..

“We can have herd immunity in NCR and six provinces around NCR by November. We’re looking at 180 days,” ani Galvez sa Palace press briefing ngayong Martes, kung saan katuwang dito ang mga supply chain experts ng gobyerno para sa mass vaccination program.

Inisyu ni Galvez ang statement isang araw matapos nitong ilabas ang listahan ng mga lugar na prayoridad na makatanggap ng doses ng COVID-19 vaccines dahil sa kaunting supply nito.

Kabilang sa mga lugar na dapat i-prioritize sa pagbabakuna kontra-COVID-19 ang NCR, Calabarzon at Central Luzon.

“If we can achieve herd immunity by vaccinating up to 70 percent of the residents in these areas, there is a big chance that our economy will recover and we can prevent a surge in cases,” sabi naman ni Galvez sa briefing kay Pangulong Rodrigo Duterte kagabi.

Ayon kay Galvez, kinakailangan ng gobyernong magkaroon ng 15 milyong doses ng COVID-19 vaccines kada buwan para mabakunahan ang 70 porsiyento ng populasyon at makamit ang pinapangarap na herd immunity ng bansa bago magtapos ang taon.

Sinabi pa ni Galvez, kailangan ng 25,000 hanggang 50,000 vaccinators para makatulong sa pag-administer ng gamot kontra-COVID-19.

Aniya, dapat ding maglagay ng 5,000 vaccination sites para makapagbakuna ng COVID-19 vaccines sa 100 kababayan kada araw sa bawat site.

Sa ngayon, umabot na sa 3,745,120 mula sa kabuuang 4,040,600 (92.68%) vaccine doses ng COVID-19 sa maraming vaccination sites sa bansa ang naipamahagi.

Ayon sa datos ng gobyerno, mahigit sa 1.6 milyong Pinoy na ang naturukan ng COVID-19 vaccines, kung saan nagsimula ang immunization campaign noong Marso.