Nurse, medtech at Chinese na nagbenta ng Sinovac, arestado

ni Lolet Abania | July 2, 2021

Muling ipinaalala ng Department of Health (DOH) sa publiko na ang mga COVID-19 vaccines ay hindi ipinagbibili matapos na tatlo umanong sellers ng Sinovac doses ang inaresto.

Una nang sinabi ng National Bureau of Investigation (NBI) na nadakip nila ang tatlo sa apat na suspek na sangkot sa pagbebenta ng COVID-19 vaccines.

Isang entrapment operation ang ikinasa ng NBI Task Force Against Illegal Drugs (NBI-TFAID) kung saan nadakip ang isang nurse, isang medical technologist at isang Chinese na nagbebenta umano ng Sinovac vaccines.

Nakatanggap ng impormasyon ang NBI hinggil sa pagbebenta ng grupo ng nasabing bakuna. Isang poseur buyer ang bumili sa mga suspek ng 300 doses ng CoronaVac na nagkakahalaga ng P840,000.

Ayon pa sa NBI, kadalasang buyer nito ay mga Chinese.

Inaalam na rin ng ahensiya kung saan nanggaling ang supply nila ng naturang bakuna. Nagpahayag naman ng kalungkutan si DOH Undersecretary Maria Rosario Vergeire nang mabatid ang insidente.

“Bakit kailangang magkaroon ng ganitong pagkakataon na people are taking advantage of what we have right now?” ani Vergeire sa briefing ngayong Biyernes.

Hinimok naman ng kalihim ang publiko na tumanggap lamang ng COVID-19 vaccine mula sa gobyerno at hindi sa iba pa.

“‘Wag po kayong bibili sa ibang mga tao dahil wala po silang pagkukunan ng bakunang ‘yan, because it is just national government which can access these vaccines for now,” paliwanag ni Vergeire.

“Kahit isang dose lang po ng bakuna ang nasasayang dahil sa mga ganitong pamamalakad ay napakaimportante na po para sa atin,” dagdag niya.

Ang tatlong naarestong indibidwal ay sasampahan ng kaso dahil sa paglabag sa Food and Drug Administration Act.

P40 K kada estudyante pumasa lang… Propesor, buking sa 'grades for sale', arestado

ni Lolet Abania | June 30, 2021

Isang propesor sa unibersidad sa Pangasinan ang inaresto matapos maningil umano ng malaking halaga sa kanyang mga estudyante kapalit ng pagpasa sa kanyang klase.

Sa ulat, dinakip nitong Lunes ng mga tauhan ng National Bureau of Investigation (NBI) ang propesor na isa ring doktor dahil sa isinampang reklamong robbery-extortion.

Agad namang pinaimbestigahan ng Commission on Higher Education-Region 1ang naturang propesor. “Upon learning the incident, we immediately contacted the institution and the President assured our office that she will create a fact finding committee to immediately investigate,” ani Dr. Danilo Bose, acting chief ng Information Office ng CHED-1.

Binuo naman ng Philippine Medical Society (PMS)-Pangasinan Chapter ang isang investigating committee para mas matutukan ang kasong kinasasangkutan ng doktor-propesor. “Due process naman para fair naman sa kanya. Iaakyat ‘yan sa taas, pati sa PRC. Medyo maselan ang kasong ‘yan,” saad ni Dr. Jovito Rivera, pangulo ng PMS-Pangasinan Chapter.

Mariing itinanggi naman ito ng propesor na naniningil siya ng pera para lamang ipasa ang mga estudyante. “These students are trying to bribe me kasi sabi nila, bumabagsak daw sila. Ngayon, this one student, she was trying to give some money... I have to face kasi wala naman akong magagawa,” paliwanag ng propesor.

Naunang iniulat ng NBI na nasa P35,000 hanggang P40,000 ang sinisingil umano ng propesor para mabigyan ng pasadong marka ang kanyang mga estudyante.

Hinimok naman ng mga awtoridad na isumbong at magsampa rin ng reklamo ang iba pang estudyante na nabiktima ng propesor.