Dahil ‘nagpapakalat’ ng fake news… Jay Sonza, nasa kustodiya ng NBI

by Lolet Abania @News | May 1, 2026

Photo: Jay Sonza - National Bureau of Investigation

Magpapalipas ng mahabang weekend ang dating broadcaster na si Jay Sonza sa kustodiya ng National Bureau of Investigation (NBI) matapos itong arestuhin dahil sa umano’y pagpapakalat ng fake news tungkol sa kalusugan ni Pangulong Ferdinand Marcos, Jr.

Ayon kay NBI Director Melvin Matibag, inaresto si Sonza nitong Huwebes ng gabi, Abril 30, makaraang kasuhan ng paglabag sa Article 154 ng Revised Penal Code, kaugnay ng Cybercrime Prevention Act, dahil sa pagpapakalat ng pekeng medical bulletin tungkol sa Pangulo.

Aniya, bagama’t nakasaad sa warrant of arrest na non-bailable ang krimen, kailangan itong i-cleared kapag iniharap si Sonza sa Pasay Regional Trial Court sa Lunes, May 4. Ito ay dahil sarado ang mga korte sa bansa ngayong Mayo 1, Labor Day, isang regular holiday.

“Nu’ng na-enforce po ‘yung warrant gabi, alas-otso na po, sarado na ‘yung korte, at nagkataon holiday po ngayon. Tapos Sabado Linggo, so sa Lunes po talaga… Dadalhin po natin si Jay Sonza diyan pagbukas nitong Lunes,” ani Matibag .

Sinabi rin ni Matibag na papayagan naman ang abogado ni Sonza na bisitahin siya sa NBI facility.

P2M halaga ng Remdesivir, nasamsam, 4 arestado

ni Lolet Abania | June 16, 2021

Arestado ng National Bureau of Investigation (NBI) ang apat katao dahil sa ilegal na pagbebenta ng tinatayang P2 milyong halaga ng Remdesivir, isang experimental drug para labanan ang COVID-19.

Kinilala ng NBI ang mga suspek na sina Maria Christina Manaig, Christopher Boydon, Philip Bales, at Bernard Tommy Bunyi. Ayon kay NBI officer-in-charge Eric Distor, nadakip ang mga suspek matapos makatanggap ang ahensiya ng impormasyon hinggil sa “laganap” na bentahan ng Remdesivir online.

Ang naturang gamot ay walang certificate of product registration sa Pilipinas kaya hindi dapat ito komersiyal na ibinebenta. Matatandaang pinayagan ang paggamit ng Remdesivir sa pamamagitan ng isang compassionate special permit (CSP) na inisyu ng Food and Drug Administration (FDA).

Ang CSP ay maaari lamang i-request ng mga doktor na in-charge o ng institusyon kung saan ang pasyente ay ginagamot, at siya ring may responsibilidad sa paggamit at pagbibigay ng Remdesivir dito.

Sinabi ni Distor, nagawang makipagtransaksiyon ng NBI Special Task Force sa mga suspek at maka-order sa kanila ng isang vial na nasa halagang P4,500 hanggang P5,000.

Agad na nagsagawa ang NBI-STF ng magkasabay na entrapment operations kahapon na nagresulta sa pagkakadakip sa apat na suspek sa West Avenue, Quezon City at Bunyi sa Timog Avenue, Quezon City.

Nakumpiska sa mga suspek ang nasa P1.8 milyong halaga ng Remdesivir. Sumailalim ang mga suspek sa inquest proceedings bago sampahan ng kaso sa Quezon City Prosecutor’s Office dahil sa paglabag sa Food and Drug Administration Act of 2009 at Philippine Pharmacy Act.

P68-M pekeng luxury bags, wallet, etc., nasabat sa online seller na direktor

ni Mary Gutierrez Almirañez | March 25, 2021

Arestado ang online seller na si Paulino Ballano dahil sa pagbebenta umano ng mga pekeng mamahaling produkto, kung saan 631 piraso ng luxury bags, wallet, scarf at iba pang leather goods na nagkakahalagang P68 milyon ang nasamsam habang nagla-live selling siya sa isinagawang operasyon ng National Bureau of Investigation (NBI) na iniulat ngayong araw, Marso 25.

Giit pa ni NBI Executive Officer Agent John Ignacio, “Sa unang tingin n’yo, akala n’yo, original, pero peke ito. Unang-una, ang naaapektuhan dito, 'yung brand owner. Bukod du’n, pati ating gobyerno, naaapektuhan kasi nga itong mga ito, hindi nagbabayad ng tamang buwis.”

Batay sa ulat, ang luxury brand na nakabase sa Paris, France mismo ang nagreklamo sa NBI sa pamamagitan ng isang local firm laban sa umano’y pagbebenta ni Ballano sa online ng mga counterfeited products nila.

Paliwanag pa ng NBI, dadalhin ng mga awtoridad sa korte ang lahat ng nakumpiskang produkto at hihilingin na sirain ang mga ito upang hindi na magamit.

Kinilala rin ang suspek bilang isang direktor sa teatro. Karamihan sa mga kliyente niya ay mula pa sa Taiwan, US, Canada at United Arab Emirates. Katwiran pa niya, hindi lahat ng ibinebenta niya ay peke.