P29.3 M ‘di rehistradong gamot, nakumpiska ng BOC-NAIA

ni Lolet Abania | October 3, 2021

Nakasamsam ang mga tauhan ng Bureau of Customs-Port of NAIA ng mga hindi rehistradong gamot na nagkakahalaga ng mahigit sa P29 milyon mula sa Hong Kong.

Sa pahayag ng BOC-NAIA ngayong Linggo, walang clearance mula sa Food and Drug Administration (FDA) ang mga gamot na kanilang nakuha sa 146,640 na kahon mula sa 6 na shipment, kung saan tinatayang nasa kabuuang halaga na P29,328,000 ang mga ito.

Nang idaan sa physical examination, tumambad na naglalaman ang mga shipment ng mga kahon ng Lianhua Qingwen Jiaonang, ang traditional Chinese medicines na nire-regulate ng FDA.

Ayon pa sa BOC-NAIA, hindi na nila matagpuan ang consignee ng mga naturang gamot kahit sa nai-record na address na ibinigay nito.

Sinabi ng BOC na ang mga nakumpiskang mga gamot ay dadaan sa seizure and forfeiture proceedings dahil sa paglabag sa Section 1113 (Property Subject to Seizure and Forfeiture) in relation to Section 117 (Regulated Goods) ng Customs Modernization and Tariff Act (CMTA), at sa Food and Drugs Act.

Dahil sa Delta variant…Bilang ng turista sa bansa, bumaba ng 70%

ni Jasmin Joy Evangelista | September 5, 2021

Nasa 70% umano ang ibinaba ng bilang ng mga biyaherong banyaga sa bansa dahil sa banta ng COVID-19 Delta variant, ayon sa Bureau of Immigration.

"Definitely po mababa ngayon ang number of travelers, nakita naman natin entire pandemic period halos 70 percent ang binaba ng mga pumapasok - lalo na siguro sa pag-usbong ng Delta variant," ani Sandoval sa public press briefing nitong Sabado.

Kahapon ay ini-lift na ni Pangulong Duterte ang travel ban sa 10 bansa na epektibo simula Setyembre 6.

Kabilang dito ang India, Pakistan, Nepal, Sri Lanka, Bangladesh, Oman, United Arab Emirates, Indonesia, Malaysia, at Thailand.

Samantala, dati nang sinabi ng Malacañang na hindi sakop ng travel ban ang mga Pilipinong parte ng repatriation at special commercial flights.

Pa-UAE, peke ang mga visa... 6 na babae, nadakip sa NAIA

ni Lolet Abania | August 8, 2021

Anim na hinihinalang biktima ng human trafficking na patungo sa United Arab Emirates (UAE) ang naharang sa Ninoy Aquino International Airport (NAIA), ayon sa Bureau of Immigration (BI).

Ang mga pasahero na lahat ay babae ay napigil sa Immigration departure area matapos na madiskubre ng BI na ang mga UAE visas na nakapaloob sa kanilang passports ay pineke.

“During primary inspection, they claimed that they were balik-manggagawa, or overseas Filipino workers merely returning to their old employers. They alleged to have been directly hired as domestic household workers, but they were unable to show any proof of such claim,” batay sa inilabas na statement ng BI ngayong Linggo.

Ayon pa sa bureau, ang mga nahuling passengers ay dinala na sa Inter-Agency Council Against Trafficking para sa imbestigasyon habang sasampahan ng kaso ang kanilang mga recruiters.