Free rides mula NAIA T2, T3, saanman sa Metro Mla. simula Hunyo 15-30 — DOTr

ni Lolet Abania | June 4, 2022

May libreng airport shuttle rides para sa mga pasahero ang Grab Philippines na magsisimula sa Hunyo 15 hanggang 30, ito ay bilang suporta ng kumpanya sa free ridership program ng pamahalaan.

Sa isang statement, masayang tinanggap ng Department of Transportation (DOTr) ang inisyatibong ito ng Grab na nag-aalok ng free airport shuttle rides para sa mga pasahero mula Ninoy Aquino International Airport (NAIA) Terminals 2 at 3 hanggang sa saanmang lugar sa National Capital Region (NCR).

Ang free airport shuttle ay sisimulan sa Hunyo 15 hanggang 30, 2022, mula alas-8:00 ng gabi hanggang alas-11 ng gabi. Ayon sa DOTr, magde-deploy ang Grab ng 100 units para sa naturang free airport shuttle program.

Para ma-avail ang libreng shuttle service, kailangan ang mga pasahero na mag-book sa Grab booths na matatagpuan sa arrival areas ng NAIA Terminals 2 at 3. Pinasalamatan naman ni DOTr Secretary Art Tugade ang Grab para sa naturang free shuttle services dahil napadagdag ito sa kasalukuyang Libreng Sakay Program ng DOTr at ng Land Transportation Franchising and Regulatory Board (LTFRB).

Gayundin, pinasalamatan ng Grab Philippines sina Pangulong Rodrigo Duterte at Tugade sa paglulunsad nito ng Libreng Sakay Program.

“We thank President Rodrigo Roa Duterte and the DOTr under the leadership of Secretary Art Tugade for launching the Libreng Sakay program, as well as other valuable projects that continue to benefit the Filipino commuters,” pahayag ng Grab.

Mga miyembro ng malaking sindikato sa Korea... 3 Koreano, timbog!

ni Zel Fernandez | May 1, 2022

Kalaboso ang dalawang South Korean fugitives na pawang mga miyembro umano ng isang malaking sindikato, matapos mahuli sa NAIA Terminal 4. Kasunod nito ang pagkadakip din sa isa pang puganteng Koreano na lider naman umano ng sindikato ng scam sa kanilang bansa.

Ayon sa Bureau of Immigration - Fugitive Search Unit (BI-FSU), tinukoy na kapwa priority targets ang dalawang naarestong pugante dahil sa malaking operasyon ng kanilang grupo sa South Korea.

Pahayag ni Rendel Sy, hepe ng BI-FSU, may standing warrant of arrest na ang dalawang South Korean nationals na mga lider umano ng isang telecom fraud syndicate na nag-o-operate sa Pilipinas.

Batay sa ulat, nakapangulimbat na umano ang mga sindikato ng 80 milyong Korean won. Kaya pagkaraang ma-monitor ang pagbabakasyon ng mga ito sa Palawan ay inabangan na ng mga awtoridad ang dalawa sa airport, na nagdulot ng bahagyang tensiyon matapos umanong tangkain pang tumakas ng mga suspek mula sa mga aaresto sa kanila.

Samantala, sa hiwalay namang operasyon sa Quezon City, nadakip din ang isang puganteng Koreano na lider din umano ng sindikatong ang modus ay pang-i-scam, at sangkot din sa pagpatay sa kapwa Koreano nito sa Pilipinas.

Ani Police Lieutenant Colonel Bryan Andulan, hepe ng Criminal Investigation and Detection Group (CIDG) Cavite, "Mayroon silang birthday celebration doon ng magkakaibigan, nagkaroon sila ng heated argument, nagkaroon sila ng fistfight, nagkataon na 'yung kaibigan niya ay napuruhan niya, nagkaroon ng head trauma."

Kasalukuyan nang nasa panig ng mga awtoridad ang mga nadakip na salarin upang hainan ng mga karampatang kaso.

Terminal 4 ng NAIA, balik-operasyon na — MIAA

ni Lolet Abania | March 28, 2022

Binuksan na ulit ang Terminal 4 ng Ninoy Aquino International Airport (NAIA) matapos ang halos dalawang taon na isinara ito sanhi ng pandemya ng COVID-19 ngayong Lunes, ayon sa Manila International Airport Authority (MIAA).

Dahil sa limitado ang mga flights noong mga nakaraang taon kasabay ng pagpapatupad ng mga travel restrictions, ipinatigil naman ang operasyon ng Terminal 4 ng NAIA.

Subalit nang lumuwag ang mga restriksyon habang isinailalim na rin sa Alert Level 1 ang National Capital Region (NCR), muling nag-operate ang naturang terminal, kung saan napuno ito ng mga biyahero ngayong araw.

“’Yung T3 (Terminal 3) po ay napupuno dahil lahat ng mga domestic flight ay nanggagaling dito bago natin isinarado, ay inilipat natin sa T3,” pahayag ng general manager ng MIAA na si Ed Monreal.

Gayunman, kahit na isinara ang Terminal 4 sa mga flights operation, nagamit naman ito bilang COVID-19 vaccination site.