Engineer, arestado sa P55M shabu sa NAIA

ni Gina Pleñago | June 7, 2023

Nabuko ng mga tauhan ng Bureau of Customs (BOC) Port of NAIA nang tangkain ng isang Liberian national na ipasok ang 8.138 kilo ng hinihinalang shabu na natagpuan mula sa kanyang dalawang bagahe kamakalawa ng gabi sa Ninoy Aquino International Airport (NAIA) Terminal 3 sa Pasay City.

Kinilala ni BOC-Port of NAIA District Collector Atty. Yasmin Mapa ang suspek na si Philip Campbell, 34, mechanical engineer, at pasahero ng Qatar Airways flight QR 934 galing Doha, Qatar.

Dumating si Campbell noong June 4, 2023 kung saan ang port of origin ay sa Lagos, Nigeria at sumakay via Qatar Airways patungong Maynila, ngunit pagdating nito ay nagkaroon umano ng problema ang kanyang travel documents sa Immigration kaya pansamantala itong pinigilang makalabas.

Ayon kay Atty. Lourdes Mangaoang, pinuno ng X-ray Inspection Project (XIP), ang 2 bagahe ni Campbell ay sumailalim sa screening at nakakita rito ng kahina-hinala, potensyal na naglalaman ng ilegal na droga kaya naalerto ang NAIA Inter-Agency Drug Interdiction Task Group at mga operatiba ng PDEA.

Nagsagawa ang isang Customs examiner mula sa arrival operations division ng 100% physical examination, at natuklasan ang 8.138 kilo ng shabu na nakatago sa yellow powdery spices na may street value na P55,338,400.

Isasailalim sa seizure at forfeiture proceedings ang nasabat na droga habang iniimbestigahan ng mga otoridad ang naarestong pasahero para sa paglabag sa Republic Act (RA) No. 9165, o Comprehensive Drug Act, at RA 10863, na kilala rin bilang Customs Modernization and Tariff Act (CMTA).

Nagpasalamat at pinuri ni BOC Commissioner Bienvenido Rubio ang pagsisikap ng Port of NAIA at PDEA, XIP, at NAIA-IADITG sa kanilang mahalagang suporta sa operasyon.

Brownout sa NAIA 3, libu-libong pasahero apektado

ni Jun Simon | May 2, 2023

Umabot sa mahigit 40 domestic flights ang nakansela o na-delay sanhi ng power outage sa Ninoy Aquino International Airport (NAIA) Terminal 3 kahapon, May 1.

Mahigit walong oras nawalan ng supply ng kuryente ang terminal na naging dahilan ng pansamantalang paghinto ng operasyon ng flights kung saan libu-libong pasahero rin ang apektado at hindi agad nakalipad.

Dahil sa power outage, maraming pasahero ang nagreklamo sa mainit na sitwasyon sa loob ng terminal sanhi na rin sa kawalan ng airconditioning system.

Pasado ala-1 ng madaling-araw ng Lunes nang mawalan ng kuryente ang T3 kung saan gumamit ng backup generator ang Manila International Airport Authority (MIAA).

Nagsagawa naman ng ocular inspection si Transportation Secretary Jaime Bautista at MIAA General Manager Cesar Chiong sa mga pasilidad ng paliparan upang alamin ang sitwasyon ng mga pasahero.

Akala may droga.. Laruang dala ng OFW winasak, Customs na-wow mali

ni Madel Moratillo | April 5, 2023

Matapos mapaghinalaang may lamang ilegal na droga, sinira ng mga tauhan ng Bureau of Customs sa Ninoy Aquino International Airport ang isang laruang eroplano.

Sa isang post sa social media, ikinuwento ito ng OFW na si Rachell Anne Ramos, galing sa Hong Kong, at may connecting flight pauwi sa Laoag, Ilocos Norte.

Habang naghihintay umano siya ng biyahe, may lumapit sa kanyang empleyado dahil may nakita umano sa kanyang bagahe.

Dalawang beses umanong dumaan sa x-ray machine ang kanyang bagahe at ipinaamoy din sa K-9 dog.

Kaya para matapos na umano ang hinala sa laruan ay ipinasira na niya ito para magkaalaman.

Pero matapos ito, wala namang nakita na kontrabando sa loob.

Humingi naman ng paumanhin ang BOC sa nasabing OFW dahil sa pangyayari.

Kasabay nito, iginiit naman ni BOC spokesperson at Assistant Commissioner Vincent Maronilla na bago lang ang kanilang scanning machine.

Pinag-aaralan na rin aniya nila kung posibleng mabigyan ng kompensasyon si Ramos para sa nasirang laruan.