Simula sa Marso 23... 50% discount sa MRT, LRT

by Mai Ancheta @News | March 20, 2026

Photo: File / DOTr-MRT

Inanunsyo ng Department of Transportation (DOTr) na magkakaroon ng 50% discount sa pamasahe sa mga tren ng Metro Rail Transit Line 3 (MRT-3) at Light Rail Transit Line 2 (LRT-2), simula sa Marso 23, 2026.

Alinsunod umano ito sa direktiba ni Pangulong Ferdinand Marcos, Jr. na pagaangin ang pasanin ng mga pasahero sa gitna ng taas-presyo ng langis dulot ng gulo sa Middle East.

Ang 50% discount sa MRT-3 at LRT-2 ay maaaring awtomatikong makuha ng mga may hawak ng asul na Beep card.

Para naman sa mga sasakay gamit ang single journey tickets, ang pamasahe ay awtomatikong mababawasan ng 50% sa bayad.

Bukod dito, mananatili pa rin ang 50% diskwento na tinatamasa ng mga may hawak ng puting Beep card—kabilang ang mga senior citizen, persons with disabilities (PWD), at mga estudyante.

Sinabi ng DOTr na mananatili ang diskwento sa pamasahe sa MRT-3 at LRT-2 hanggang sa susunod na ilalabas na abiso. 

Taas-pasahe sa MRT sa 2024

ni Eli San Miguel - Trainee @News | December 1, 2023

Tataas sa susunod na taon ang pamasahe sa MRT-3, ayon sa Department of Transportation ngayong Biyernes.

Sinabi ni DOTr Undersecretary Timothy John Batan na inaasahang ipatupad ang pagtaas ng pamasahe sa unang quarter ng 2024.

Binanggit pa niya na ang MRT-3 fare adjustment ay magiging katulad ng pagtaas na ibinigay sa LRT Lines 1 at 2 na may karagdagang boarding fee na P2.29 at pagtaas ng P0.21 bawat kilometro.

“Kinakailangan na siguraduhin ng gobyerno na ating mapapanatili ang tamang pagtakbo ng ating mga tren, ating railway system, at tinatapat lang natin ang pangangailangan ng maintenance o pangangailangan ng operations doon sa pasaheng ibinabayad ng passengers,” paliwanag niya.

Taga-gobyerno, libre sa MRT-3

ni Mai Ancheta @News | September 16, 2023

Libre sa pamasahe sa Metro Rail Transit (MRT)-3 ang mga kawani ng gobyerno sa loob ng tatlong araw simula September 18-20.

Ito ang inianunsiyo ng MRT-3 bilang pakikiisa sa pagdiriwang ng ika-123 anibersaryo ng Philippine Civil Service.

Ayon kay Department of Transportation (DOTr) Assistant Secretary for Railways Officer-in-Charge Jorjette Aquino, kailangan lamang magpakita ng valid na government identification upang magkaroon ng libreng sakay.

Magagamit ang libreng sakay sa buong operating hours ng MRT-3 at sa lahat ng istasyon patungo sa destinasyon ng mga kawani ng gobyerno.