2 patay sa Covid, ILOILO Balik-MECQ

ni Mary Gutierrez Almirañez | May 23, 2021

Pansamantalang isasarado ang Iloilo City Hall simula bukas, May 24, upang mabigyang-daan ang RT-PCR tests sa mga elective officials at iba pang empleyado ng city hall, bunsod ng lumalaganap na kaso ng COVID-19 sa lungsod, ayon kay Mayor Jerry Treñas ngayong araw, May 23.

Kaugnay ito sa naging datos ng Iloilo City-Epidemiology and Surveillance Unit simula May 1 hanggang 22, kung saan 26 city hall employees ang nagpositibo sa COVID-19, kabilang ang 2 pumanaw.

Sa ngayon ay suspendido muna ang operasyon at transaksiyon sa city hall, habang isinasailalim sa strict isolation ang lahat ng empleyado.

Nilinaw naman ni Treñas na maaaring bumalik sa work-from-home arrangement ang mga magnenegatibo sa COVID-19.

Nauna na ring iniulat na pansamantalang ibabalik sa modified enhanced community quarantine (MECQ) o mas mahigpit na quarantine classification ang nasabing lungsod hanggang sa katapusan ng Mayo, batay sa inilabas na resolution order ng Inter-Agency Task Force (IATF) upang maiwasan ang pagkalat ng virus at ang mabilis na hawahan.

Dine-in resto, tourist spots at outdoor sports, oks na sa NCR Plus at iba pang lugar

ni Mary Gutierrez Almirañez | May 14, 2021

Inilabas na ng Inter-Agency Task Force (IATF) ang mga bagong guidelines na ipatutupad sa ilalim ng general community quarantine (GCQ) ‘with heightened restrictions’ sa NCR Plus Bubble at iba pang lugar simula May 15 hanggang 31, ayon sa inianunsiyo ni Presidential Spokesperson Harry Roque kagabi.

Kabilang sa pinahihintulutan ay ang mga sumusunod:

• 20% capacity sa mga indoor dine-in services at 50% capacity sa outdoor o al fresco dining

• 30% capacity sa mga outdoor tourist attraction

• 30% capacity sa mga personal care services, katulad ng salon, parlor at beauty clinic

• 10% capacity sa mga libing at religious gathering

• Pinapayagan na rin ang outdoor sports, maliban sa may physical contact na kompetisyon

Mananatili pa rin namang bawal ang mga sumusunod:

• entertainment venues katulad ng bars, concert halls, theaters

• recreational venues, katulad ng internet cafes, billiard halls, arcades

• amusement parks, fairs, playgrounds, kiddie rides

• indoor sports courts

• indoor tourist attractions

• venues ng meeting, conference, exhibitions

Higit sa lahat, bawal magtanggal ng face mask at face shield kapag nasa pampublikong lugar. Bawal ding lumabas ang mga menor-de-edad at 65-anyos pataas, lalo na kung hindi authorized person outside residency (APOR).

Patuloy pa ring inoobserbahan ang social distancing sa kahit saang lugar at ang limited capacity sa mga pampublikong transportasyon.

Maliban sa Metro Manila, Bulacan, Rizal, Cavite, at Laguna ay isasailalim din sa GCQ ang Apayao, Baguio City, Benguet, Kalinga, Mountain Province, Abra, Cagayan, Isabela, Nueva Vizcaya, Batangas, Quezon, Puerto Princesa, Iligan City, Davao City, at Lanao del Sur hanggang sa katapusan ng Mayo.

Mananatili naman sa modified enhanced community quarantine (MECQ) ang Santiago City, Quirino, Ifugao, at Zamboanga City.

May-ari ng Gubat sa Ciudad at bgy. chairman sa Caloocan, kinasuhan na

ni Ronalyn Seminiano Reonico | May 11, 2021

Pormal nang kinasuhan ang may-ari ng Gubat sa Ciudad public pool at ang chairman ng barangay sa Caloocan City na nakakasakop dito matapos mabuking ang operasyon nito sa kabila ng pagsasailalim sa NCR Plus sa modified enhanced community quarantine (MECQ).

Nagsampa sina City Health Officer Evelyn Cuevas at Business Permit and Licensing Office Head Emmanuel Emilio Vergara ng kasong administratibo laban kay Barangay 171 Chairman Romero Rivera dahil sa gross negligence of duty.

Pahayag naman ni Interior Secretary Eduardo Año, "Ang atin pong PNP at LGU ng Caloocan City ay nagsasagawa na ng pag-file ng kaso sa mga violators, kasama na po ang owner ng Gubat sa Ciudad Resort at ang pag-summon at pag-aresto sa barangay captain ng Barangay 171 sa Caloocan City sapagkat hindi niya naipatupad ang community health protocol."

Tinatayang aabot sa 300 katao ang involved sa naturang mass gathering na naganap sa resort.

Samantala, dahil sa insidente ay sinibak din sa puwesto ang commander ng Police Community Precinct Station 9 na si Maj. Harold Aaron Melgar, ayon kay Caloocan City Police Chief Col. Samuel Mina.

Si PLt. Ronald Jasmin Battala naman ang inatasan ni Mina na maging kapalit ni Melgar bilang bagong Station 9 commander.

Ipinag-utos din ni Mina sa lahat ng station commanders na magsagawa ng inspeksiyon sa mga nakatalagang areas of responsibility, maging sa mga business establishments.