Free solar charging station ng e-bikes at e-scooters, ilulunsad ng MMDA

ni Lolet Abania | June 22, 2022

Bubuksan na sa publiko ng Metropolitan Manila Development Authority (MMDA) ang kanilang free solar charging station para sa electric bikes at electric scooters sa Hunyo 27.

Ayon sa MMDA sa isang statement, ang kanilang solar charging station na matatagpuan sa bagong MMDA head office building sa Barangay Ugong, Pasig City ay available mula alas-6:00 ng umaga hanggang alas-7:00 ng gabi.

Paliwanag ni MMDA chairperson Romando Artes, ang proyekto na inilunsad nitong Lunes ay makatutulong na mabawasan ang pasanin ng publiko mula sa pagtaas ng presyo ng produktong petrolyo.

“Putting up free charging stations for electronic vehicles such as e-bikes and e-scooters would encourage the public to use alternative mode of transportation and at the same time help them save expenses from high fuel cost,” saad ni Artes.

Ayon kay Artes, plano niyang magtayo rin ng katulad na charging station sa MMDA headquarters sa Orense, Makati City para i-accommodate naman ang mga bumibiyahe ng EDSA.

Paalala naman ng MMDA na kailangang magdala ng mga users ng sarili nilang charging cords at cables para magamit ito.

Umaabot anila, ang pag-charge ng isang e-bike ng humigit-kumulang sa anim hanggang walong oras depende sa battery ng kanilang sasakyan. Ani MMDA, tatlong solar panels na may built-in inverter ang main power source ng station na may kabuuang anim na 220V charging outlets.

“In case the solar energy harvested will be inadequate to power the e-bikes, the station will tap into the main power grid of the building to compensate for the shortage,” pahayag ng MMDA.

“All excess electricity being harnessed by the solar panels will be distributed back to the building,” dagdag pa nito. Umapela naman si Artes sa mga e-bikers at e-scooter drivers na sumunod sa ibinabang administrative order ng Land Transportation Office (LTO) na Consolidated Guidelines in the Classification, Registration, and Operation of All Types of Electric Motor Vehicles upang matiyak ang kanilang kaligtasan.

EDSA-Kamuning flyover, isasara mula Hunyo 25 — MMDA

ni Lolet Abania | June 21, 2022

Isasara ang southbound portion ng EDSA-Kamuning flyover sa Quezon City sa loob ng 30 araw para sa isasagawang repairs nito simula Sabado, Hunyo 25, ayon sa Metropolitan Manila Development Authority (MMDA) ngayong Martes.

Sinabi ng MMDA na epektibo ang pagsasara ng flyover southbound simula alas-6:00 ng umaga ng Hunyo 25. “Ito pong buong southbound ng EDSA-Kamuning flyover ay isasara for 30 days. ‘Yan ang hiniling ng DPWH [Department of Public Works and Highways],” pahayag ni MMDA chair Atty. Romando Artes.

Ayon kay Artes, nasuri na ng DPWH ang bahagi ng flyover na may mga crack at sinabi nilang ang 30-meter stretch ng flyover ay kinakailangang i-repair.

“Nang buksan po nila ang mga may crack na portion nitong tulay ay nakita nila na kailangan pong kumpunihin ‘yung 30-meter stretch nitong buong tulay,” saad ni Artes.

“Mano-mano po ang pagbakbak ng semento dahil hindi po puwedeng gamitan ng heavy equipment dahil baka maapektuhan po ‘yung dalawang lanes pa na nasa tabi,” paliwanag ni Artes kung bakit ang pagsasara nito ay tatagal ng 30 araw.

Gayunman, sinabi ni Artes na ang 30 araw ay sagad na panahon para sa pagre-repair ng flyover, kasama na rito ang 7-araw na curing time para sa semento. Aniya, lahat ng sasakyan na patungong southbound ay kailangang gamitin ang service road na nasa ibaba ng flyover.

Pinapayuhan naman ang mga motorista na dumaan na lamang sa Mabuhay lanes bilang kanilang alternate routes. Gayundin, ani Artes, ang EDSA carousel buses ay kailangan ding dumaan sa service road, subalit matapos ang flyover, maaari na nilang gamitin ulit ang leftmost lane na nakalaan sa kanilang linya.

Ayon pa sa MMDA chief, nasa tinatayang 140,000 sasakyan ang gumagamit ng EDSA-Kamuning flyover araw-araw. Matatandaan na nakitaan ng mga crack at butas ang EDSA-Timog Avenue flyover southbound lane noong nakaraang linggo kaya kanila itong bahagyang isinara.

Mga light vehicles lamang at ang EDSA carousel buses ang pinayagan na gumamit ng flyover ng southbound lane nitong Lunes.

Mga kalsada sa Maynila, isasara sa marathon event sa Hunyo 19 — MMDA

ni Lolet Abania | June 16, 2022

Magpapatupad ang Metropolitan Manila Development Authority (MMDA) sa Linggo, Hunyo 19, ng road closures at rerouting sa ilang bahagi sa Manila para magbigay daan sa gagawing marathon event.

Sa isang Facebook post, sinabi ng MMDA, ang mga sumusunod na mga kalsada ay isasara mula alas-3:00 ng madaling-araw hanggang alas-9:00 ng umaga at alas-3:00 ng hapon onwards sa naturang petsa:

• Roxas Blvd., mula Katigbak Drive hanggang Pres. Quirino Avenue

• Bonifacio Drive, mula Anda Circle hanggang Katigbak Drive

• Katigbak Drive at South Drive

• Independence Rd.

• P. Burgos Ave., mula Roxas Blvd. hanggang Jones Bridge

• Ma. Orosa St., mula P. Burgos hanggang Kalaw

• Finance Rd., mula P. Burgos Avenue hanggang Taft Avenue

• Northbound lane ng Taft Avenue, mula Ayala Boulevard hanggang P. Burgos Avenue

• Muralla St., mula Sta. Lucia St. hanggang Real St.

• Real St., mula Muralla St. hanggang Sta. Lucia St.

• Sta. Lucia St., mula Real St. hanggang Muralla St.

• Quintin Paredes St., mula Jones Bridge hanggang Ongpin St.

“Actual closing and opening of affected roads will be based on actual traffic situation,” pahayag ng MMDA.